Pasko, Pagpundok sa Israel, ug Family History

Minahal nga mga Ginikanan,

Ang panahon sa Pasko mao ang usa ka espesyal nga panahon sa tuig. Gamita ang mga artikulo sa mga magasin sa Simbahan niining bulana sa pagtudlo sa inyong pamilya mahitungod sa pagkatawo ni Kristo ug sa paglaom nga gidala Niya sa atong mga kinabuhi, sa pagpundok sa Israel, ug sa gahom sa buhat sa family history.

Mga Panaghisgotan sa Ebanghelyo

Mga Gasa sa Pasko

Pangitaa ang pagpamatuod ni Elder Kazuhiko Yamashita sa pahina 30 aron mabasa ang mahitungod sa paglaom, kahupayan, ug kalig-on nga moabot pinaagi kang Kristo. Uban sa imong pamilya, mainampoong maghisgot sa mga gasa nga imong nadawat gikan sa Manluluwas.

Buhat sa Family History Mao ang Atong Buhat

Tun-i ang artikulo sa pahina 12 alang sa mga ideya sa paggamit sa family history ug sa buhat sa templo aron ikapaambit ang ebanghelyo. Pagpaambit og usa ka istorya mahitungod sa usa sa imong mga katigulangan uban sa imong mga anak. Pangutan-a sila hain nga bahin sa istorya sila may kalabotan. Isip usa ka pamilya, makahunahuna kamo og mga tawo nga inyong nailhan kinsa lagmit mahimong interesado sa pagkat-on og dugang mahitungod sa ilang family history.

Dali, Sunod Kanako nga Suporta

Tan-awa sa pahina26 alang sa mga materyal sama sa usa ka dula nga pagsiksik sa kasulatan aron masuportahan ang inyong sinemana nga Dali, Sunod Kanako nga mga pagtuon.

Tan-awa usab sa mga isyu niini nga bulan sa ang Higala ug Alang sa Kalig-on sa Kabatan-onan nga mga magasin alang sa mga istorya sa kasaysayan sa Simbahan ug sa Pasko.

Dali, Sunod Kanako Kalingawan sa Pamilya

Mga Artikulo sa Hugot nga Pagtuo nga Hagit sa Pamilya

Mga Artikulo sa Hugot nga Pagtuo

Pagmemorya og usa o labaw pa sa Mga Artikulo sa Hugot nga Pagtuo uban sa inyong pamilya.
Kon kamo adunay mas gagmay nga mga bata sa inyong panimalay kinsa wala pa nakamemorya sa Mga Artikulo sa Hugot nga Pagtuo, hatagi sila og usa ka pares nga motabang kanila.
Sulayi ang mosunod nga kalihokan:
1. Manglingkod nga mag-alirong.
2. Ipasag-ulo ang usa ka artikulo sa hugot nga pagtuo, nga ang matag tawo mosulti og usa lang ka pulong sa usa ka higayon (ang unang tawo mosugod sa unang pulong, ang sunod nga tawo mosulti sa ikaduha, ug sunod-sunod na).
3. Kon makahimo og sayop, sa malumong paagi ihusto ang sayop ug dayon ang sunod nga tawo mosulti sa sunod nga pulong.
4. Tan-awa kon inyo bang makompleto ang artikulo sa hugot nga pagtuo nga adunay pipila lang ka sayop ang mahimo. Dayon mosulay na usab og laing usa.

Panaghisgotan: Sa unsang paagi ang pagmemorya niining importanting mga artikulo makatabang kanato sa atong kaugalingong kinabuhi? Ang pagsag-ulo niining gamhanang mga pulong makatabang kanato kon ang atong mga hunahuna maugtas o kon kita nanlimbasog sa pagpabilin sa atong mga hunahuna nga limpyo o positibo. Ang pagkahibalo niining mga kamatuoran makatabang usab kanato kon ang mga higala mangutana kanato og kabahin sa ebanghelyo.

Usa ka Gasa alang sa Manluluwas

Ang Buhi nga Kristo: Ang Pagpamatuod sa mga Apostoles

Si Kristo nagpakita og ehemplo nga sundon natong tanan. Samtang atong saulogon ang Iyang pagkatawo niining Pasko, hatagan nato Siya sa gasa sa pagkahimong sama Kaniya. Si Kristo miingon: “Unsa nga matang sa mga tawo kamo mahisama? Sa pagkatinuod Ako moingon nganha kaninyo, gani sama nga Ako mao” (3 Nephi 27:27). Makahatag ba kamo sa Manluluwas og usa ka gasa niining Pasko pinaagi sa pagsunod sa Iyang ehemplo?

Magdungan sa pagbasa sa unang duha ka parapo sa “Ang Buhi nga Kristo”.
Hisgoti ang mga butang nga gibuhat sa Manluluwas sa pagpanalangin sa uban.
1. Siya “[n]agpangadto-adto sa paghimog mga kaayohan” (Mga Buhat 10:38). Sa unsang paagi kita makaadto sa paghimo og maayo?
2. Ang Iyang ebanghelyo mao ang usa ka mensahe sa kalinaw ug pakigdait. Sa unsang paagi kita makahatag og maayong kabubut-on ngadto sa uban?
3. Siya miawhag sa tanan sa pagsunod sa Iyang ehemplo? Sa unsang paagi nga kita makasunod sa ehemplo ni Kristo?
Isulat o drowinga ang inyong ideya nga gasa alang sa Manluluwas.
Ipapilit kini sa usa ka dapit isip pahinumdom sa inyong tumong niining tuiga.

Panaghisgotan: Unsay imong mahimo aron mapanalanginan ang mga kinabuhi sa uban sama sa gibuhat sa Manluluwas? Sa unsang paagi ang pagpakita og ehemplo sa pagsunod ni Kristo makadala sa uban ngadto sa Manluluwas?