Usa ka Panan-awon bahin sa Kalibotan sa mga Espiritu

Ang mosunod usa ka kinutlo gikan sa volume 3 sa Mga Santos: Ang Istorya sa Simbahan ni Jesukristo sa Ulahing mga Adlaw, nga ipagawas karong tingpamulak sa 2022. Nahitabo kini nga istorya pagka-1918, human nga ang anak nga lalaki ni Presidente Joseph F. Smith nga si Hyrum M. Smith kalit nga namatay tungod sa mibuto nga apendiks. Mga bulan sa pagkamatay ni Hyrum, ang iyang asawa, si Ida Bowman Smith, namatay human sa pagpanganak.

Imahe

hulagway ni Joseph F. Smith

Ang pamilya ni Joseph F. Smith wala dayon mosulti mahitungod sa pagkamatay ni Ida, kay nahadlok nga ang balita makapahugno kaniya. Nag-anam siya kaluya sukad nga namatay si Hyrum, ug panagsa ra siya mopakita sa publiko sulod sa miaging lima ka bulan. Pagkasunod adlaw human sa pagkamatay ni Ida, hinoon, ang mga sakop sa pamilya midala sa iyang bag-ong natawo nga anak nga lalaki ngadto kang Joseph, ug siya naghilak samtang gipanalanginan niya ang bata ug ginganlan siya og Hyrum. Ang pamilya misulti dayon mahitungod kang Ida.

Sa ilang katingala, si Joseph kalma nga midawat sa balita.¹ Hilabihan gayod nga pag-antos ug kasakit ang miabot sa kalibotan bag-ohay lang. Ang kada adlaw nga mga mantalaan naglangkob og makahadlok nga mga balita bahin sa gubat. Minilyon ka sundalo ug mga sibilyan ang nangamatay, ug minilyon pa ang nangaangol ug samaran. Sa sayong bahin niana nga ting-init, ang mga sundalo gikan sa Utah miabot didto sa Europe ug nakasaksi sa walay hunong nga kabangis sa gubat.

Usa ka makamatay nga sama sa influenza misugod usab sa pagkalas og mga kinabuhi sa tibuok kalibotan, mipasamot sa kasakit ug kagul-anan tungod sa gubat. Ang virus mikuyanap sa makapaalarma nga kapaspason, ug ang Utah pipila pa lang ka adlaw human niana nanira sa mga sinehan, mga simbahan, ug uban pang pangpubliko nga mga lugar nga naglaom nga mahunong ang pagkuyanap sa sakit ug kamatayon.²

Niadtong Oktubre 3, 1918, si Joseph naglingkod sa iyang lawak, namalandong bahin sa Pag-ula ni Jesukristo ug sa katubsanan sa kalibotan. Gipakli niya ang iyang Bag-ong Tugon ngadto sa 1 Pedro ug gibasa ang mahitungod sa Manluluwas nga nagsangyaw ngadto sa mga espiritu didto sa kalibotan sa mga espiritu. “Kay kini mao ang hinungdan ngano nga ang Maayong Balita giwali hangtod ngadto sa mga patay,” siya mibasa, “aron nga bisan tuod sila nahinukman na diha sa lawas ingon sa mga tawo, sila mabuhi sa espiritu ingon sa Dios.”

Samtang namalandong siya sa mga kasulatan, gibati sa propeta nga ang Espiritu mikunsad kaniya, miabli sa mga mata sa iyang salabotan. Nakita niya ang pundok sa mga namatay na didto sa kalibotan sa mga espiritu. Ang matarong nga mga babaye ug mga lalaki nga namatay sa wala pa ang mortal nga pangalagad sa Manluluwas malipayong naghulat sa Iyang pag-abot didto aron mopahayag sa ilang kagawasan gikan sa mga higot sa kamatayon.

Ang Manluluwas mipakita sa pundok sa katawhan, ug ang matarong nga mga espiritu nagmaya sa ilang katubsanan. Sila miluhod sa Iyang atubangan, miila Kaniya isip ilang Manluluwas ug Tigluwas gikan sa kamatayon ug mga kadena sa impyerno. Ang ilang mga panagway misanag samtang ang kahayag gikan sa presensya sa Ginoo midan-ag sa ilang palibot. Sila nanag-awit og pagdayeg sa Iyang ngalan.³

Samtang si Joseph nahingangha sa panan-awon, namalandong siya pag-usab sa mga pulong ni Pedro. Ang panon sa masinupakon nga mga espiritu mas daghan pa kay sa panon sa matarong nga mga espiritu. Giunsa sa Manluluwas, atol sa Iyang mubo nga pagbisita didto sa kalibotan sa mga espiritu, nga nakahimo man sa pagsangyaw sa Iyang ebanghelyo ngadto sa tanan kanila?⁴

Ang mga mata ni Joseph nabuksan pag-usab, ug iyang nasabtan nga ang Manluluwas wala moadto mismo sa Iyang kaugalingon ngadto sa masinupakon nga mga espiritu. Kondili, giorganisar niya ang matarong nga mga espiritu, mitudlo og mga mensahero ug misugo kanila sa pagdala sa mensahe sa ebanghelyo ngadto sa mga espiritu nga anaa sa kangitngit. Sa ingon niini nga paagi, ang tanang tawo nga namatay diha sa kalapasan o walay kahibalo bahin sa kamatuoran mahimong makakat-on mahitungod sa hugot nga pagtuo diha sa Dios, paghinulsol, puli nga bunyag alang sa kapasayloan sa sala, gasa sa Espiritu Santo, ug uban pang mahinungdanon nga mga baroganan sa ebanghelyo.

Nagtan-aw sa dako kaayo nga kongregasyon sa matarong nga mga espiritu, nakita ni Joseph si Adan ug ang iyang mga anak nga lalaki nga sila si Abel ug Seth. Nakita niya si Eva nga nagbarog uban sa iyang matinud-anong mga anak nga babaye nga misimba sa Dios sa tibuok nga kapanahonan. Sila si Noe, Abraham, Isaac, Jacob, ug Moises anaa usab didto, uban nila ni Isaias, Ezequiel, Daniel, ug ubang mga propeta gikan sa Daang Tugon ug sa Basahon ni Mormon. Ingon man usab si propeta Malaquias, kinsa mitagna nga si Elijah moanhi aron ibutang diha sa mga kasingkasing sa mga anak ang mga saad nga gihimo sa mga amahan, nag-andam sa dalan alang sa buhat sa templo ug katubsanan sa mga patay sa ulahing mga adlaw.⁵

Si Joseph F. Smith nakakita usab nila ni Joseph Smith, Brigham Young, John Taylor, Wilford Woodruff, ug sa uban pa kinsa mipahiluna sa sukaranan sa Pagpahiuli. Uban nila mao ang iyang gimartir nga amahan, si Hyrum Smith, kansang panagway wala na niya makita sulod sa setentay-kuwatro ka tuig. Sila ang pipila sa hamili ug halangdon nga mga espiritu kinsa gipili sa wala pa ang mortal nga kinabuhi aron moanhi sa ulahing mga adlaw ug maghago alang sa kaluwasan sa tanang anak sa Dios.

Unya nasabtan sa propeta nga ang matinud-anong mga elder niini nga dispensasyon mopadayon sa ilang mga paghago didto sa sunod nga kinabuhi pinaagi sa pagsangyaw sa ebanghelyo ngadto sa mga espiritu nga anaa sa kangitngit ug ubos sa pagkaulipon sa sala.

“Ang mga patay kinsa maghinulsol mahimo nga matubos, pinaagi sa pagkamasulundon ngadto sa mga ordinansa sa balay sa Dios,” naobserbahan niya, “ug human sila makabayad sa silot sa ilang mga kalapasan, ug mahugasan nga limpyo, makadawat og usa ka ganti sumala sa ilang mga buhat, kay sila mao ang manununod sa kaluwasan.”⁶

Sa dihang nahuman na ang panan-awon, si Joseph namalandong sa tanan nga iyang nakita. Pagkasunod buntag, gisurprisa niya ang mga Santos pinaagi sa pagtambong sa unang sesyon sa Oktubre nga kinatibuk-ang komperensiya bisan pa man sa iyang gipamati sa lawas. Determinado nga mamulong sa kongregasyon, mibarog siya sa pulpito bisan nagkalisod, ang iyang dakong pamayhon nagkurog tungod sa pagpaningkamot. “Sulod sa sobra sa setenta ka tuig usa ko ka trabahante niini nga kawsa uban sa inyong mga amahan ug mga katigulangan,” miingon siya, “ug ang akong kasingkasing sama ka hingpit nga mapasaligon uban kaninyo karon ingon nga kini mao gayod sukad pa kaniadto.”⁷

Nagkulang sa kalig-on sa pagpamulong bahin sa iyang panan-won nga dili mabuntog sa iyang emosyon, mihisgot lang siya og diyotay bahin niini. “Wala ako mag-inusara niining lima ka bulan,” misulti siya sa kongregasyon. “Nagpuyo ko diha sa diwa sa pag-ampo, sa pagpangamuyo, sa hugot nga pagtuo, ug determinasyon, ug padayon ang akong komunikasyon sa Espiritu sa Ginoo.”

“Usa kini ka malipayong panagtigom karong buntaga alang kanako,” miingon siya. “Ang Dios nga Labawng Makagagahom mopanalangin kaninyo.”⁸