Fafagaina e Taupousa

Saunia e Michael R. Morris, Mekasini a le Ekalesia

Sa ma mafaufau po o le a se tala a le au taupousa Katoliko pe a ma fesili atu mo la latou fesoasoani.

Ata

ipu kuki

Sa ma fiafia lava ma la‘u soa e tatala se eria fou mo le galuega faafaifeautalai i se taulaga laitiiti i laufanua i sisifo o Kuatemala. Peitai, e lei leva ona ma taunuu, ae amata ona faasalalau e taitai ma tagata o ekalesia i le lotoifale ni tala sese e uiga ia i ma‘ua. O le taunuuga, na amata ona fefefe tagata ia i ma‘ua.

Ae sa ma tumau pea ma Elder Todd Hinkins i le faamoemoe, ae maise lava ina ua uma ona malilie ni aiga se toatolu e auai i se fale tatala e uiga i le Ekalesia. Ina ia fesoasoani e faailoa atu i latou i le talalelei, sa ma fuafua e faaali atu ia i latou ni ata malamalama e uiga i le Toefuataiga.

Peitai, ina ua ma faataitaia le ma masini mo ata malamalama ao lei faia le matou fonotaga, sa pa le matauila o le masini faaali ata malamalama. O le tulaga le mautu o le eletise na foliga mai na faaleagaina ai le ma masini faatonutonu o le eletise. Sa le mafai ona toe faaliliu le malosi e 220 o le eletise i le 110 na ma manaomia e ola ai la ma masini faaali ata malamalama.

“O le a nei la?” sa ma faanoanoa tele ma la‘u soa.

Sa ta‘u mai e Brother Chavez, na o le pau lea o le tagata o le Ekalesia sa nofo i le taulaga, e faapea sa ia manatu o taupousa i le taulaga e i ai se latou masini faaliliu eletise. A o alu atu Uso Chavez i le aai lata ane o Quetzaltenango e aumai se isi matauila, sa fai se ma tatalo ma savavali atu i le aai o taupousa i le lotoifale.

Sa ma tuitui, faailoa atu i ma‘ua lava, ma faamatala atu lo ma faafitauli, ma mafaufau pe o le a se tala o le a fai mai e tuafafine. E aunoa ma le faatuai, sa latou tuuina mai ia i maua le latou masini faaliliu eletise ma faamanuia mai. E lei umi ae toe foi mai Uso Chavez, ma sa fai le matou fonotaga.

Ina ia faafetai i taupousa, sa ma faia ma Elder Hinkins ni kuki mo i latou. E lei leva ona uma ona matou momoli atu kuki, ae faateia i ma‘ua i le valaaulia a taupousa mo se taumafataga o le afiafi.

Sa ma taliaina.

I ni nai aso mulimuli ane, sa ma saofafai ai ma Elder Hinkins i lalo mo le taumafataga o le afiafi i se laulau na matagofie lona faatulagaina e siomia e taupousa e toafitu. E toalima e mai Kanata, o le tasi e mai le Iunaite Setete, ma o le tasi e mai le Aai o Kuatemala.

I le taimi o le taumafataga o le afiafi sa ma tau atu ai ia i latou e uiga i le Ekalesia toefuataiina ma la ma galuega o ni faifeautalai faamisiona. Ona ma tuuina atu lea ia i latou se Tusi a Mamona ma tuuina atu a ma molimau e uiga i ai. Sa latou faafetai mai ma faamalo mai ia i ma’ua i a ma taumafaiga e aumai tagata ia Keriso.

Sa latou faamatalaina nisi o “faatulagaga” eseese o taupousa. Ona latou tau mai lea ia i maua e uiga i a latou galuega ma fetuunaiga i le nonofo ai i laueleele maualuluga.

Faatasi ai ma se vaaiga fou, sa ou vaaia ai taupousa o ni agaga e i ai sini masani, manaoga, ma luitau. Sa latou auauna atu i isi, ositaulaga mo lo latou faatuatua, ma le tuuto atu o o latou ola i le Atua.

Ma le matou taumafataga o le afiafi? O le taumafataga sili lea na ou maua i lena tausaga—na faasoa mai e a ma uo, o tuafafine mai le Ekalesia Katoliko.