Mo Matua

Tatou te Mulimuli ia Iesu Keriso ma Lana Perofeta

Matua Pelē,

Ua faamanuia i tatou e le Atua i se perofeta soifua e mauaina faaaliga ma taiala Lana Ekalesia i le lalolagi. O lenei lomiga o le mekasini e mafai ona fesoasoani ia te oe e aoao ai lau fanau e uiga i auala e mafai ona tatou mulimuli ai ia Iesu Keriso ma Lana perofeta. E mafai foi ona e faaaoga manatu o loo i lalo e fesoasoani ia te oe e amata ai talanoaga e uiga i galuega o le malumalu ma le taua o aufono faaleaiga.

Talanoaga o le Talalelei

Mulimuli i le perofeta

Faitau ni nai upusii mai le tusiga a Elder Holland o loo i le itulau 4 e uiga i le mulimuli i le perofeta. Valaaulia lau fanau e faasoa mai auala latou te filifili e mulimuli ai i le Alii ma Ana perofeta. E mafai foi ona outou usuina faatasi o se aiga le “Mulimuli i le Perofeta” (Tusipese a Tamaiti, 58).

Fefautuaai Faatasi

O le tusiga i le itulau 40 e mafai ona fesoasoani ia te oe e aoao atili ai e uiga i le mamanu a le Atua mo aufono. Faatulaga se taimi e fai ai se fonotaga faaleaiga—pe i le taimi o le taumafataga faaleaiga, afiafi faaleaiga, po o se isi lava taimi talafeagai mo lou aiga—e faafaigofie ai se talanoaga tatala ma lau fanau e faatatau i mea latou te manaomia ai le fesoasoani ma mea e mafai ona latou fesoasoani ai ia te oe. Talanoa i luitau ma fefautuaai faatasi ina ia maua ni vaifofo.

Auai i Galuega o le Malumalu

Faaaoga le tusiga a Elder Mutombo i le itulau 44 e aoao ai lau fanau e uiga i le taua ma faamanuiaga o le malumalu. I le faaaogaina o le FamilySearch, galulue faatasi o se aiga e saili lou talafaasolopito o aiga ma, afai e mafai, saili ni igoa e ave i le malumalu.

Mea Faafiafia Faaleaiga o leSau, Mulimuli Mai ia te A’u

Faalogo ia te Ia

1 Samuelu 3:1–10

Na faalogo Samuelu i le siufofoga o le Alii a o laititi o ia ae na te lei iloaina i le taimi muamua. Faataitai le gaoioiga lenei e aoao ai e uiga i le faalogo:

1. Fusi mata o se tasi pe fai atu ia i latou uma e moeiini mata.

2. Mai se isi potu, o le a ta‘u mai e se tagata o le aiga le igoa o le tagata o loo fusi mata.

3. Afai e mafai e le tagata o loo fusi mata ona mate mai po o ai na tautala, o le a tuu atu e le tagata o loo tautala ni faatonuga e fesoasoani ai i le tagata o fusi mata e sue o ia.

4. Feauauai i le avea ai ma tagata o loo fusi mata ma le tagata o loo ta‘uina le igoa.

Talanoaga: E mafai ona tatou faalogo i le siufofoga o le Alii i tusitusiga paia, le malumalu, ma aoaoga a perofeta soifua. E faapefea ona e lagonaina Lona siufofoga? Faitau pe faalogologo i le saunoaga a Peresitene Russell M. Nelson o le konafesi aoao ia Aperila 2020 “Faalogo ia te Ia” ma vaavaai mo auala e mafai ona tatou faalogo lelei ai i le siufofoga o le Alii i o tatou lava olaga. Talanoa e uiga i le auala e mafai ai e outou o se aiga ona “faalogo ia te Ia.”

Na auina mai e Mitzi Schoneman

Taaloga Lagolago a le Aiga

Ruta 1–4

Ina ua avea Ruta ma fafine ua oti lana tane, sa ia filifili e nonofo ma lona tina faaletulafono, o Naomi, nai lo le toe foi atu i lona nuu, “aua o le mea e te alu i ai, ou te alu i ai; ma o le mea e te nofo ai, ou te nofo ai: o lou nuu e fai mo‘u nuu, ma lou Atua lo’u Atua” (Ruta 1:16).

Sa lagolagoina e Ruta ia Naomi e ala i le nonofo faatasi ma ia. Faataitai le gaoioiga lenei e aoao ai e uiga i le lagolagoina o le aiga:

1. Filifili se tagata o le aiga ma ia tutu e feūa’i papatua. Tuu soo se mea faitino (se tamai polo po o se tusi) i le va o papatua o le tasi ma le isi.

2. I le galulue ai o se ‘au, vaai pe fia ni laa e mafai ona outou faia faatasi e aunoa ma le pa’ū o le mea faitino.

3. Ia feauauai o se aiga seia maua e tagata uma se avanoa e galulue ai o se au e fesoasoani le tasi i le isi.

Talanoaga: Na faapefea ona fesoasoani Ruta ma Naomi i le tasi ma le isi? Sa talitonu ma faatuatua Ruta i le Tama Faalelagi, o lea sa nofo ai o ia ma Naomi. Na faapefea ona faamanuiaina o ia? E faapefea ona tatou lagolagoina le tasi ma le isi ma faalagolago i le Alii pe a i ai ni o tatou faigata?

Na auina mai e Lisa Thomas

Mai le Mekasini Mo Le Malosi o le Autalavou

Aloese mai Moli o le Ava ma le Sailiga mo le Malamalama

Faitau se savali mai ia Elder Dieter F. Uchtdorf e uiga i le vaaia o le upumoni e tele atu ma aloese mai faafitauli e ala i le mulimuli i le perofeta a le Alii.

Tamaitai o le Faatuatua

Aoao po o a mea ua aoaoina e tamaitai talavou i ona po nei mai faataitaiga a tamaitai o le Feagaiga Tuai.

Lē Matata’u Faatasi

Vaai pe na faapefea i le filifiliga a Ruta e pipii atu iā Naomi ona faaalia ai le lototele ma le faamaoni.

Fesoasoani i le Autalavou e Tali le Valaau a le Alii

Vaai pe mafai faapefea ona avea le autalavou e pei o le perofeta o Samuelu ma tali atu i le valaau a le Alii i le taimi nei ma i le lumanai.

Mai le Mekasini o Le Uo

Lima Fesoasoani i le Lalolagi atoa

Feiloai i le ma uo o Septream mai Kemupotia! Ona fesoasoani lea i lou alo e fai le lui o lima fesoasoani o lenei masina.

O Lo’u Tino o se Faamanuiaga

Saili tala ma gaoioiga e fesoasoani e aoao ai tamaiti pe aisea e taua ai o latou tino ma pe faapefea ona latou tausia i latou.

Fesoasoani i le Sau, Mulimuli Mai Ia Te A’u

Saili se tala faatusi paia, kata e mafai ona ao mai, manatu mo afiafi faaleaiga, ma isi mea i le vaega o le Sau, Mulimuli Mai ia te A‘u i lenei masina.

Tamaitai i le Tusi Paia

Fai faatasi lenei gaoioiga e aoao atili ai e uiga i tamaitai i le Feagaiga Tuai.

Sailiga Oa a le Aiga

Fesoasoani i lou alo e sue se oa o talafaasolopito o aiga e tuu i totonu o a latou pusa o oa po o luga o le FamilySearch.