Ua Ofo Mai e le Faaola ia i Tatou le Faamoemoe

I le avea ai ma se fomai o le mafaufau, e fesiligia au i taimi uma, “E te fiafia moni lava i lau galuega? E te le tau faalogo ea e uiga i le tiga, leiloa, ma le lototiga?” E ui e moni ou te savali i le pouliuli faatasi ma i latou ou te fesoasoani i ai, ae tatou te le tumau ai iina. Ua ia te au le avanoa e vaavaai ai i suiga o o latou olaga e ala i le mana o le Faaola o Iesu Keriso, aemaise lava i latou o loo i le polokalama o le toe faaleleia mai vaisu (tagai i le itulau 12).

E ui o le tele o luitau tatou te feagai e mafai ona lofituina, ae ua ofo mai e le Faaola ia i tatou le faamoemoe—faamoemoe e mafai ona tatou maua le filemu i le lotolotoi o o tatou tauiviga ma faamoemoe e mafai ma o le a faamaloloina i tatou.

O se tasi auala e fesoasoani ai le Alii ia i tatou ia maua le filemu ma le saogalemu e ala mai i Lana perofeta (tagai i le itulau 4). E ala mai ia te ia, ua tuuina mai ai e le Alii le fautuaga ma le taitaiga e faatatau i luitau o loo feagai ma i tatou taitoatasi i o tatou aso. Ua faamanuiaina a‘u lava ia e ala i le ua’i atu i le fautuaga a Peresitene Russell M. Nelson e pei ona ia uunaia ai i tatou ia faateleina lo tatou gafatia e maua ai faaaliga, ia faamuamua le Atua i o tatou olaga, ma maua le olioli i le salamo i aso taitasi.

O le taimi nei ua sili atu nai lo se isi lava taimi, tatou te manaomia le taitaiga a le Alii e faatoilalo ai ma taulimaina le tele o luitau tatou te feagai. Po o le a lava se luitau o feagai ma oe, o la‘u tatalo ia e maua le faamoemoe i le Faaola ma lagonaina Lona alofa mo oe.

Benjamin Erwin

Pule o Polokalama Toe Faaleleia Mai Vaisu