Ang Dili Katupngan nga Gasa sa Balaang Anak sa Dios
Ni Elder Kazuhiko Yamashita
Sa Seventy
Ang Langitnong Amahan mihatag kanato sa gasa sa Iyang Anak, kansang kinabuhi ug misyon nagdala kanato sa daghan nga ubang bililhon nga gasa.
The Nativity [Ang Pagkatawo ni Jesukristo], ni N. C. Wyeth
Sa dihang giayo ang Tabernakulo sa Salt Lake, ang pagpahinungod og usab niini nahitabo atol sa Sabado sa hapon nga sesyon sa Abril 2007 nga kinatibuk-ang komperensiya. Atol niana nga sesyon, ako adunay kasinatian nga nakatabang kanako nga makasabot, sa gamay nga paagi, sa gugma sa atong Amahan sa Langit alang sa Iyang Anak, si Jesukristo.
Si Satomi, ang among ikaduhang anak nga babaye, nagserbisyo sa Salt Lake Temple Square Mission. Nasayod ako nga ang mga misyonaryo nga nagserbisyo sa Temple Square maanaa sa Tabernakulo alang sa sesyon sa hapon, maglingkod sa kinadak-ang andana. Ako adunay kalingkoran diha sa balkonahe alang niana nga sesyon, ug naglaom ako nga makakita sa akong anak nga babaye.
Sa wala pa gayod magsugod ang sesyon, miabli ang usa ka pultahan ug misulod ang usa ka grupo sa mga misyonaryo. Nakit-an nako nga ang akong anak nga babaye ug ang iyang kauban anaa sa grupo. Gigiyahan sila ngadto sa ilang mga lingkoranan. Dayon mitan-aw si Satomi sa balkonahe. Nakakita siya kanako ug anaay gisulti. Nakakita ako og mga luha sa iyang mga mata. Giagbayan si Satomi sa iyang kompanyon ug gihupay siya.
Dili ako makadungog sa unsay gisulti sa akong anak nga babaye, apan nasabtan nako ang pulong: “Amahan.” Kana nga pulong nakapahunahuna kanako sa pagkabata ni Satomi ug sa iyang mga adlaw sa eskwelahan. Nagpahinumdom kini kanako sa iyang tinguha sa pagserbisyo sa Dios, sa pagbuhat sa Iyang kabubut-on, sa pagserbisyo Kaniya isip usa ka misyonaryo. Sa wala madugay, naghilak usab ako. Ania ang akong anak nga babaye, ug ako nahimuot kaayo kaniya.
Ang Gugma sa Amahan alang sa Anak
Nianang samang higayon, naghunahuna ako sa mga pagbati sa atong Amahan alang sa Iyang Anak samtang nag-antos si Jesukristo sa Getsemani. Tingali nakahilak ang Langitnong Amahan sa dihang nadungog Niya ang pag-ampo sa Iyang Anak: “Amahan ko, mahimo mo ang tanan. Kuhaa kining kupa gikan kanako. Apan dili ang akong pagbuot maoy matuman kondili ang imo” (Marcos 14:36).
“May anghel nga mitungha gikan sa langit nga milig-on kaniya.
“Ug samtang nag-antos siya sa hilabihang kasakit, nag-ampo siya sa labi pa ka mainiton gayod. Ang iyang singot sama sa dagkong tulo sa dugo nga nangahulog sa yuta”(Lucas 22:43–44).
Ang atong Manluluwas mikompleto sa Iyang Pag-ula pinaagi sa pag-antos didto sa Tanaman sa Getsemani, pagkamatay sa krus, ug dayon pagkabanhaw. Mapasalamaton kaayo ako nga tungod sa Iyang dakong gugma alang sa Iyang Amahan ug alang kanato, si Jesus mibuhat sa kabubut-on sa Amahan.
Mga Gasa nga Atong Nadawat
Niining panahon sa Pasko, kita adunay daghang mga kahigayonan sa paghunahuna sa atong Manluluwas, si Jesukristo. Unsa nga mga gasa ang atong nadawat tungod Kaniya? Unsa nga mga gasa ang atong madawat pa? Makakaplag kita og mga tubag diha sa mga kasulatan, sa dokumento nga “Ang Buhi nga Kristo”, ug gikan sa personal nga pagpadayag.
Ang Ginoo Mismo usa ka gasa gikan sa atong Langitnong Amahan alang kanato. “Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag kondili makabaton hinuon sa kinabuhing dayon” (Juan 3:16).
Si Jesukristo miingon, “Ako ang maayong magbalantay sa mga karnero. Ang maayong magbalantay andam sa pagpakamatay alang sa mga karnero” (Juan 10:11). Miingon usab Siya, “Kay bisan gani ang Anak sa Tawo wala man moanhi aron alagaran kondili sa pag-alagad ug paghatag sa iyang kinabuhi aron pagtubos sa daghang mga tawo” (Marcos 10:45; tan-awa usab sa Mateo 20:28).
“Siya mihatag sa Iyang kinabuhi aron sa pag-ula sa mga sala sa tanang mga katawhan. Ang Iyang kinabuhi usa ka gasa nga gihatag alang sa tanan kinsa magpuyo dinhi sa yuta.”1
Mapasalamaton kaayo ako alang sa Iyang kinabuhi ug sa Iyang Pag-ula.
Ang Ginoo mihatag kanato sa gasa sa paglaom. Pinaagi sa Pag-ula ni Jesukristo, dili lamang kita makabuntog sa pisikal ug espirituhanon nga kamatayon, apan kita usab malimpyohan, mabalaan, mapasaylo, ug malig-on. Ang iyang kinabuhi maghatag kanato og pagkabanhaw (tan-awa sa Alma 11:42–43; Doktrina ug mga Pakigsaad 18:10–12), kahayag (tan-awa sa Doktrina ug mga Pakigsaad 50:24), ug grasya ug kamatuoran (tan-awa sa Juan 1:17) ug makahatag kanato og kinabuhing dayon ug kaluwasan (tan-awa sa Juan 3:16, 17; 6:35, 51; 10:9; 14:6; Ether 3:14). Kon kita adunay hugot nga pagtuo diha Kaniya, maghinulsol, maghimo og sagradong mga pakigsaad, ug maningkamot sa pagtuman niadto nga mga pakigsaad, Siya maghatag kanato og kahayag ug paglaom (tan-awa sa Lucas 2:25–32; Juan 8:12; 1 Mga Taga-Corinto 15:19–23; Moroni 7:41; Doktrina ug mga Pakigsaad 50:24; 84:44–46; 93:7–10).
Ang Ginoo maghatag kanato sa mga gasa sa kahupayan, mga sugo, ug espirituhanong kalig-on. Agig dugang, si Jesukristo mihatag kanato og kahupayan, panabang, Iyang mga pagtulon-an, Iyang ehemplo (tan-awa sa 1 Pedro 2:21), sa yuta (tan-awa sa Mosiah 3:8), gahom, kalipay, kalig-on, kalinaw, hingpit nga kalipay, mga pagpadayag, ug sa mga sugo (tan-awa sa Juan 13:34; 15:12).
Si Presidente Russell M. Nelson mipamatuod: “Ang … Anak [sa Dios], si Jesukristo, mihatag sa Iyang kinabuhi alang kanato. Tanan aron makagamit kita sa diosnong gah[o]m—igong gah[o]m sa pag-atubang sa mga palas-anon, mga babag, ug mga tintasyon sa atong panahon.”2
Si Presidente Nelson miingon nga kita makaangkon sa gahom sa Ginoo sa atong mga kinabuhi pinaagi sa:
-
Pagkat-on mahitungod Kaniya.
-
Pagpili sa pagbaton og hugot nga pagtuo diha Kaniya ug mosunod Kaniya.
-
Paghimo og sagrado nga mga pakigsaad ug sa pagtuman niini uban sa katukma.
-
Pagdangop ngadto Kaniya inubanan sa hugot nga pagtuo.3
Si Jesukristo Mao ang Balaang Anak sa Dios
Sa unsang paagi si Jesukristo makatanyag og daghan kaayong mga gasa ngari kanato? Tungod kay sama sa gisulti sa Dios nga Amahan, sama sa gisulti ni Jesukristo Mismo, sama sa gisulti sa mga propeta, ug sama sa gisulti sa mga anghel, si Jesukristo mao ang balaang Anak sa Dios.
Niadtong Abril 29, 2019, ang akong ugangan nga lalaki, kinsa 95 anyos, gibunyagan. Sa pagkatinuod usa kadto ka milagro alang sa iyang mga anak, mga apo, ug mga apo sa tuhod. Naghulat kami sa iyang bunyag sulod sa dugayng panahon. Pagkanindot nga gasa alang sa among pamilya!
Unsay nakapausab kaniya? Nganong mipasalig siya nga magpabunyag?
Pipila ka bulan sa wala pa ang iyang bunyag, na-stroke siya ug naospital. Ang akong asawa, si Tazuko, mipauli aron makakita kaniya. Nahimuot kaayo siya nga makakita kaniya [Tazuko]. Nahadlok siya nga dili na siya makakita kaniya sa dili pa siya mamatay. Misugod siya sa pagsulti kaniya sa daghan nga mga butang nga iyang gikabalak-an. Naghunahuna siya mahitungod sa iyang lubong.
Apan si Tazuko miingon kaniya, “Papa, kon ikaw mosalig sa Dios ug itugyan ang tanan ngadto Kaniya, ang imong hunahuna mahupay ug mobati ikaw og kalinaw.” Gipasabot niya ang mahitungod sa plano sa kalipay sa Langitnong Amahan ug kon unsay gibuhat sa Manluluwas nga si Jesukristo alang kanato. Naghisgot sila mahitungod sa kalibotan sa espiritu, diin mao na ang nahimutangan sa asawa sa akong ugangan nga lalaki, iyang kamagulangang anak nga lalaki, ug iyang mga ginikanan. “Talagsaon ang sunod nga kalibotan,” miingon siya.
Siya misulti usab kaniya nga mas maayo nga moadto didto nga walay sala. Miingon siya nga salamat sa Pag-ula ni Jesukristo ug salamat sa bunyag, siya mahimong walay lama sa atubangan sa Dios. Naghunahuna siya og gamay ug miingon, “Gusto ko nga magpabunyag.”
Dayon miingon siya, “Nindot kaayo nga makakita sa inyong mga anak nga nag-ugmad og ilang kaugalingong hugot nga pagtuo ug nagpadayon sa pagsimba, nagsunod sa mga sugo, ug nagsalig sa Dios. Nakadayeg kaayo ako kanila.” Ug sa hinay nga paagi ug uban sa emosyon, miingon siya, “Importante gayod ang pamilya! Nindot kaayo nga mahimong usa ang atong pamilya.”
Ang mga Gasa sa Pagpili ug Kausaban
Human siya nagpamiyembro sa Simbahan, gipangutana nako ang akong ugangan nga lalaki kon nganong mipasalig siya sa kataposan nga magpabunyag. Mitubag siya sa walay pagduhaduha, “Mipili ako sa husto.”
Gipakita sa akong ugangan nga lalaki ang unsay gitudlo ni Presidente Nelson: “Ang ebanghelyo ni Jesukristo puno sa Iyang gah[o]m, nga maanaa sa matag matinguhaong nangita nga anak sa Dios.”4
“Walay lain nga adunay labaw ka mahinungdanon nga impluwens[i]ya [sama ni Jesukristo] diha sa tanan kinsa nakapuyo ug magpuyo pa dinhi sa yuta.”5 Ang impluwens[i]ya ni Jesukristo ug sa Iyang Pag-ula walay kinutoban. Kini naghatag kanato og gah[o]m sa pagpili, ug kini naghatag kanato og gah[o]m sa pag-usab.
Ang iyang ebanghelyo kaniadto ug karon usa ka mensahe sa kalinaw ug maayong kabubut-on. Siya kinasingkasing nga mihangyo sa tanan sa pagsunod sa Iyang panig-ingnan.6
Nasayod ako nga pinaagi sa Iyang mga disipulo ug mga sulugoon, Siya gihapon naglakaw sa kadalanan sa tibuok kalibotan, nga nag-ayo sa masakiton, nagpabalik sa panan-aw sa buta, ug nagbuhi sa patay. Nasayod ako nga pinaagi sa daghang matinud-anong mga miyembro, mga magtutudlo, mga misyonaryo, tigpangalagad nga mga brother, ug tigpangalagad nga mga sister, Siya sa gihapon nagtudlo sa mga kamatuoran sa kahangtoran, sa katinuod sa atong premortal nga kinabuhi, sa katuyoan sa atong kinabuhi dinhi sa yuta, ug sa potensiyal sa mga anak nga lalaki ug mga anak nga babaye sa Dios dinhi niini nga kinabuhi ug sa umaabot nga kinabuhi.
Siya ang buhi nga Anak sa Dios. Siya nagdapit kanato nga makigtambayayong Kaniya. Ug daghang tawo ang misanong sa Iyang pagdapit. Ako magpamatuod nga Siya usa ka dili hitupngan nga gasa ug Siya midala kanato sa daghan nga mga gasa pinaagi sa Iyang kinabuhi ug sa Iyang misyon.