O le a le Mea e Tupu i Sauniga a le Ekalesia i Aso Sa?

Ata

o ni tamaitai e toalua o loo feopoopoa’i

E faapotopoto tagata O Le Ekalesia a Iesu Keriso o le Au Paia o Aso e Gata Ai i Aso Sa taitasi e tapuai i le Atua ma aoao e le tasi le isi i le talalelei a Iesu Keriso. E talia tagata uma e auai, ma o le a maua e tagata o le ekalesia le avanoa e tatalo ai, tuuina atu lauga, ma aoao atu lesona pe a latou mananao ai. O nei fonotaga e fesoasoani i tagata o le ekalesia e faamalolosia ai le tasi ma le isi i le faatuatua ma ia “lalagaina faatasi o latou loto i le lotogatasi ma le alofa” (Mosaea 18:21).

Sauniga Faamanatuga

Ata

tamaitiiti i se nofoa faataavalevale o loo tufaina le faamanatuga

E faapotopoto tagata o le uarota po o le paranesi i Aso Sa taitasi mo le sauniga faamanatuga. (E talia foi i latou e le auai i la tatou faatuatuaga.) E tuuina atu le faamanatuga i tagata o le ekalesia i le taimi o lenei sauniga e fesoasoani ai ia i latou ia manatua Iesu Keriso (tagai i le tusiga o Aoaoga Faavae o le Talalelei ia Aperila 2022 mo nisi faamatalaga e uiga i le faamanatuga). O le sauniga e aofia ai foi tatalo, musika tapuai, ma lauga e tuuina atu e tagata o le ekalesia e uiga i le talalelei a Iesu Keriso.

Isi Sauniga

Ata

teineiti ataata e toalua i le lotu

A maea le sauniga faamanatuga, e tuueseese tagata o le ekalesia i vasega ma korama. O tamaiti ua ta‘i 18 masina e oo i le 11 tausaga e auai i le Peraimeri. I Aso Sa muamua ma lona tolu o masina taitasi, e auai uma isi tagata o le ekalesia i le Aoga Sa. I Aso Sa lona lua ma lona fa, latou te auai i sauniga a le Aualofa, Tamaitai Talavou, po o korama a le au perisitua.

Tatalo

O tatalo i sauniga a le Ekalesia e tuuina atu e tagata o le ekalesia. O tatalo e faigofie ma taitaia e le Agaga Paia. E tatalo tagata o le Ekalesia e faaaoga ai upu e faailoa atu ai le alofa ma le faaaloalo mo le Tama Faalelagi. E aofia ai le faaaogaina o soānauna o le Thee (Lau Afio), Thy, Thine , ma le Thou pe a faalagi o Ia.

Lauga

E talosagaina e se tasi o le au epikopo po o le au peresitene o le paranesi ia tagata o le au paia e tuuina atu lauga i le sauniga faamanatuga. O nei lauga e taulai atu i le talalelei a Iesu Keriso. E faaaoga e failauga ia tusitusiga paia ma upu a taitai o le Ekalesia a o latou saunia a latou lauga. Latou te molimau atu foi i faamanuiaga o mataupu faavae o le talalelei i o latou olaga.

Lesona

A uma le sauniga faamanatuga, e aoao tagata o le ekalesia e uiga i le talalelei i vasega laiti. O lesona atonu e faatatau i tusitusiga paia, aoaoga mai konafesi aoao, po o isi mataupu. E ui o le a taitaia e le faiaoga le lesona, ae e le o se lauga. E mafai e tagata uma o le vasega ona faasoa mai o latou manatu e uiga i le autu.

Molimau

Ata

o se alii o loo lauga i le pulelaa i le lotu

E taitasi i le masina, o sauniga faamanatuga e aofia ai se sauniga molimau. E masani lava o le Aso Sa muamua o le masina. I le taimi o lenei sauniga, e mafai e tagata o le ekalesia ona tuuina atu a latou molimau ia Iesu Keriso ma Lana talalelei. Ina ia tuu atu molimau o lona uiga ia tautino atu upumoni o le talalelei e pei ona musuia ai e le Agaga Paia.

Sauniuniga

E saunia tagata o le ekalesia mo sauniga o le Aso Sa e ala i le tatalo, suesue i tusitusiga paia, ma ia saunia e maua musumusuga mai le Agaga Paia. Afai e talosagaina oe e tuuina atu se lauga pe aoao atu se lesona, mafaufau ma le agaga tatalo pe mafai faapefea ona e aoao atu mataupu faavae o le talalelei. Faaaoga tusitusiga paia. Molimau atu i le upumoni. E mafai e ou taitai o le Ekalesia ona fesoasoani ia te oe e saunia, pe a manaomia.