O Le Ofusa o le Malumalu: O Se Faamanatu Paia o le Alii o Iesu Keriso

Saunia e le Aufaigaluega o le Matagaluega a le Malumalu

O le ofusa o le malumalu e faasino atu ai i tatou ia Iesu Keriso ma Lana matafaioi tutotonu i lo tatou faaolataga ma le faaeaga.

Ata

Atamu ma Eva i le Faatoaga o Etena

Ata na tusia e Carolyn Vibbert

Pe na e ola a‘e i le Ekalesia pe auai mulimuli ane i le olaga, atonu na e faalogo e uiga i ofusa o le malumalu ae e te lei alu moni lava oe i le malumalu. Ae o le iloaina e uiga i le ofusa ma le malamalama i le taua o le ofusa o ni mea eseese ia e lua!

O le ofusa o le malumalu e le tutusa ma ofu laiti masani. O le laeiina ma le faamaoni o lenei laei paia e valaaulia ai le mana faaleatua i o tatou olaga aua e faamanatu mai ai ia i tatou ia ola atoatoa atili i le talalelei.

Pe ua e mafaufau ea pe aisea e tuuina atu ai laei paia ia i latou o e ulu atu i feagaiga ma le Atua i totonu o le malumalu? O nisi nei o vaega e mafaufau i ai.

O Se Mamanu o Faamanatu Paia

I le aluga o taimi, ua tuuina mai ai e le Atua i Ana fanau ni mamanu eseese, faiga, ma sauniga e fesoasoani ia i tatou e manatua ma faalolotoina ai la tatou sootaga ma Ia. E mafai ona aofia ai vaega nei:

O le aso Sapati: o se aso e malolo ai ma tapuai—o se aso e tuuto atu i le faamamaluina ma le manatuaina o Ia (tagai Esoto 20:8–11; Mataupu Faavae ma Feagaiga 59:9–13).
Paseka: o se sauniga mamalu ae fiafia e faamanatu ai i tagata Isaraelu lo latou laveaiina mai le nofo pologa i Aikupito ma faasino atu i latou ia Iesu Keriso, o le ua tuuina mai le laveaiga faaleagaga mo tagata uma (tagai Esoto 12–13).
O le faamanatuga: o se sauniga paia na faatuina e Iesu i le faamanatuina o Lana taulaga togiola (tagai Mataio 26; Mareko 14; Luka 22; 3 Nifae 18). E ala i lenei sauniga, e faafou ai foi e tagata o le Ekalesia ia feagaiga na latou osia ma le Atua.

O nei mea taitasi e avea o se faamanatu e faasino atu ai i tatou i le Atua. I se auala foi faapena, o le ofusa o le malumalu e avea o se faamanatu moni o la tatou sootaga faafeagaiga ma le Atua le Tama, ua mafai ona o Lona Alo, o Iesu Keriso. O le ofusa o se ufiufi mo foafoaga aupito sili ona paia a le Atua: o Ana fanau.

Ua taua e le Au Peresitene Sili, “O se avanoa paia le laeiina o le ofusa ma o le faia o lea mea o se faailoaga vaaia lea o se tautinoga i le loto e mulimuli i le Faaola o Iesu Keriso.”¹ O taimi uma tatou te auai ai i se sauniga faaleperisitua, auauna atu i isi, auai i tatalo, pe suesue i le talalelei, mo se faataitaiga, ua tatou faaali atu se “faailoaga i fafo” o a tatou lava tautinoga faaletagata lava ia e mulimuli i le Faaola. E ui e le o vaaia le ofusa o le malumalu i le lalolagi, ae o le laeiina ma le faamaoni e mafai ona tuuina mai ai se faamanatu faifai pea i le tagata e laeiina o feagaiga paia o le malumalu e osia ma le Atua—o se faatusa o lo tatou manao ia avea ma tagata ua silafia e le Atua e mafai ona avea ai i tatou.

O le faamamaluina ma le faamaoni o feagaiga o le faaeega paia, tatou te saunia ai e maua le meaalofa taua o le faaeaga i le malo o lo tatou Tama Faalelagi. Ua faamanatu mai e le ofusa ia i tatou e mafai ona tatou tuu ese le tagata natura ma avea ma se Tagata Paia e ala i le Togiola a Iesu Keriso (tagai Mosaea 3:19).

O Le Pa‘ū ma le Folafolaga o se Faaola

E mafai ona tatou aoao atili e uiga i le faatusa o le ofusa o le malumalu e ala i le suesueina o fegalegaleaiga a le Atua ma Atamu ma Eva. Ina ua uma ona aai i le fua faasaina, sa lagona e Atamu ma Eva le maasiasi i le mafaufau e tutu i luma o le afioaga o le Atua. I le iloaina sa la’ua le lavalava, sa la faia ni ufiufi i lau o le mati ma lalafi i la’ua lava. (Tagai i le Kenese 3:1–8.)

Ae ina ua silafia e le Atua mea na la faia, Na te lei tuulafoaiina i la’ua pe tuua e aunoa ma le faamafanafanaga. A o feagai Atamu ma Eva ma mea moni o le oti faaleagaga ma le faaletino, sa aoaoina i la’ua e le Atua e uiga i le toefanauina faaleagaga ma le meaalofa o le ola e faavavau, e avanoa mo Ana fanau uma. “Faalogo mai i lo‘u leo,” na fetalai mai ai le Atua, “ma talitonu, ma salamo i au solitulafono uma, ma papatiso, i le vai lava, i le suafa o lo’u Atalii e Toatasi na Fanaua, o lē ua tumu i le alofa tunoa ma le upumoni, o Iesu Keriso lea, le suafa lava lea e tasi o le a tuuina atu i lalo o le lagi, lea o le a oo mai ai le olataga i le fanauga a tagata” (Mose 6:52).

Na amata e Atamu ma Eva la la’ua malaga i lenei lalolagi pa’u i le malamalama e uiga i le Faaola, faatasi ai ma se valaaulia e o mai ia te Ia, ma faatasi ai ma le mauaina o Lona mana togiola. Sa la ulu atu i feagaiga ma le Atua ma sa tuuina atu i ai “ofu pa‘u” na faia e le Atua lava Ia e faamanatu atu ai ia i la’ua na feagaiga (Kenese 3:21; Mose 4:27).

A o tatou auai atu i le malumalu, e faaeeina i tatou i le mana ma ulu patino atu i feagaiga ma le Atua. O le ofusa o se faailoga o le puipuiga na maua e Atamu ma Eva ma tatou te maua ma o se faamanatu o nei feagaiga paia.

O Se Tautinoga Faafaatusa e Mulimuli ia Iesu Keriso

Na folafola mai e Peresitene Russell M. Nelson o le “laeiina o le ofusa o le malumalu e loloto lona taua faafaatusa. E faatusa i se tautinoga faifai pea.”² E aofia ai le tautinoga a le Atua e saunia se Faaola mo Ana fanau (tagai Moronae 10:33), faapea foi ma la tatou lava tautinoga e talia Iesu Keriso o lo tatou Faaola ma le Togiola.

A o tatou faamamaluina feagaiga o le malumalu ma ofuina ma le faamaoni le ofusa, ua folafola mai ia i tatou faamanuiaga o le puipuiga mai faaosoosoga ma mea leaga. Tatou te olioli i se faamanatu faifai pea e finagalo lo tatou Faaola e faamama i tatou mai a tatou agasala ma fesoasoani ia i tatou e faatoilalo a tatou agasala faaletagata lava ia, vaivaiga, le fiafia, ma tiga.

Mo Atamu ma Eva, o le ofusa na avea o se faatusa o le la sootaga ma le Atua ma saunia se faamanatu o feagaiga na mafai ai ona la maua le tele o faamanuiaga a le Atua mo Ana fanau faamaoni. A o tatou faatautaia luitau ma tofotofoga o le olaga faaletino, e mafai ona fesoasoani le ofusa tatou te manatua ai Iesu Keriso, faapelepele i a tatou feagaiga o le malumalu, ma tumau mausali i la tatou tautinoga ia agavaa mo faamanuiaga o le ola e faavavau.