O Le Atua o Loo i le Foeuli

Saunia e Lillian Arp

E oo mai nei, o le olaga o Fetauai Unasa Tautiaga Tuifalefa Tiatia, ua avea o se faataitaiga o le faamanuiaina.

Na ia amata lana galuega faiaoga i le silia ma le 27 tausaga talu ai, ina ua maua se tipiloma mai le Kolisi Faafaiaoga o Samoa, ma na saili atu ia maua se faailoga tikeri i le faafaiaoga. I le amataga o tausaga 2000, na maua ai e Fetauai ni tikeri maualuga mai le Kolisi Faafaifeau lauiloa o Malua, lea na agavaa ai foi o ia e avea o se faifeau faauuina i se tasi o ekalesia Kerisiano e sili ona toatele i Samoa.

I le aluga o aso, na ia feiloai ai ma faaipoipo ia Lili Laufiso aulelei, ma na la maua ni fanau—e 3 teine ma le tama. Ina ua oo i le taimi e filifili se aoga maualuga mo i latou, i le i ai o se tulaga lelei faaleaoaoga o Fetauai lava ia, na fai ai e le ulugalii ma le faaeteete a la filifiliga.

“Na ma filifili e ave a ma teine i le Kolisi o Vaiola,” ua fai mai ai Fetauai, e faatatau i se aoga maualuga i Savaii, Samoa, lea e faatautaia ma onaina e Le Ekalesia a Iesu Keriso o le Au Paia o Aso e Gata Ai. O se filifiliga malie mo se faifeau o loo galue i se lotu ese, ae na uunaia o ia e tulaga maualuga o le amio ma tulaga faatauaina e faavae ai le ekalesia.

Sa itiiti lava le silafia e Fetauai i lena taimi, o lenei filifiliga o le a ola ai se aloiafi lea o le a suia ai lona olaga.

Na vave ona amata e ona afafine ona sailiili i le ekalesia a le latou aoga maualuga. Na latou avea vasega seminare (faalelotu), ma i latou faigalotu faaleaiga i afiafi, latou te faasoa atu ai mea na latou aoaoina e uiga i le talalelei toefuataiina a Iesu Keriso.

Na amata ona fiafia Fetauai ma lana ava i faifeautalai ia na asia le la fanau teine i le fale. Na aoaoina i latou e Sister Niutua ma Laulu i le Fuafuaga o le Faaolataga a le Tama Faalelagi, ma ia Aperila 2010, na papatiso ai le fanau teine a Fetauai. E manatua e Fetauai a laua tatalo faamavae na tumu i loimata, na faaleo ai e nei faifeautalai tamaitai o la manao e sili ona loloto ina ia mafai foi e le aiga o totoe ona auai i le Ekalesia.

E manatua foi e ia se lesona malie o le Afiafi Faaleaiga ma se ulugalii faifeautalai mai Iuta. Na aumai e Elder ma Sister Krogh se apa o kuki na fai i le fale, lea na afifi i se fasi uaea uamea umi. Ina ua uma le lesona, na auauai tagata taitoatasi e talatala le uaea uamea mai le apa seia iu lava, ina mafai ona latou tatalaina le apa ma taumamafa olioli ai i kuki na i ai i totonu. Ona molimau mai lea o Elder Krogh: seiloga lava tatou te tatalaina (talatala) o tatou loto i le talalelei ona mafai lea ona tatou olioli i le suamalie o ona faamanuiaga.

Mai i lea vaega itiiti i lea vaega itiiti, o nei aafiaga na fausia ai le faatuatua na faia se vavega maoa’e i le loto o Fetauai lava ia, ma na vave lava, na le toe mafai ona ia tatalia lona naunautai e auai i le Ekalesia. “[Sa pei] lava o le lagona e te mauaina a o i ai i se malaga umi lava e aunoa ma se vai ma meaai i se toafa,” ua ia saunoa ai.

Na vave lava ona valaau e Fetauai le epikopo o le lotoifale e faatulaga lona lava papatisoga, ma e itiiti ifo ma se vaiaso mulimuli ane, o lenei faiaoga tautaua ma o le faifeau ua avea nei o se tagata o Le Ekalesia a Iesu Keriso o le Au Paia o Aso e Gata Ai.

O se talafou na faate’ia ai tagata, aemaise lava mo faifeau i le lotu na ia tuua. “Na talanoa tagata e uiga i lo matou liua . . . ma le le talitonu. [Sa avea o se] autu taua i le auala, le maketi ma pasi i na taimi!” E ata Fetauai. Ae o le faitio sa ma’ati foi. “Na i ai a matou uo na liua o ni fili . . . i le nuu, [ma] i o matou aiga.”

Sa o se siitaga faigata, ae ua vaai nei i ai Fetauai i na manatuaga tiga o ni “aafiaga faagaloina” aua, ua ia saunoa ai, “ina ua mou malie ese atu afa malolosi na faasaga ia i matou, na i’u loa ina matou vaaia le malamalama o Keriso, e sili atu le susulu nai lo se isi lava malamalama na susulu mai i totonu o o matou olaga.”

Na papatiso Fetauai i le 2013, ona faamauina lea o lona aiga mo le taimi nei ma le faavavau atoa i le tausaga mulimuli ane. E oo atu i le 2016, sa avea o ia ma epikopo, ma i le 2017 na valaauina ai o ia e auauna atu o se peresitene mo le Siteki o Savaii Samoa Pu’apu’a.

I le toe manatunatu i tua, e tasi lava le faamatalaga a Peresitene Tiatia mo lona ala e tumu i mea tutupu agai i le talalelei moni a Keriso. “I luitau uma na matou feagai ma filifiliga na matou faia, matou te . . . iloilo ai le amataga ma iu ina faapea atu: ‘E i ai i taimi uma le Atua i le foeuli o agaga taitasi.’”