Pe o Aafia Moni A‘u i Ala o Faasalalauga Ou te Faaaogaina?

Saunia e Megan Thomson Ramsey

O Mekasini a le Ekalesia

Pe tatou te iloaina pe leai, o ala o faasalalauga tatou te faaaogaina e aafia ai i tatou. E faapefea la ona tatou filifilia ala o faasalalauga e “logolelei pe tauleleia”? (Mataupu Faavae o le Faatuatua 1:13).

Ata

tagata o loo uuina faatusa

Ina ua ou taalo tenisi i le aoga maualuga, sa masani ona ou faalogoina isi tagata taaalo o palalauvale. Sa ou taumafai e ‘aua le faatagaina a latou upu e aafia ai a‘u. Ae i le taimi o se tasi o a‘u taaloga, sa ou misia ai le polo, ma sa se’e ese se upu mataga mai lo‘u gutu. E aunoa ma lo‘u iloaina, sa faasolosolo lemu lava ona ou gagau i upu sa latou fai mai ai seia oo ina pei o se mea masani mo le lo‘u “tagata natura” (Mosaea 3:19) e faaaoga foi.

O mea tatou te siomia ai i tatou lava e mafai ona aafia ai i tatou i le tele o auala, ma o se tasi o mea aupito sili ona taua o loo siomia ai i tatou i aso uma o ala o faasalalauga. Pe tatou te iloaina pe leai, o ituaiga o ala o faasalalauga tatou te faaaogaina e mafai ona faifaimalie, toetoe lava a le iloa, e faauiga sese ai o tatou [tulaga] moni. Atonu tatou te manatu o le maimoaina i nisi taimi o ala o faasalalauga o loo i ai upumasoa, feusuaiga, po o sauaga e leai sona aafiaga ia i tatou, ae o le mea moni, e i ai. O le a la se mea e mafai ona tatou faia i ai?

Filifili e Saili i Ala o Faasalalauga Lelei

E taua le manatua, e ui lava i mea leaga uma e mafai ona tatou faaaogaina e ala i a tatou televise po o telefonipoto, o loo i ai lava ala o faasalalauga lelei iina. E faasoa atu e faifeautalai le talalelei e ala i faasalalauga faagaeetia. Atonu tatou te toe fesootai ma se uo ua leva pe sue se savali e siitia moni ai o tatou agaga i luga o ala o faasalalauga faaagafesootai. Ae e mafai faapefea ona tatou sailia lenei ala o faasalalauga mama, matagofie, ma tauleleia? (tagai Mataupu Faavae o le Faatuatua 1:13).

Na ofoina mai e Elder David A. Bednar o le Korama a Aposetolo e Toasefululua le suega le faatoilaloina lenei: “Afai o se mea tatou te mafaufau i ai, vaai, faalogo i ai, pe faia e taumamao ai i tatou mai le Agaga Paia, ona tatau lea ona tuu lo tatou mafaufau, vaai, faalogo, po o le faia o lena mea. Mo se faataitaiga afai o le mea o loo faamoemoe e faafiafia ai, e vavaeese mai ai tatou mai le Agaga Paia, ua manino mai ai o na ituaiga o faafiafiaga e le mo i tatou.”¹

Soo se taimi lava ou te filifilia ai ala o faasalalauga, ou te fia fesili ifo ia te au lava i fesili faapenei: Pe o fesoasoani ea ou te faalatalata atili atu ai i le Atua? Pe mafai pea ona ou lagonaina le Agaga Paia i lo‘u olaga? Atonu foi e te manao e faaaoga nei fesili e taiala ai oe a o e sailia ala o faasalalauga lelei. Ma e ui atonu tatou te faia ni mea sese, e mafai ona tatou lelei atu—tasi le filifiliga i le taimi.

E le o au o se faataitaiga atoatoa o lenei mea. Ua ou matamata i ata lauiloa e lei faaosofia ai au ia avea ma se tagata e sili atu ona lelei. Ma ou te faasolosolo i vitio i luga o ala o faasalalauga faaagafesootai o nisi taimi e i ai gagana le talafeagai. Ae o loo ou taumafai ia ou mataala atili. O aso taitasi ou te taumafai ai e filifili ala o faasalalauga faagaeetia.

O Ai e Ana le Leo O Loo e Faalogologo I Ai?

I lenei lalolagi pisi, e faigata ia te au ona ou nofonofo filemu. E foliga mai ou te aumaia i fafo la‘u telefoni e matamata ai ala o faasalalauga faaagafesootai po o vitio o faasalalauga e faatumu ai le sāō. Ae e tele lava ina ou iloaina le Agaga pe a sāō. O lea o loo ou taumafai ai ia ou nofouta atili i leo o le lalolagi lea ou te faatagaina ai ma le lei faamoemoeina le leo filemu, ma le itiiti (tagai 1 Tupu 19:11–12).

O ni nai auala nei e mafai ai e i tatou uma ona pulea lo tatou faaaogaina o ala o faasalalauga:

Amata i le nofouta atili. Tuu le matamata ma le le manatu i ai. Faaalu se taimi e mafaufau moni ai e uiga i mea o loo e aumaia i lou mafaufau—pe o le a taumamao ai oe mai le Agaga Paia?
Gauai atu i le taimi ma pe aisea ua e faaaogaina ai ala o faasalalauga. Pe e te faaaluina se taimi e nofo filemu ai ma lagona le Agaga? Pe e te matele ina toso mai lau telefoni i taimi filemu, e pei ona ou faia i nisi taimi?
Mafaufau e fai ni malologa masani mai ala o faasalalauga, atonu o se vaega o lau tapuaiga i le Aso Sa. O le faia o malologa mai ala o faasalalauga e mafai ona fesoasoani e te nofouta atili ai i ona aafiaga ia te oe.

Fai Filifiliga Malamalama Lelei i Ala o Faasalalauga

Filifili ia faamoemoeina ma nofouta i faatosinaga e te valaauliaina i lou olaga. Filifili e toe iloilo ma fesili moni ia te oe lava po o le a le aafiaga o au ala o faasalalauga ia te oe. Atonu foi e manaomia ona e laa ese mai ni tusi patino, tifaga, ala o faasalalauga faaleagafesootai, po o faasalalauga e iloa ai aafiaga e le mafaamatalaina atonu o loo latou mauaina.

E manaomia ai le taimi! O la tatou malaga o le taumafai ia i ai i le lalolagi ae le o ni o o le lalolagi o se faagasologa o le faaleleia (tagai Ioane 17:11, 14–15). E faifaimalie lava ona tatou taumafai malosi teisi atu ina ia avea ma se [tagata] lelei teisi atu. Sa saunoa Peresitene Russell M. Nelson, “E fiafia le Alii i taumafaiga.”² I le aluga o taimi, e mafai ona faamamaina i tatou ina ia mama e pei o le Faaola. Afai tatou te sasi, e mafai ona tatou salamo ma liliu atu ia te Ia ma le manatu moni i ai ma ia faaleleia atili! O le vavega lena o le Togiola a Iesu Keriso.

Pe a faatofuina au i ala o faasalalauga lauiloa, e faigata ona iloa pe o i ai se aafiaga le lelei o leo o le lalolagi ia te au. Ae ou te iloa a ou faaaluina le taimi e laa ese mai ala o faasalalauga, e mafai ona ou iloa po o fea o faatosinaga e tatau ona ou aveesea mai lo‘u olaga. O nisi taimi o se filifiliga faigata, ae e taua.

O le a ou faamaoni—o lena taaloga tenisi e le o le taimi mulimuli lea na ou faia ai se upu leaga. Ae ina ua ou iloaina lo‘u aafiaga i le i ai i lena siosiomaga, sa ou faia ma le iloa lelei se filifiliga e sui tagata ou te fegalegaleai ai. E mafai ona tatou faia ia lava filifiliga faamoemoeina i ala o faasalalauga tatou te faaaogaina.