Ang Mahinungdanon nga Desisyon

Ni Irene Soderquist Larsen

Ang tagsulat nagpuyo sa Idaho, USA.

Nakahukom kami nga magduet sa pagtukar. Mao kini ang among paagi sa pagdala og kalipay sa kalibotan.

photo of Irene and Alice playing a piano duet

Usa ka adlaw sa milabay nga tulo ka tuig, sa dihang nag-edad ko og 87, didto ko sa usa ka sosyal nga kalihokan. Usa ka babaye nga anaa didto nagtukar sa piano; pareparehas mi og kahanas sa pagtukar. Sa dihang gipangutana nako ang iyang ngalan, akong nahibaloan siya si Alice Bodily, inahan sa akong bishop. Siya 90 anyos na nianang higayona.

Akong gipangutana ang akong bishop kon ganahan ba kaha iyang mama nga makigduet. Siya nangutana kaniya, ug siya miingon nga ganahan siya. Busa tulo ka tuig ang milabay kami misugod pagtukar sa piano nga duet matag Miyerkules sa buntag sulod sa usa ka oras alang sa among kaugalingong kalipay.

Miuswag kami gikan sa sayon nga duet sa mga bata ngadto sa usa ka kauban sa pagduet nga kasagaran tukaron nako uban sa akong mama. Apan ang amoa gayod nga nagustohan mao ang pagtukar nga duet sa sagradong mga himno sa Simbahan. Ang among duha ka mga paborito mao ang “Unang Pag-ampo ni Joseph Smith” (Hymns, nu. 21) ug “Gugma sa Panimalay” (Hymns, nu. 184).

Pinaagi sa pagtukar sa matag Miyerkules ug pagpraktis sa taliwala, kami nahimo nga maayo diyutay ug nadani ang among mga anak sa usa ka gamay nga konsyerto. Ang akong bishop miingon nga gusto siya nga motukar kami sa miting sa sakramento, mao nga nagkat-on kami sa “Ang Espiritu sa Dios” (Hymns, nu. 2). Usa kadto ka tinuod nga hagit alang kanamo, apan amo kining gipaningkamotan sulod sa pipila ka bulan ug nasurprisa ang among kaugalingon ug ang among mga anak ug tingali sa amo usab nga mga miyembro sa ward. Sa wala pa moigo ang COVID-19, amoang gipatukar kini nga himno sa lima sa ka ward sa among mga bata.

Adunay daghang maanindot nga mga himno nga karon ganahan namong ipasundayag, sama sa “Dali, Sunod Kanako” (Hymns, nu. 64), “Come, Thou Fount of Every Blessing” (wala diha sa kasamtangan nga basahon sa himno apan sayon nga pangitaon), ug ang “Gitawag sa Pagserbisyo” (Himno, nu. 153). Usahay ang pagpangita og han-ay sa usa ka duet mahimong nagpasabot nga mangayo og tabang, apan ang usa ka sakop sa pamilya, tigpangalagad nga sister, o ang lider sa musika sa ward sagad malipayon nga motabang.

Nakakita pa gani kami og usa ka koleksiyon sa mga kanta sa Pasko ug nag-andam og 40 minutos nga programa aron ipresentar diha sa usa ka pasilidad sa inabagan nga pinuy-anan sa Disyembre. Laing musikero miapil kanamo ug mipatukar og xylophone ug usa ka hugpong sa mga kampanilya aron makadugang og pagkadaiya sa among pasundayag.

Pinaagi sa among musika, sa among mga edad nga 90 ug 93, mibati kami nga kami nakahatag og “Kalipay sa Kalib[o]tan” (Mga Himno, nu. 120) dili lamang sa Pasko apan usab sa tibuok tuig. Regular na kami nga nagpatukar karon sulod sa tulo ka tuig. Ang pagpili sa pagtukar og mga duet klaro nga usa ka importanting desisyon alang kanamong duha!

Pagserbisyo gikan sa mga Senior

Aniay mga paagi nga nakaplagan sa pipila ka senior nga mga miyembro sa Simbahan aron sa pagpanalangin niadtong anaa sa ilang palibot:

Pipila ka tuig ang milabay, si Wayne Lewis, sa Washington, USA, mimantala sa iyang istorya sa kinabuhi. Mihatag siya og mga kopya sa tanan niyang anak ug apo. “Wala kini gihimo alang sa kaayohan ni bisan kinsa apan sa akong pamilya, aron sa pag-awhag kanila sa pagsulat mahitungod sa mga kasinatian sa ilang kinabuhi,” miingon siya. Wala madugay human niana, si Wayne nag-antos sa usa ka stroke, dayon nausban og lain. “Human sa stroke, ang akong magtatambag nakadiskobre nga ang pagsulat og mga istorya mahitungod sa akong kinabuhi tinuod-anayng makatabang sa pagkunhod sa mga kaugtas nga dala sa kaangol sa utok, busa akong gipadayon ang pagsulat mahitungod sa akong kinabuhi.” Karon 88 anyos na, si Wayne midugang, “ako moawhag sa tanan sa pagsulat sa istorya sa ilang kinabuhi. Buhata karon, ug gamita ang bisan unsa nga porma nga sa inyong hunahuna mabasa niadtong inyong gimahal.”
Sa dihang ang asawa ni Wayne, si Mary, nalambigit diha sa usa ka proyekto nga gipaluyohan sa Simbahan, wala gayod siya nangandoy nga 15 ka tuig ang milabay siya manghimo pa gihapon og mga habol alang sa lokal nga mga ospital. Si Maria karon 84 na, ug sa matag bulan maghatod siya og binangan nga gagmayng habol alang sa mga bag-ong natawo ug mga habol alang sa mga bata, ang matag usa “hinimo inubanan sa gugma alang niadtong kinsa nagkinahanglan niini.”
Si Susan Barstow, 74, sa Minnesota, USA, nagpakita og ehemplo sa pagserbisyo pinaagi sa paggansilyo og mga guwantes ug medyas ug ipanghatag kini. “Nanghatag sila sa mga tawo og kainit ug kahupay,” miingon siya. Nagserbisyo usab siya isip lider sa maloloy-ong pagserbisyo sa Relief Society sa iyang ward. “Talagsaon kini nga calling alang kanako,” miingon siya, “tungod kay ako makahimo sa pagserbisyo sa mga tawo kon sila anaa sa panginahanglan ug aron matabangan ang uban sa pagbuhat sa ingon.”