“Faataalise atu i le Malumalu,” Liahona, Iuni 2022.
O Leo o le Au Paia o Aso e Gata Ai
Faataalise atu i le Malumalu
E faapefea ona tatou gafatia ona o i le malumalu ae tau le lava a matou meaai?
Ata pue o le Malumalu o São Paulo Pasila na pueina e Matthew Reier
A o avea au ma se epikopo, sa talosagaina e lo matou peresitene o le siteki ia epikopo o le matou siteki e fai se faataitaiga mo tagata o a latou uarota e ala i le faia o le ositaulaga ina ia faamauina i le malumalu. I lena taimi, sa feagai Polivia ma se faafitauli ogaoga o le tamaoaiga. Ona o le siitia o tau o oloa, o le tau o oloa i le taeao o le a siitia maualuga i le aoauli.
“E faapefea ona tatou gafatia ona o i le malumalu pe a tau le lava mea tatou te aai ai?” Sa ou fesili atu ai i lo‘u toalua, o Alicia.
“Ou te le iloa,” sa ia tali atu ai, “ae o le folafolaga a le Alii fai mai o le a Ia foai mai” (tagai Mataupu Faavae ma Feagaiga 118:3).
E ui lava i lo ma tulaga tautupe, sa ma lagonaina uma le manaomia ona vave o atu i le malumalu. Sa pei na tau mai e le Agaga ia i matou, “Faatopetope, faatopetope!”
Ia Tesema 1981, o le Malumalu o São Paulo Pasila—toeitiiti 2,000 maila (3,220 km) le mamao—sa na o le pau lea o le malumalu i Amerika i Saute. Ina ia totogi le malaga i le vaiaso atoa, sa ou faia ai se nonogatupe e $1,000. Sa tele naua lena tupe, ae sa matou iloaina o le ositaulaga o le a aoga.
Ina ua mavae se tietiega umi i le pasi i le tuaoi o Pasila, sa matou o atu i se nofoaafi i São Paulo. Sa leai ni nofoa avanoa o le nofoaafi, o lea sa tatau ai ona matou nonofo i se alasavali ma le ma fanau laiti e toalua. Sa faasolo ina leai ni a matou meaai, ae sa foai mai tagata ese ia i matou. Ina ua matou taunuu atu i São Paulo, sa toetoe lava a leiloa le ma tama tama laitiiti i le aualasavali e iai nofoaafi.
Ina ua mavae nei luitau ma isi luitau, sa iu ina matou taunuu i le nofoaga o le aualasavali e lata ane i le malumalu. A o matou ulufafo atu, sa mafai ona matou vaai mamao atu i le faatagata o le agelu o Moronae i luga o le malumalu. Sa matou faapauu ifo i o matou tulivae ma faafetai atu i le Tama Faalelagi. Ina ua matou taunuu i ni nai minute mulimuli ane, sa faafeiloai ma le alofa i matou e le peresitene o le malumalu.
I le amataga o le aso na sosoo ai, sa maua ai o ma sauniga ma faamauina o se ulugalii ma se aiga. I lena afiafi, sa matou lei iloaina muamua, na tapunia ai le malumalu mo le taimi atoa o totoe o le tausaga mo le toe faaleleia.
Ana faatuai la matou malaga atu i le malumalu, semanu e sili atu le tau o le matou malaga nai lo le mea na matou nonoina mai. Pe ana matou taunuu i le vaiaso na sosoo ai, semanu e tapunia le malumalu. Matou te faafetai ona sa musuia i matou e le Alii e faatopetope i le malumalu.