Itulau i le lotoifale
O Le Taimi o Pau Taavale
I le faaiuga o le 2020, sa ou iloaina ai ua faigata ona lagona le agaga o le Kerisimasi, o lea na ou faalogologo ai i le tusi a John Bytheway, ‘Born This Happy Morning’1, mo ni manatu. I se tasi o mataupu, ua ia faasoa mai ai se aafiaga lea na ia faatauina ai ni pa’u taavale mo se fafine faatoa ia feiloai i ai.
Ua faapea mai Uso Bytheway ua ia silafia atonu o le a leiloloa ona faamanuiaga i le ta’uina mai ia i tatou e uiga i lana auaunaga, ae ua le afaina i le faasoa atu o le olioli maoa’e ma le faamalieina o loo ia lagonaina pea pe a ia manatuaina lena mea na tupu. O se faamanatu e sili atu le manuia o le foa’i, nai lo le taliaina.
O lena olioli ma le faamalieina o le mea tonu lava lea na misi i lo’u olaga. O lena Kerisimasi, sa ou talitonu o lenei lagona o le a fesoasoani ia te a’u e taulai atili atu ai i lo’u Faaola, o le Tesema lea, na ou anapogi ia avea ma se meafaigaluega i aao o le Tama Faalelagi. Na ou manao e fesoasoani atu i se tagata—faafuasei pe lei faamoemoeina—ina ia latou iloa e popole o Ia mo i latou, ma le isi ina ia mafai ona ou lagonaina le filemu ma le olioli o lea vaitau. A o ou taumafai e faamatala i le Tama Faalelagi le mea o loo ou anapogi ai, na iu ina ou fai atu upu: “E te silafia, e pei o John Bytheway, ma pa’u taavale”.
Sa ou faaaluina aso na sosoo ai e saili malosi ai mo ni avanoa e auauna atu ai, ona, a o o’u olioli i se po faatasi ma se uo mamae, na ia ta’ua puupuu lava na ia manaomia ni pa’u taavale fou!
Sa ou matuai ofo lava ma na faatumuina lou loto i le olioli a o ou faalogo atu i le Agaga o manino lava le tautala mai ia te au: “Sarah, o au pa’u taavale ia ma le tali i lau anapogi.”
Sa ou toso ese mai le talanoaga i pa’u taavale ma iloa ai faapea, a o iloa e la’u uo ma lona toalua ua tatau ona sui vave a la pa’u taavale, i ni nai aso talu ai, na la lagonaina uma lava le vave manaomia tele o ni pa’u taavale fou.
Na ou tau atu ia te ia e uiga i lau anapogi ma lo’u lagona faapea o le tali lea a le Tama Faalelagi i a’u tatalo. Ona ou fesili atu lea pe mafai ona ou totogia a la pa’u taavale.
Sa le toe gagana la’u uo mo sina taimi, ona lue mai lea o lona ulu. Ina ua mavae ni nai minute o le matua faagaeetia, na ia faamatalaina le le mafai i le taimi nei ona la gafatiaina ni pa’u taavale na la manaomia, ae sa faaauau pea ona la mulimuli i uunaiga na la mauaina uma ma faatulagaina se seti fou o pa’u. Na iloa a’e, o le aso tonu lava lea na ou anapogi ai mo se aafiaga, ‘e te silafia, e pei o John Bytheway ma pa’u taavale’, na la anapopogi mo se ala e mafai ai ona totogi a la pa’u taavale.
E mafai ona ou faamautinoa atu ia te oe ou te lei faamoemoe o le tali i lau anapogi o le a matua’i moni lava! Ae oka se fetaui lelei o le taimi ma le faapitoa faavavega o le tali a le Alii i a matou tatalo taitasi.
Ana faapea e i’u iinei lenei vavega, semanu e avea pea o se taimi matagofie o lo’u olaga o le “faalogo ia te Ia”. Ae ui i lea, i le na o le lua aso talu ona maua e lenei aiga matagofie pa’u fou, na valaau mai ai la’u uo. Sa le mafai ona ou talia lana valaau, lea ou te fiafia lava i ai, aua o lona uiga ou te faalogo pea i lona leo i la’u telefoni o faamatala mai faapea i le taeao o lena aso, a o latou tietie atu ma lana fanau laiti, i le mamafa o timuga, na faafuasei ona oso mai se taavale e leai ni moli taofi i le laina taavale i luma ma na ia manaomia le oomi faafuasei o taofi. Na latou tutu ma le saogalemu, ma na ia iloa vave lava ana faapea o la e i ai lava a latou pa’u tuai, semanu e faasasa’o atu lava le latou taavale i luma. Sa ia fai mai o se vavega ma faaiu le valaau i le faapea mai, “O lea la, faafetai tele lava”.
Ina ia toe fai atu le mea na ou faalogo o saunoa ai Sister Joy D. Jones, “Ou te le mana’o e faafetai mai ona o le alofa matagofie, ma atoatoa o le Atua, ae oka, se tele o lo’u faafetai ua Ia faatagaina a’u ia avea o se vaega itiiti o Lana paso!”2
Ua saunoa mai Uso Bytheway, “O loo i ai se tasi iina i le asō, o se tuaoi, o se uo, se tagata o le uarota, o loo taumafai e agai i luma i ni pa’u taavale e matuai leaga lava. E mafai lava ona pasae le latou pa’u i soo se taimi. Atonu o a latou pa’u e faalelagona, faaleagaga pe faaletino. Pe [faapei foi ona ou iloaina] atonu o ni pa’u moni lava.”3
Ina ia maua ma fesoasoani le tasi i le isi, e mafai ona tatou faalogo i le faamanatu mai a Peresitene Dallin H. Oaks e faapea, “O o tatou lima o Ona aao pe a tatou faalogo ia te Ia ma lagona ua uunaia e fesoasoani i se tasi o Ana fanau.” Ua ia ta’u mai ia i tatou: “Pe a e maua se uunaiga, ia faatino i luga o lena uunaiga, e tusa lava pe foliga mai e le masani ai pe tusa lava foi lou lagonaina o le le agavaa e mulimuli i ai. Faatino i luga o le uunaiga. E i ai se mafuaaga mo lena uunaiga. Atonu e te le iloa le mafuaaga, ae o le a oo mai faamanuiaga ia te oe ma isi pe afai tou te faalogo ia te Ia ma mulimuli i Ana faatonuga.”4