NODA TABANA
Oqo na Vanua Au Via Tiko Kina?
Noqu seqai yabaki 17, eso na noqu lewe ni matavuvale kei au a draiva mai Oakland, California ki Portland, Oregon me vaqarai ka kau mai e dua na motoka butakoci.
Ena levu ni loloma keitou vakila mai vua na Tamada Vakalomalagi dau loloma, keitou mai raica rawa kina na motoka kei na vugoqu gone yalewa, ena kaukauwa ni caka mana, a taqomaki vinaka tu.
Se cakacaka vinaka tiko na motoka, ia sa duka ga. Au sa marautaka dina na noqu samaka tiko, me vakarau draivataki lesu, ia na vakanananu vei ira era a butakoca ka vakaduka na neitou motoka—kei na mataqali bula veilecayaki era liutaka tu—e vakavuna meu tagi ena rarawa. E dredre dina meu kila na ibalebale ni so na itovo lolovira era dau kitaka na tamata ena nodra bula kei na ka e sega ni nodra. Sa dua na ka na noqu rarawa.
Sa sega niu waraka rawa meu lesu i California. Au kila ni balavu na vanua me keitou draiva lesu kina.
Na gauna me keitou sa biubiu kina, sa bera tiko ka qai loaloa. Neitou sa tiko ena gaunisala, sa vakasinaiti tikoga na noqu vakasama na neitou ilakolako qo. Au vakananuma mai na sala kece e vukei keitou kina na Tamada Vakalomalagi. Au nanuma mai na levu ni kerekere Vua ena gauna keitou draiva tiko kina e Portland kei na vakavinavinaka ena neitou gole lesu.
Noqu vakasamataka kece tiko oqo, au raica sara e dua na cina ramase, ka caudre vakabalavu ena dela ni butobuto ni vunikau, ena dua na vanua yawa mai na gaunisala keitou sa yaco tiko kina. Sa tekivu me luluvu na yaloqu ena yalo marau noqu vakasamataka tiko na cava beka na cina oqo. Ni oti e vica na miniti, neitou sa volekata yani ena cina, au qai liaca ni sa okoya sara beka qo na Valetabu e Portland Oregon!
Sa duatani noqu marau ena kena tukuni vei au, ni sa na keitou vagolea mada vakalailai—me vaqarai na valetabu. Au sa via raica dina! E yaluma na yaloqu meu tiko ena rara ni valetabu, meu vakila na totoka oqo ka wasea na veika oqo kei na noqu matavuvale.
Noqu sa draiva siviti ira tiko na vunikau, au rawa ni raica e dua na cina me vaka ga e tiko ena mua ni dua na qara butobuto balavu. E lade na utoqu ena marau kei na noqu sega ni waraka rawa.
Sa voleka sara tiko ki na valetabu, keitou raca sara e dua na gaunisala yaco koso sebera yani na bai ni valetabu, era sa kele tu kina na motoka. Ena yalo marau, au vaqara sara e dua na gaunisala meu draiva yani kina e loma ni rara ni valetabu.
Vakasauri, au vakila e dua na yalo rarawa ena noqu liaca ni sega walega ni se sogo tu na bai ni valetabu e lokataki saraga.
Totolo ga noqu kunea e dua na vanua meu vakelea kina na motoka, ena loma ni dua na miniti au sa tucake tu ena matani bai kaukamea—qumia tu ena matatagitagi—noqu raica toka yani na totoka kei na cecere ni vale vakatabui oqo.
Na vakanananu me da lokataki tu e tautuba ni bai e Lomalagi e vakadinati vei au ena gauna saraga oya.
Vuqa na taro e vakasinaita mai na noqu vakasama noqu tucake tu e kea ena bogi oya:
-
Sa ikoya beka oqo na vanua au na via tiko kina niu yaco ki lomalagi?
-
Au na via lokataki tu e tuba?
-
Tagica tu na noqu sega ni rawa ni curu rawa?
-
Ena dua beka e raica na noqu tagi ka na yalo loloma me vakacurumi au e loma?
-
Na cava meu cakava meu vakadinata kina ni oqo na veika ena sega ni yaco vei au ena bai ni lomalagi?
Au tagi tuga yacova neitou sa tiko tale ena gaunisala ka’u qai tagi tale valevu.
Na veika au vakila na bogi oya e sa bau kaukauwa. Noqu tomana tiko na noqu draiva, au vakasamataka tikoga na levu ni noqu tagi kei na veika au vakila ena bogi oya. E vakaukauwataka na noqu gagadre meu vinaka cake—meu solia na utoqu Vua ka cakacaka vakaukauwa meu muria na nona ivakaraitaki na iVakabula, o Jisu Karisito.
Sa tekivu meu lagasere ena noqu draiva tiko. Noqu tekivu lagasere, sa tekivu sara me vakatawani na yaloqu ena vakacegu kei na lomavinaka. Au kila ni veika au lako curuma oqo ena solia e dua na sere vou e dua na sere au vola oti ena noqu draiva tiko. E dua na sere ena laveta cake ka veivakauqeti. Na sere me baleta na valetabu. Na noqu sere ni valetabu.
Oqo na sere:
Au laki raica na valetabu.
Ka’u kurabui niu raica,
na vatuka tabu ka vakalou
Ena utoqu, au rogoca na domo lailai
ka vosa vakamalumu vei au,
tukuna mai, “Rai e loma ka raica na ka o na kunea.”
Oqo na vanua au via tiko kina?
Meu rai ki loma mai tuba?
E sega ni donu vei au na vakila oqo.
Au via tiko e loma ni tadrua ni lalaga,
e tiki ni veika au raica
Noqu tucake tu ena bai ena loma ni bogi oya
raica tu yani e levu beka se sega ni’u raica
na vatu mavolo, e viribaita tu na Nona iloloma
E dua na taro e lako mai ena noqu vakasama
Se sega niu se vakasamataka e liu,
Sa ikoya beka qo na matanitu e lomalagi?
O koya au vinakata meu lewena
na marau tawamudu oya
koya e yalataki ena matanitu nei Tamada.
Ia kevaka au sega ni vakarautaki au qo
meu ciqoma na veivakalougatataki e maroroi tu,
Au na sega ni kunea na vakacegu oya mai vei dua tale.