Na’o Tusiga Faatekinolosi
O Mea Ua Ou Aoaoina e uiga i le Salamo
E alala le tusitala i Arisona, ISA.
E leai se mea e itiiti ifo e suitulaga ai o le a faatusatusa i le olioli o le faalatalata atili atu i le Atua.
Mo le tele o lo‘u olaga, sa ou tauivi ai ma le salamo. Sa ou iloaina e taua ma e tatau ona ou faia, ae ou te lei malamalama atoatoa i ai. Ma ona o se mea sa lei lelei ona ou faia, sa ou lagona ai le lotovaivai i soo se taimi e faamamafa mai ai e se tagata lona taua i se lauga.
Sa oo i le tulaga sa ou le fiafia ai e faalogo i le upu salamo aua sa faamanatu mai ai ia te au se mea ou te lei faia. Sa foliga mai e pei ua ou pa‘ū i tua, ma o le umi o le faaauauina o lenei faafitauli, o le faateleina foi lena o lo’u taumamao ese.
Mulimuli ane, sa ou faalogo i le saunoaga lenei i le konafesi aoao mai le–Peresitene Aoao o Alii Talavou i lena taimi o Stephen W. Owen, ma sa amata ona ese lo‘u mafaufau: “O le olioli i le salamo e sili atu nai lo le olioli o le ola i se olaga lelei. O le olioli ona o le faamagaloina, o le toe mama, ma le latalata atili atu i le Atua. A oo ina e iloa lena olioli, e leai a se isi mea itiiti ifo e suitulaga ai.”1
O se isi lauga o le konafesi aoao na fagua ai i lou loto se manao atili ia lelei atu. Na saunoa mai Peresitene Russell M. Nelson: “Pe o e malaga ma le filiga i luga o le ala o feagaiga, pe ua see ese pe laa ese mai le ala o feagaiga, pe ua lē mafai ona vaai atu i le ala mai le mea o e i ai i le taimi nei, ou te aioi atu ia te oe ia salamo. O le lagonaina o le mana faamalosiau o le salamo i aso taitasi—o le faia ma le avea ma se tagata lelei teisi atu i aso taitasi.”2
A o ou faia le mea sili e mulimuli ai i lenei fautuaga, sa ou maua tali i atugaluga ma maua ai se malamalama sili atu i faamanuiaga o le salamo. Ae sa ou mafaufau po o le a se mea ou te lei malamalama lava i ai e uiga i le salamo lea sa faigata tele ai.
O se tasi o mea faigata ia te au o le, le mafai ona ou manatuaina o agasala uma sa ou faia i se aso. Sa ou lagonaina le mautinoa sa i ai nisi agasala na galo ia te au. E mafai faapefea ona ou salamo i au agasala uma pe afai e le mafai ona ou manatuaina uma?
O lenei fesili sa ou popole ai talu ona faatoa papatisoina a’u i le valu o ou tausaga. Sa ou iloaina e tatau ona ou salamo, ae o ai se valu tausaga na te faamaumauina uma agasala na ia faia ina ia mafai ai ona ia salamo mai ai? Ou te manatua se tasi taimi na ou tootuli ai i le tatalo ma faapea atu, “Le Tama Faalelagi e, ua ou salamo i au agasala uma!” Sa ou le talitonu o le faia faapena sa lava lea, ae sa ou le iloa po o le a se isi mea e fai.
Sa ou maua mulimuli ane se tali i le Tusi a Mamona. O loo aoao mai leAlema 38:14 : “Aua e te fai atu: Le Atua e, ou te faafetai atu ia te oe ona ua sili atu lo matou lelei nai lo o matou uso; ae ia fai atu: Le Alii e, faamagalo mai lo‘u le agavaa. … Ioe, ta’uta’u atu lou le agavaa i luma o le Atua i taimi uma lava.”
O le ta’uta’u atu o lo tatou le agavaa i luma o le Atua e fesoasoani tatou te lotomaualalo ai, lea e taua i le salamo. E le gata i lea, e mafai ona tatou ole atu i le Tama Faalelagi e fesoasoani mai ia i tatou ia iloa mea i o tatou olaga e manaomia ona salamo ai, suia, pe faaleleia. Na te silafia moni lava mea e manaomia ona tatou suia ina ia avea atili ai e faapei o Ia, ma o le a Ia uunaia o tatou mafaufau ma loto pe afai tatou te ole atu ma se manao faamaoni ia suia ma salamo.
O le isi faigata na ou oo i ai i le salamo o lo’u le malamalama atoatoa i le manatu o le lafoai o a tatou agasala. Fai mai leMataupu Faavae ma Feagaiga 58:43 : “O le mea lenei e mafai ai ona outou iloa pe afai ua salamo se tagata i ana agasala—faauta, e ta’uta’u atu e ia i latou ma lafoai i ai.”
Sa ou talitonu o le lafoai o a tatou agasala o lona uiga o le folafola atu lea o le a tatou le toe faia lava. Pe o le uiga ea o lenei mea afai ou te toe faia, ona ou le lafoaia moni lea o i latou i le taimi muamua? Ma ina ua ou tootuli i le tatalo e ta‘uta’u atu ma lafoai a‘u agasala, pe sa ou iloa ea o’u lava vaivaiga—o le mea moni e mafai ona ou toe faia le agasala—o lona uiga ou te lei lafoaia moni lava a‘u agasala? Ae sa ou aoaoina o le lafoaiina o a‘u agasala e sili atu nai lo le na o le faanoanoa mo i latou. Afai na o le pau le mea ou te faia o le faanoanoa, atonu ou te lei lafoaia.
Sa faasoa mai e Elder Dale G. Renlund o le Korama a Aposetolo e Toasefululua le malamalamaaga lenei: “Sa tusia e le tusitala Kerisiano o C. S. Lewis e uiga i le manaomia ma le metotia mo suiga. Sa ia tusia o le salamo e aofia ai le ‘toe faafoi atu i luga o le ala sa’o. O se aofaiga sese e mafai ona toe faasa’o,’ sa ia fai mai ai, “ae ua na o lou toe foi lava i tua ia maua le measese ma toe amata mai i lena vaega, ae le tau na ona alu pea.’ O le suia o a tatou amioga ma le toe foi atu i le ‘ala sa’o’ o se vaega o le salamo, ae ua na o se vaega. O le salamo moni e aofia ai foi le liliuina o o tatou loto ma le naunautaiga i le Atua atoa ma le lafoaia o agasala. E pei ona faamalamalama mai i le Esekielu, o le salamo o le “liliu ese mai … agasala, … fai le amio tatau ma le amiotonu; … toe avane le mea na ia fao, … [ma] savali i sauniga e ola ai, ma ua le fai le amio leaga’ [Esekielu 33:14–15].”3
A o ou tatalo mo se fesoasoani i le salamo, sa ou faailoa atu i le Tama Faalelagi sa ou manao moni lava e sui ma sa naunau e sui. Sa ou iloa o le a fesoasoani le Alii ia te a’u. Ma o le mea moni, sa Ia fesoasoani mai ia te au ia suia.
I le taimi muamua, o nisi taimi e le tumau ai le suiga ma sa manaomia ona ou toe taumafai. Ae o taumafaiga tatou te faia e taua i le Alii. Sa aoao mai Elder Jeffrey R. Holland o le Korama a Aposetolo e Toasefululua, “Faatasi ai ma le meaalofa o le Togiola a Iesu Keriso ma le malosiaga o le lagi e fesoasoani ia i tatou, e mafai ona tatou lelei, ma o le mea sili e uiga i le talalelei o le tauia o i tatou mo le taumafai, e tusa lava pe le manuia i tatou i taimi uma.”4
Talu mai le mauaina o lenei malamalamaaga e uiga i le salamo, ua ou lagonaina ai le faateleina o le mautinoa i lou tomai e mulimuli i lenei fautuaga na tuuina mai e Peresitene Nelson: “E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani i aso taitasi i le salamo. O le salamo e le o se mea e faa-tasi ona tupu; ae o se faagasologa. O le ki i le fiafia ma le filemu o le mafaufau. Pe a vaavaalua ma le faatuatua, e tatala e le salamo lo tatou faitotoa e maua ai le mana o le Togiola a Iesu Keriso.”5
Ina ua ou faia le faaiuga ia salamo lelei, sa ou le iloaina o le a i ai se aafiaga mamao ma tumau i lo‘u olaga. O faamanuiaga ua oo mai e moni. Sa oo ina ou iloa o lagona o le lotovaivai sa ou maua e mai le fili o lo‘u agaga, o lē sa lei manao ou te salamo. Sa oo foi ina ou iloa e le o taimi uma ou te pa‘u atu ai i lo’u le salamo e pei o nisi taimi sa na o le lafoaia o faamanuiaga semanu ou te mauaina pe afai ou te faia nisi taumafaiga e faia mea e mafai ona ou faia.
A o faaauau pea ona ou faia le mea sili e salamo ai i aso taitasi, sa ou lagonaina le alofa ma le taitaiga a le Atua i auala sa tau le mafai ona ou mafaufauina muamua. Ou te le o toe lagonaina le mamafatu i le agasala. Ua ou iloaina le avanoa ma le faamanuiaga o le salamo moni lava. Ua ou malamalama nei i le mea na saunoa i ai Brother Owen: “O le taimi lava e te lagonaina ai [le olioli o le salamo], o le a leai se mea e le mafai ona suia o le a faia.”