O Leo o le Au Paia o Aso e Gata Ai

O Tatalo i Peru

Saunia e Emily L. Johnson-Howsley, Iuta, ISA

Ina ua tatalo le faifeautalai faamisiona mo au i lou igoa, sa ou aoaoina se lesona mamana.

Mo le tasi le tausaga, sa ou aoao atu ai le faaPeretania o se gagana lona lua i le Universidad de Piura, i Piura, Peru. O Piura o le laumua lea mo le Misiona a Peru Piura.

O le peresitene o le misiona, o Chad Rowley, ma lona faletua, o Lisa, sa nonofo i la‘u uarota. Sa la fai mai ou te tuuina atu ni lesona faaPeretania i faifeautalai o loo auauna atu i Piura. Sa ou taliaina.

I le faaaogaina o le polokalama faaleaoaoga a le Ekalesia mo le gagana Peretania, ou te feiloai ai i vaega eseese o faifeautalai i le ofisa o le misiona e aoao i latou i le faaPeretania. O se aafiaga faaleagaga maoae mo au le galulue faatasi ma faamasani i faifeautalai mai Amerika i Saute ma le Iunaite Setete. O aoauli o aso o le vaiaso e sili ona aoga aua o le aai sa matele ina filemu mo le galuega faafaifeautalai seia oo i le afiafi po.

I le taufaaiuiuga o lo‘u taimi i Piura, sa ou lagonaina le ma’i manatu i le aiga ma vaivai faalelagona ma faalegaluega. I se tasi aoauli o le Aso Faraile, sa ou lagonaina ai le vaivai ma le faanoanoa. Sa ou faamoemoe o le a le oo ni vasega ona o le galuega faafaifeautalai, lea na faamuamua i lesona faaPeretania. Peitai, i lena aoauli, e le o le tulaga lena.

Sa tuai ona ou tuua lo‘u fale ma savali faatosotosololoa atu i le ofisa o le misiona. A o ou savali atu i se paka i le ala, sa ou tatalo. Sa ou ta‘u atu i le Tama Faalelagi sa le mafai ona ou toe onosaia se isi minute se tasi, pe tasi foi se vaiaso. Sa ou vaivai faalemafaufau ma faaletino, ma sa ou manaomia Lana fesoasoani.

Sa ou taunuu atu i le ofisa o le misiona ma alu i le falealuga e faatali mo faifeautalai. Ina ua latou taunuu mai mo le latou lesona, sa ou le iloa po o le a le mea e aoao atu ia i latou. Ae ina ia amata, sa ou fai atu i se tasi o faifeautalai e fai se tatalo amata i le faaPeretania.

Ina ua amata ona tatalo le faifeautalai, sa ia fai mai, “Faamolemole faamanuia Sister Johnson.” Ona ia taofi lea. Ina ua ia faaauau, sa ia faaopoopo mai, “Faamolemole faamanuia o ia e faaauau pea i le malosi lava e tasi e pei o le amataga.”

Sa lei iloa e lena faifeautalai sa ou tatalo mai le auala i le ofisa o le misiona, ma e mautinoa lava na te lei iloaina le mea sa ou tatalo ai. Ae sa faia e le Tama Faalelagi, ma sa Ia tali mai i lena tatalo e ala i le faamalosia o au.

O lena—o se tagatanuu IS i Peru o lē sa tatalo i ai i lona igoa se faifeautalai mai Polivia. E maeu lena tatalo faamalolo i lena aoauli i le ofisa o le misiona. Ma o se lesona mamana na ou aoaoina i lena aso. Po o ai lava po o fea foi o tatou i ai—e faafofoga ma tali mai le Tama Faalelagi i a tatou tatalo tautalagia ma lē leoa.