“Toe Faaleleia Mai Vaisu: E Mafai e ala ia Keriso,” Liahona, Iuni 2022.
Toe Faaleleia Mai Vaisu: E Mafai e ala ia Keriso
O le polokalama a le Ekalesia o le toe faaleleia mai vaisu e faatatau i le lagolagoina ma le fesootai atu o le tasi i le isi i le faatoilaloina o vaisu, ae o le mea e sili ona taua e faatatau i le fesootai atu i le Faaola.
Atapue mai le Getty Images
E taitoatasi i tatou ona tauivi ma o tatou lava luitau patino. Mo le toatele, o amioga ua fai ma vaisu pe fai faamalosi atonu o se tasi lea o nei tofotofoga. E le o taimi uma tatou te talanoa faalauaitele ai e uiga i vaisu po o amioga fai faamalosi i sosaiete aemaise lava i le Ekalesia. Afai o oe poʻo se tasi e pele ia te oe o loʻo tauivi ma vaisu, atonu e te lagona le ma poʻo le maasiasi pe popole i le faamasino mai o isi.
Afai o loo e tauivi ma se vaisu, atonu e te lagona ua nutimomoia oe po o se tagata leaga. O lenei luitau e mafai ona lagonaina le lofituina, maasiasi, po o le lemafaatoilaloina. Peitai, e leai se tatou faatinoga e mafai ona suia lo tatou taua i fofoga o le Atua. O i tatou uma e le gata mai lo tatou taua. Ma e le o tuua na o oe i ou tofotofoga. O mea uma, e aofia ai le toe faaleleia mai vaisu, e mafai e ala ia Keriso. E moni foi lenei mea mo i latou o e atonu o tauivi ma tiga po o taunuuga o amioga a se isi tagata. Na aoao mai Peresitene M. Russell Ballard:
“Ma, mo outou ua faapologaina e soo se ituaiga o mea ua fai ma vaisu, o loo i ai se faamoemoe auā e alofa le Atua i Ana fanau uma lava, ma ona o le Togiola a le Alii o Iesu Keriso ua mafai ai mea uma.
“Ua ou vaaia faamanuiaga ofoofogia o le toe faaleleia, lea e mafai ona faasaolotoina ai se tasi mai filifili o mea leaga ua fai ma vaisū. O le Alii o lo tatou leoleo mamoe ma e leai se mea tatou te matitiva ai pe a tatou faalagolago atu i le mana o le Togiola. Ou te iloa e mafai e le Alii ma o le a Ia faasaolotoina mai lē ua nofopologa i mea ua fai ma vaisu, aua e pei ona folafola mai e le Aposetolo o Paulo, “Ou te mafaia mea uma lava i le faamalosi mai o Keriso ia te au’ (Filipi 4:13).”1
Fesootai ma Iesu Keriso ma Isi
O loo i ai ni togafitiga eseese mo amioga ua fai ma vaisu. O le polokalama a Le Ekalesia a Iesu Keriso o le Au Paia o Aso e Gata Ai o le toe faaleleia mai vaisu (ARP), o se ala i le faamalologa lea e maua ai se nofoaga saogalemu ma lagolagoina mo soo se tasi o galue e faatoilalo amioga ua fai ma vaisu po o amioga faamalosi. O le polokalama e aofia ai vaega o tagata lagolago po o luga o le initoneti lea e mulimuli i se auala e 12-laasaga ma se auivi o le talalelei. O vaega taitasi e aofia ai tagata auai o loo galulue agai atu i le toe faaleleia, faifeautalai o auaunaga ARP, ma le au faafoe o e ua mauaina e i latou lava le toe faaleleia ma le faamalologa e ala i le polokalama o le toe faaleleia mai vaisu.
E lua ituaiga o fonotaga o le toe faaleleia mai vaisu: (1) fonotaga e taulai atu i vaisu lautele ma (2) fonotaga e taulai atu i le faatoilaloina o le faaaogaina o ponokalafi. O loo i ai foi vaega lagolago mo taitoalua ma tagata o le aiga e auai.
Auiliiliga mai le Beside Still Waters, saunia e Simon Dewey
O le polokalama o le toe faaleleia mai vaisu e faatatau lea i le lagolagoina ma le fesootai o le tasi ma le isi i le faatoilaloina o vaisu, ae o le mea e sili ona taua e faatatau i le fesootai atu i le Faaola, o Iesu Keriso. E finagalo o Ia e fesoasoani ia i tatou i o tatou tofotofoga, ma o Ia o le punavai o le faamalologa.
Auala e Saili ai se Fonotaga
O vaiaso uma lava, pe tusa ma le 2,800 fonotaga ARP e faia i atunuu eseese e 30 ma gagana eseese e 17. Afai e te manao e sue se fonotaga, asiasi i le addictionrecovery.ChurchofJesusChrist.org. O nei fonotaga e faia i le auai atu i ai ma luga o le initoneti. Afai e leai ni fonotaga i la outou eria pe afai foi e te lagona le toafimalie e auai faatekinolosi, e mafai ona e auai i se fonotaga i le initoneti po o le telefoni. E mafai foi ona e fesili atu i ou taitai o le Ekalesia pe mafai ona faatulaga se fonotaga e auai atu i ai i la outou eria.
I vaega o le ARP, e le faamalosia lou auai e sili atu nai lo le mea e te manao i ai. E mafai ona e amata i le auai i se fonotaga ma tau lava o le matau, faalogo i isi, ma lagonaina le Agaga.
O ni aafiaga nei se tolu mai tagata o e na auai i le polokalama o le toe faaleleia mai vaisu: o se tasi sa auai mo ia lava, o se tasi ua avea nei ma se tagata faafoe, ma o se tasi sa auai e lagolago se uo (o lenei tala mulimuli o loo maua i le lomiga faatekinolosi o lenei tusiga).
Aafiaga o Dorinda i le Faatoilaloina o le Ava Malosi
Ua suia le igoa.
Sa amata ona ou inu a o ou laitiiti. I le atunuu sa ou nofo ai, sa taliaina faaleagafesootai lena mea, ma sa malosi le uunaiga e inu ina ia taliaina.
Ina ua uma ona ou faaipoipo, sa ma liliu atu ma lou toalua i le ava malosi. O lenei mea na popole tele ai o‘u matua. E oo lava ina ua maua la ma tama muamua, ae sa lei taofia ai lava le avea o le ava malosi ma o ma vaisu.
E lei leva ona mavae le fanau mai o le ma tama, ae avea au ma se tasi O Le Ekalesia a Iesu Keriso o le Au Paia o Aso e Gata Ai, ma sa ou le toe inu ma amata ona alualu i luma e faatoilalo la‘u vaisu. O nei suiga sa le fiafia ai lo‘u toalua, ma sa le fiafia o ia ona o le a ou le inu ma pati faatasi ma ia.
I le mavae ai o le tele o tatalo ma anapogi, i le saili atu ia iloa le finagalo o le Alii, sa ou tuua lo‘u toalua ma siitia atu i le Iunaite Setete. A o ou taumafai e ola i le talalelei a Iesu Keriso, sa mafai ona ou faatoilaloina lou fiafia i ava malosi, ae sa ou tauivi pea e pulea lo’u popole ma lagona o le atuatuvale. Na iu lava ina ou toe faaipoipo i se tagata o le Ekalesia, ae sa faaauau pea ona ou tauivi.
Sa valaaulia au i se kulupu o le polokalama mo le toe faaleleia o olaga mai le tagofia o vaisu e se uso i le lotu. E leai sou masalosalo o loo silafia a‘u e le Tama Faalelagi ona o mea sa ou aoaoina sa patino lava mo a’u. Sa matou talanoaina le auala e avea ai le lagona o le faaesea o se elemene masani mo i latou o e ua aafia i mea ua fai ma vaisu. O lenei faaesea o se mea sa ou tuuina atu ia te au lava ma tauivi ai.
I le gasologa o le polokalama o le toe faaleleia o olaga mai mea ua fai ma vaisu, sa ou iloa ai e le tatau ona ou ola mamao ese mai le Atua ma isi. Ua ia te a‘u le malosi ma le faatuatua e fetaiai ai ma luitau ma faatoilaloina i latou.
O lenei ua ou iloa e le o tuua na o au. O loo ou auai pea i fonotaga faalevaega, ma o nisi taimi ma te auai faatasi ai ma lo‘u toalua i fonotaga faalevaega. O loo i ai tagata mai atunuu eseese i fonotaga i luga o le initoneti, ma e matou te aoao mai aafiaga o le tasi ma le isi ma ofo atu le lagolago i le tasi ma le isi. Ua iloa foi e lo‘u epikopo, lo’u toalua, ma la‘u fanau ou te manaomia la latou lagolago.
O le mea sili lava, ua ou iloa e ala mai i le Togiola a Keriso e mafai ai ona ou faatoilaloina la‘u vaisu.
Aafiaga o Ashly i le Faatoilaloina o Le Vaisu o Fualaau Faasaina
Aiga o Ashly i le 2021
Ata na pueina e Lori Romney Photography
Ou te lei iloaina le saogalemu o le talalelei a Iesu Keriso na tuuina mai ia te au seia oo ina ou lafoaia lo‘u faitalia i le tagofia o mea ua fai ma vaisu. Sa amata ona ou inu ma ula fualaau faasaina i le 14 o ou tausaga. Ina ua 16 ou tausaga, sa ou faaaluina le 15 masina i se fale e nofovaavaaia ai talavou. Ina ua ou tuua lea nofoaga, sa ou toe faia foi. Sa ou gaoi e maua ni tupe mo fualaau faasaina, ma sa tau leai sa‘u fesootaiga ma lo’u aiga. I se tasi taimi sa ou nofo ai i se aiga o e sa malolosi i le faatauina atu o fualaau faasaina. Sa pogisa ma taufaafefe lo‘u tulaga. Sa ou matua maualalo lava i le mea e gata ai. E oo atu i le taimi na 19 ai o’u tausaga, sa matua leaga lava lou olaga.
Mo se taimi umi lava, na ou manatu lava ou te le ausia le saolotoga umi mai fualaau faasaina po o se olaga filemu po o le faamalieina. Ae ui i lea, sa ou vaaia le aao o le Atua i lou olaga i vavega laiti, e pei o le mauaina o se faailogatusi o le Tusi a Mamona i se Tusi Paia tuai po o le i ai o le alofa ma le lagolago e le muta a lo‘u tama. E ala i nei savali laiti, sa ou faalogo ai i le siufofoga o le Alii.
Sa ou saoloto mai fualaau faasaina ma filifili ai e “faataitai” ma vaai po o le a le mea o le a tupu pe afai ou te faia mea uma na poloaiina ai au e le Atua e fai (tagai Alema 32:27). Sa tonu ia te au afai o le tausia o poloaiga e faafiafiaina ai au, o le a ou tumau i le saolotoga. O le tuu o sikaleti ma le kofe ma le taulimaina o le faagasologa o le salamo sa faigata. Ae sa ese ou lagona ina ua uma ona ou faia. Sa amata ona ou lagonaina le saogalemu.
I tausaga o lo‘u tagofia o mea na fai ma vaisu, sa ou auai i fono a le Ekalesia mo polokalama e toe faaleleia ai mai vaisu. Sa ou feiloai foi i lo‘u toalua i le lumanai i se tasi o fonotaga. O taimi taitasi ou te auai ai, sa faafeiloaia au i lima mafola. O se nofoaga saogalemu mo au. I se tasi o fonotaga, sa ofo mai ai se alii e faia se tatalo faapitoa mo au. O lena po sa ou lagonaina ai le alofa o le Tama Faalelagi mo au. Sa ou lagona le agavaa mo le mamā. Sa ou saoloto i le tasi le masina mulimuli ane.
Mo le toeitiiti atoa le lima tausaga, na avea au ma se tagata e faatautaia le polokalama o le toe faaleleia o olaga mai le tagofia o mea ua fai ma vaisu. O le vaega e sili ona ou fiafia i ai e uiga i fonotaga o le mafai lea ona e vaai ma iloa le galue ai o le talalelei a Iesu Keriso. E leai ni lagona o le faatusatusa o oe lava i isi po o popolega e uiga i le taliaina. Ua i ai tagata iina ona latou te manaomia le Atua. Ma ua latou naunau e faataatia ese le faamaualuga ia lagona ai Lona filemu.
O nei fonotaga o se tasi lea o nofoaga na sili ona ou lagonaina ai le Agaga i lo‘u olaga. O fonotaga o se nofoaga o le alofa, lagolago, ma le faamoemoe. O nofoaga o le saogalemu lea e fefaasoaai ai tiga ma faafitauli ma mafai moni ai ona tatou fesoasoani e tauave avega a le tasi ma le isi.
Ou te lagona pe a vave ona toe faaleleia tagata, ua i ai le Atua i o latou olaga. E tutupu soo vavega laiti ma le alofa mutimutivale, ma ou te talitonu o ni nai uunaiga laiti ia mai le Atua e taofia ai nei tagata i le itu sa‘o.
O se faamanuiaga mo a‘u le mafai ona faaaoga o lo’u aafiaga i le tagofia o mea ua fai ma vaisu ma le faamamaina e avatu ai le faamoemoe ia i latou o loo tauivi pea. Afai e mafai ona ou toe foi i tua i le taimi, ma le iloaina o mea ua ou iloa nei, o le a ou filifili e mulimuli i fautuaga a o tatou taitai o le Ekalesia. O le a ou filifili e aua le faataitaia fualaau faasaina po o le ava malosi. Ae ou te iloa e mafai e le Alii ona galue i mea uma i le lelei o i latou o e alolofa ia te Ia. Ou te iloa o le mea lena na tupu mo au. Ua mafai ona ou liliuina lo‘u lototiga ma le tiga i se savali o le faamoemoe.
Aafiaga o Rasela i le Lagolagoina o se Uo
Ina ua faasoa mai ia te au se alii sa ou tafao faamasani i ai e uiga i lona vaisu i ponokalafi, o le mea muamua lava na ou fai atu ai o le, “E mafai faapefea ona ou fesoasoani?”
Sa ia tali mai, “Ta o i fonotaga o le toe faaleleia o olaga mai le tagofia o mea ua fai ma vaisu. O loo i ai se vaega lagolago mo aiga ma uo e mafai ona e auai.”
Sa ou iloa e uiga i le polokalama e 12-laasaga o le toe faaleleia o olaga mai le tagofia o mea ua fai ma vaisu, ae sa leai so‘u iloa i ni vaega lagolago. Sa fai si ou musu i le taimi muamua, ae sa ou faamanatu ia te au lava ia sa ou fesili atu ia te ia pe faapefea ona ou fesoasoani atu, ma o le mea lenei sa ia talosaga mai ai ia te au.
I le taimi o le fonotaga muamua, sa ou manava loloa ma savali atu i le potu lea sa fono ai le vaega lagolago. Ina ua ou ulu atu i le potu, sa ou lagona le saunia e aoao pe mafai faapefea ona ou faasaoina la‘u uo tama mai lana vaisu.
Ae sa ou te‘i i le mea na ou mauaina.
Sa latou tuuina mai ia te au se tusi, Taiala Lagolago: Fesoasoani mo Taitoalua ma Aiga o i Latou o i le Toe Faaleleia, ma sa matou faitau leotele mai le tusi i le taimi o vasega taitasi.
E lei i ai se taimi na ou aoao ai pe faapefea ona ou laveaiina la‘u uo tama.
Nai lo lena, o lesona e 12 a le taiala lagolago na faaali mai ai ia te au, ae e te lei lagolagoina se isi lava tagata, sa ou manaomia muamua ona tuu i lalo au avega i aao o le Alii ma faatagaina o Ia e faamalolo au (tagai 3 Nifae 9:13)—e faamalolo ai au mai ou lava sese ma tauiviga ma onosaia lou tiga o le lagolagoina o se tasi e pele e toe faaleleia mai vaisu.
Sa ou iloaina e tatau ona ou faalagolago ma liliu atu i le Faaola ia maua ai le filemu, faamoemoe, ma le malosi. Ma ona o lena mea, ua ou lagona ai le sili atu o le saunia i le mafai ona lagolagoina isi o loo feagai ma vaisu po o amioga fai faamalosi.
“O la tatou faamuamua e tatau ona faalatalata patino atu i le Alii,” o le tala lea a le taiala lagolago. “… O lenei mea o le a tuu ai i tatou i se tulaga sili atu e lagolago ai e pele ia i tatou. Po o le a lava le mea e mafai ona latou filifili e fai, o le filemu ma le faamoemoe o le Faaola e mafai ona faatasi ma i tatou” (Taiala Lagolago: Fesoasoani mo Taitoalua ma Aiga o i Latou o i le Toe Faaleleia [2017], iii).
A o faaauau pea ona ou auai i le kosi, sa ou aoaoina le tele o le alofa o le Faaola ia te au ma le auala na te silafia moni ai lo‘u tulaga. Sa ou aoaoina foi le le mafai e se vaisu ona suia le tele o Lona alofa i soo se tasi o fanau a le Tama Faalelagi.
Ae ou te manatu o le lesona sili ona taua na ou aoaoina a o auai atu i le vaega lagolago, e le mafai ona ou faasaoina lau uo tama (po o se isi lava). Ua na o Iesu Keriso lava e mafaia. E ala i Lana taulaga togiola, ua ia te Ia le mana e laveai ai.
Ou te matuai faafetai lava ona o Ia o lo tatou Faaola, aua Na te silafia le ala e fesoasoani atoatoa ai ia i tatou (tagai Alema 7:11–12). A o tatou faalagolago i Lona alofa tunoa, ou te iloa o le a tatou maua le mea e tatau ai mo lo tatou faamalologa faaletagata lava ia. O le a faamalosia i tatou e Ia ma o le a sili atu ona mafai ona lagolagoina e pele ia i tatou o loo feagai ma vaisu.
Ona o le vaega lagolago ma vasega ARP, sa lagona ai e la‘u uo tama le toafimalie e tau mai ia te au pe a ia lagona le faaosofia ona sa ia iloa ou te le o i ai iina e faamasino ae ia alofa ma lagolagoina o ia i ana taumafaiga. E lei uma lana malaga o tauiviga, ae sa ou vaaia le alualu i luma ma le suiga na faia e mataupu faavae mai nei vasega i o ma olaga uma. Ma sa ou lagonaina pea le aao o le Alii.