ITUKUTUKU NI VEILIUTAKI NI IWASEWASE

Rogoca na Domona ena Dela ni Rorogolevu

Mai vei Elder Glenn Burgess

IWasewase 70

Na noda sasagataka na wiliki ni Vola i Momani ena loma ni vei yabaki sa oti mai ena imatai ki na iotioti ni waqana e vaka e dua na ka eda lakocuruma ka da kila taucoko. Ena noda wilika vakawasoma na kena itekitekivu, ena vakatara me da vulica vakalevu na nona bula o Nifai kei na nona vuvale. Ena ikawalu ni wase ni vola i Nifai eda sa mai kila toka yani na duidui ni yalo ni lewe ni vuvale yadua. E dua na tama kei na tina yalododonu erau vakamacalataki ni rau itubutubu vakalou,¹ na ibolebole eratou lakocuruma na luvedrau ni ra se itabagone. Eda raica na kena duatani na nodratou idigidigi na gone, dina ga ni tautauvata na veika eratou lako curuma kece tiko.

Na akaude oqo e sega ni italanoa walega se na kena toqai ena volaniveisiga mai vei dua na luvena tagane me baleta na nona itubutubu kei ratou na tacina. O Liai, kei Nifai, erau parofita ruarua. Na noda vulica ka vakararamataki mai na veika e yaco ena ivolanikalou e vakalevutaka na ivakadinadina mai vua na Yalo Tabu, koya e vakadinadinataka na vakalesui mai ni dina me baleta na gauna nikua. E sega ni mai talanoa walega e oka kina e so na tamata e talanoa buli. Eda vakila ka rogoca saraga na domo ni Kalou mai na vosa era tauca na parofita ni gauna makawa.

Na nona vakabauta o Nifai, me lako ka kitaka na ka e vakarota na Turaga² e vakaqaqacotaki keda me bucini na inuinui kei na vakabauta vua na Turaga o Jisu Karisito. Ena tadra nei Liai, a raici koya o Liai ena mata ni vunikau ni bula. Na vuana e ivakatakilakila ni loloma ni Kalou.³ Ni sa kania oti na vuanikau, vakamacalataka o Liai ni sa vakasinaiti na yalona ena marau levu sara ka kila ni sa gadrevi vakalevu cake sara vei ira na vuanikau kecega.⁴ Eso na gauna ena vakilai na veilecayaki ni bula se veivakadrukai. Na vakalesui ni kosipeli i Jisu Karisito, na inuinui e tu vakarawarawa vei keda. Tukuna o Elder David A. Bednar, “na laukana ni vuanikau e ivakatakarakara ni kena ciqomi na cakacaka vakalotu kei na veiyalayalati me vakaibalebale kina na Veisorovaki ena noda bula. Na vuana e vakamacalataki ni “talei sara me marau kina na tamata” ka kauta mai na marau e vakauqeta na gagadre me wasei na marau vei ira na tani.”⁵

E sinai ena tadra oqo na ivakatakarakara ka vukea meda veidutaitaka na italanoa ki na noda bula. O ira kece era mua ena sala veivukei ni itautauri kaukamea, ai vakaraitaki ni vosa ni Kalou⁶. Na tataqomaki e sega ni kune walega ni da volekata na itautauri kaukamea, na tautauri matua kina ena vakarautaka na kaukauwa veitokoni kei na tudei. Na vuvale nei Liai e ivakatakarakara ni o ira kece na luveni Kalou era lako tiko ena bula oqo. Gone se qase, vakamau se sega ni vakamau, tautauri matua ki na vosa ni Kalou e vakarautaka na tataqomaki kei na nuidei ni na vinaka na veika kece, se mani vakacava na ibolebole ni bula ena yaco mai.

Au kila ni da kila vinaka na italanoa ni tadra nei Liai. Ni da masulaka na noda vulica na ivolanikalou, na Yalo Tabu e rawa ni vakarautaka na ivakatakila yadua me da kila matata kina. Nona vakila na loloma ni Kalou, a vakauqeti o Liai me vakasaqara nona vuvale ka sureti ira me ra mai marautaka vakataki ira na veika e sa raica mai.⁷ Na nodra ituvaki tawamudu na noda vuvale e dodonu me ka bibi duadua. Sega ni ratou kila na vanua me ratou lako kina, kaci vaka domolevu o Liai vei ratou me vakaraitaka na sala.⁸ Na domolevu e sega ni dau nodra ivakarau na domo ni tama se mai vua e dua na parofita. Ia, na domoi Liai e gadrevi me rogoci mai na vakasausa e lako mai ena vale levu era cauraka tiko mai na itukutuku cala kei na veitemaki. Noda vakamuria nodra idusidusi na parofita edaidai, ena vakataka na vale ni vulici ni kosipeli kei na veitotogani ni vunica ena lailai mai.⁹

Nikua, o Peresitedi Russell M. Nelson e tiko vua na domo veivakadonui oya. Me vakataki Liai, e vakauqeti keda ena veivakauqeti ni dua na itubutubu dau loloma¹⁰ me da rogoca na vosa ni Turaga.¹¹ Tukuna o Peresitedi Nelson, “Na ivunau i Karisito e vukea meda kunea ka tudei tiko ena salatu ni veiyalayalati. Na tudei tiko ena salatu dodonu ka tuvai matau ena yaco me lavaki keda meda ciqoma na ka kece e nona na Kalou. E sega na ka e yaga vakalevu cake mai na taucoko ni ka e Nona na Tamada!”¹²

Ni da vakavakarau tiko yani ena Koniferedi Raraba ena vula mai qo, eda na rogoca vakadomolevu ka matata na domo ni parofita ni vosa vei keda. Na domodra ena sega ni vakarautaki ena kena rogo levu, okoya me da sogota laivi kina na rorogo kei vuravura ka vakanamata ki na veikaroni, veiliutaki, veivakalomavinakataki, kei na veivakayarayarataki ni Yalo Tabu.¹³ Na Mataveiliutaki Taumada, na Kuoramu Apositolo Le Tinikarua, Vakaitutu Raraba kei na Vakailesilesi Raraba ni Lotu, era na kacivi keda vakavuvale ka vakayadua, me da lako mai ka kana magiti ena vosa i Karisito.¹⁴ Veivosaki, marautaka ka vunauci Karisito,¹⁵ ena vukea na noda lako curuma na marau veivakurabuitaki¹⁶ koya lako mai baleti Koya. Sa ikoya na ivurevure ni marau.¹⁷