NODA TABANA
Era Lagasere kei Keda na Agilosi
Dua na mataka ni SigaTabu ena koniferedi ni Iteki e Papatoetoe Okaladi, ena Epereli 2021, era vakasokomuni ena valenilotu lala e Massey Park na lewenisere ka vakasinaita na yatu dabedabe ena dakuni vatavata ni vosa me i otioti ni nodra vulisere. Ni bera ni oti e veimama na aua, sa vakarau me lagati na sere taumada, me sureta na Yalo Tabu ka tuvanaka na irorogo e ganiti ena iotioti ni soqoni ni koniferedi.
Ena piano, au waraka meu kiu taki. Neimami daunisere, Brother Moroni Westerlund e vakarautaki ira na matasere qai yalova mai na imatai ni domo vei ratou na matasere . . . sa dua na ka na noqu rarawa. Sa vaka vula na neitou vakatovotovo tiko mai, se sega ga ni maucokona na sere oqo ena vanua e dodonu me yaco kina.
Ena dela ni rogorogo ni piano, au se rogoca ga e vuqa na domo sebera ni macala tu. Au rogoca eso na tikina me sa seyavu yani ena so na iwase ni sere ni ra sega ni kila vinaka, kau sa masu sara ena noqu vakasama: “Io Tamai Keimami. Keimami sa sasaga dina vakaukauwa.”
Sa tomani sara tiko na itioti ni vakatovotovo, au sa lei nanuma lesu na vakavakarau kece a vakayacori me baleta na siga nikua. E marau na neimami Bisovi na ciqoma na itavi ni matasere ena iteki, ena yalo ni vakabauta ena nona tabanalevu. Na kodineita ni matasere o Sister Benjy Maugatai, a kauta mai na daunisere kei na daunipiano, biutavata na sere ka qai tuvanaka na vulisere. Keitou digia na sere totoka ka rawarawa baleta ni keitou kila ni lewe vica ga ena neitou tabanalevu erawa ni wilika na sere, ka vuqa e se sega ni lagasere ena dua na matasere e liu.
Io era lako mai. Dina ga ni vuqa e tu na nodra osooso, a qai lei yaco me dua na matasere levu sara, e voleka tale ni oso ena vatavata ni sere, qai vuqa na gauna ni neimami vulisere.
E matata sara tu ga ni na sega sara ni vakasakiti na neitou matasere, io vei Brother Westerlund, bibi ga me ra marau tiko na lewe ni matasere, ka ra solia tiko na nodra igu, “sa rawa ni ra mai lagasere,” e dau kaya okoya.
Sa keitou mai vakacavara sara na iotioti ni sere veivakayalolailaitaki, au raici Brother Westerlund. E mata dredre mai o koya ka qai vosa vei ira na lewe ni matasere ena iotioti ni gauna.
“Eda lagata tiko na sere oqo sega ni baleta na kila maqosa,” tukuna o koya, “ia baleta tiko na noda na wasea noda ivakadinadina. Ni o sa lagasere tiko, nanuma tiko ni e dua ena loma ni valenilotu e gadreva me vakila na yalomu kei na nomu vakabauta. Oya na noda itavi dina nikua.”
Sega ni bera sa tekivu me sinai na loma ni valenilotu, ka yaco sara ena lalaga e muri. Nodra sa dabe sobu ga na iliuliu ni iteki kei na wasewase sa yalova sara na matasere o Brother Westerlund me ra tucake na matasere.
Au sa tekivuna sara meu tabaka na piano me lagati na sere taumada, na gauna e lagata mai kina na matasere na imatai ni noti ni sere, au sega ni vakabauta na ka au rogoca e daligaqu. E rogo sinai, kaukauwa, qai veisotari na domo! Au rai cake sara mai na tabana ni sere ena qoroqoro. “Ocei e lagasere tiko?”
E dina sara, ni sai oqo na lewe ni matasere vata ga, na lewe ni tabanalevu yalovakabauta, ia me vaka ga na makare ni cadra ni matanisiga koya e curu basikata mai na ilati ni valenilotu, au rogoca vakaidina e dua na lewe ni matasere sega ni laurai, dau lagasere, ka era vakaqaqacotaka na matasere. Sa totoka dina na domo ni sere taumada. Na sere e rua ka tarava e tautauvata na kena totoka, vakatalega kina na yalo e vakilai raraba ena soqoni oqo.
E sega ni o au duadua ga e vakila na caka mana ena siga oya. E dua vei ira na domo tena—o Desmond Maugatai—a qai tukuna malua vei au, “Au rawa ni tukuna noqu vakadinadina . . . na gauna sa keitou tekivu lagasere kina, au rogoca e rua tale na domo vou, e dua ena tabaqu imawi, ka dua ena tabaqu imatau, ka sega niu kila me rau leweni matasere.”
O Kayla Tagavaitau yabaki tinikarua e wasea e dua na vakila vata oya vei tinana. Se qai matai ni gauna me lewena na matasere ni tabanalevu, qai oti na koniferedi e tukuna o koya, “Na, au vakila ni gauna keimami lagasere tiko kina, era a lagasere vata tiko kei keimami na Agilosi.”
Au sa lewena e vuqa na matasere ni lotu ena vica na yabaki sa oti, io koya qo qai vakadeitaka vei au e dua na matana au dau raica vakalevu. Ni da solia na noda igu taucoko ena kena vulici na sere, ni da saga kaukauwa me da dinata na noda tiko ena vulisere, ni da sega ni guce se mani vakacava na ibolebole kei na veivakayalolailaitaki, ni da “cakacaka vagumatua” se mani vakacava na noda malumalumu, “ni sa oti sara na veika kece eda rawa ni cakava,” (2 Nifai 25:23), Tamada Vakalomalagi ena vakataucokotaka na noda sasaga lalai, “ia na nona loloma soli wale, dou sa vakataucokotaki kina ena vukui Karisito” (Moroni 10:32).
E rawa madaga me tala mai na Nona agilosi me ra lagasere vatakei keda.