Aoao mai le Mamanu a le Atua mo Aufono

Saunia e Sydney Walker

Talafou o le Ekalesia

O auala e fitu e atili anoa ai au aufono patino, faaleaiga, ma aufono a le Ekalesia.

O Elder Dieter F. Uchtdorf (i le ulu o le laulau) o loo taitaia se fonotaga ma taitai o le Ekalesia ma tagata faigaluega i le Aufono Faatonu a Faifeautalai.

Mai i le amataga, na faia ai e le Atua Lana galuega e ala i aufono. E tele naua mea e mafai ona tatou aoaoina e uiga i le taua o aufono ma le fefautuaai faatasi mai o tatou aafiaga a o lei o mai i le Lalolagi.

“Tatou te faitau i le uluai tala o le aufono moni i le Penina Tau Tele,” na saunoa ai Peresitene M. Russell Ballard, Sui Peresitene o le Korama a Aposetolo e Toasefululua, e faatatau i le Fono Tele i le Lagi. I lenei fonotaga faaleaiga, na tuuina atu ai e le Tama Faalelagi se fuafuaga mo le alualu i luma o Lana fanau—o se fuafuaga ua mafai e ala i le taulaga naunautai a Iesu Keriso, o le sa ta‘ua o Ieova. Sa pulefaamalumalu le Tama Faalelagi i le alofa, uunaia le faailoaga saoloto, ma faaaloalogia le meaalofa o le faitalia.¹

I le taimi o le Foafoaga o le lagi ma le lalolagi na sosoo ai, na faaali atu ai e le Tama Faalelagi se mamanu paia mo le fefautuaai i aufono. Na tuuina atu faatonuga, ma sa faia ni tofiga ma lipoti atu i ai. O loo faaauau pea ona taitaia e le Tama Faalelagi ma Iesu Keriso le aiga o le Atua ma le Ekalesia e ala i aufono.

O lenei mamanu paia o le fefautuaai e “taua” i tulaga uma, na saunoa ai Peresitene Ballard. I le Ekalesia o lenei mea e aofia ai aufono i tulaga lautele, siteki, ma uarota.

O Se Mamanu mo Tagata Taitoatasi ma Aiga

Ata

o se aiga o loo talanoa faatasi

O lenei mamanu e taialaina ai foi tagata taitoatasi ma aiga. Na saunoa mai Peresitene Dallin H. Oaks, Fesoasoani Muamua i le Au Peresitene Sili, “O le mataupu faavae o le fefautuaai e leai se isi mea e sili atu ona taua nai lo le sootaga i le va o se tane ma se ava ma i la laua sootaga o ni matua i a la fanau—pe o soo se isi lava atonu o loo nonofo faatasi ma i latou i se aiga lautele.”

Na faamatalaina e Peresitene Ballard ia aufono faaleaiga “o le aufono autu ma o le faavae sili lea—ma e masalo o le aufono aupito sili ona taua—o aufono uma.”² A nonofo i lalo se tamā ma lona atalii talavou, sa saunoa Peresitene Ballard, e le na o se fonotaga faatama-atalii lenei. “O loo i ai o ia i se fonotaga a le aufono ma le tagata sili ona pele e mafai ona ia fefautuaai i ai.”

E mafai e i tatou uma ona faaaoga mataupu faavae o aufono lelei i o tatou olaga e ala i le fesili atu i matua, taitai o le Ekalesia, faufautua, ma isi e fefautuaai ma i tatou i soo se taimi, e aofia ai pe a feagai ma faaiuga taua pe manaomia ona foia ni luitau.

“O i latou o loo nofofua e oo lava i taimaiti aoga o loo nonofo ese mai le aiga e mafai lava ona mulimulitai i le mamanu faalelagi mo aufono e ala i le faatasitasi ma uo ma ē e nonofo faatasi i potu e fefautuaai faatasi” na saunoa ai Peresitene Ballard.³

E oo lava i se tagata o loo soifua na o ia e mafai ona fefautuaai i se fonotaga a le aufono ma le Alii e ala i le tatalo. E mafai ona latou faaali atu le alofa ma le lotofaafetai ma ole atu mo musumusuga ma le taitaiga a o latou faalogo mo le uunaiga a le Agaga, na ia saunoa ai.⁴

E tusa lava po o le a le ituaiga o aufono, na saunoa ai Peresitene Henry B. Eyring, Fesoasoani Lua i le Au Peresitene Sili, “o le malosi o aufono e tele lava ina sau mai le faatuatua o tagata o loo i ai i totonu.”

Mataupu Faavae o Aufono Mataalia

O loo i lalo nisi o mataupu faavae mai taitai o le Ekalesia e mafai ona faamanuiaina ai a tatou aufono faalesiteki, uarota, ma aiga.

Iloa lou faamoemoe

O se fonotaga a le aufono e le o le ta‘uina atu i tagata uma le mea e fai, na saunoa ai Peresitene Ballard. O se fonotaga a le aufono e le o le fai atu i tagata uma e tuuina atu se lipoti. O se fonotaga a le aufono o le taimi lea e fai mai ai se epikopo, mo se faataitaiga, “O loo i ai se faafitauli o le le migao i totonu o le uarota. Tatou talanoa i ai. O le a se mea e mafai ona tatou faia?” O se fonotaga a le aufono o se avanoa lea e o mai faatasi ai ia malamalama ma tuufaatasia i se faamoemoega tutusa.

I le Fono Tele i le Lagi, na tuuina mai ai e le Tama Faalelagi Lana fuafuaga e fesoasoani ai i Ana fanau ia avea e faapei o Ia ma faatagaina i tatou ia malamalama i le fuafuaga (tagai Aperaamo 3:22–28). E pei o le Fono Tele i le Lagi, o se tasi o faamoemoega autu o soo se aiga po o se aufono a le Ekalesia o le “aumaia o agaga ia Keriso,” na saunoa ai Peresitene Ballard. “O le fesoasoani lea e saunia i latou ia maua sauniga ma feagaiga e taua mo le faaolataga e faavavau.”

Ia Faatotonugalemu le Faaola

E pei lava ona avea le Faaola ma totonugalemu o le Fono Tele i le Lagi, e tatau foi ona avea Iesu Keriso ma totonugalemu o a tatou aufono taitasi, “ae le o o tatou lava lagona poo o tatou lava manatu,” na saunoa ai Elder Dieter F. Uchtdorf o le Korama a Aposetolo e Toasefululua.

Ina ia faatumauina le avea o le Faaola ma taulaiga, e ono fesili atu se aufono: “O le a se mea e finagalo o Ia tatou te faia? E mafai faapefea ona tatou ausia Lona faamoemoega?”

Na saunoa peresitene Camille N. Johnson, le Peresitene Aoao o le Peraimeri, e le faia ni aufono mo na o faamoemoega faaletaitai po o fuafuaga. “O le auauna atu lea i le tasi, ma o le ala e mafai ai ona tatou iloa le auala e faia ai lena mea i se tulaga faavaomalo o le valaaulia lea o lo tatou Faaola i le faagasologa ma le iloaina o le Agaga.”

Valaaulia le Agaga e ala i le saunia

A o lei talanoaina se autu, e mafai e sui o le aufono ona iloilo faamatalaga o le talaaga, sa fautua mai ai Elder Quentin L. Cook o le Korama a Aposetolo e Toasefululua. “Tuu i le matalalaga,” o lana tala lea. E mafai ona avea lenei mea ma talaaga faasolopito po o aoaoga faavae po o le matauina mai aafiaga patino. O se aiga o loo fefautuaai e uiga i auala e faaleleia ai lo latou tausiga o le aso Sapati, mo se faataitaiga, e mafai ona faitau i mau e faatatau i ai po o lauga o konafesi aoao.

O faamatalaga lelei e mafai ona aumaia uunaiga, na saunoa ai Elder Uchtdorf. “E tatau ona e aoina mai faamatalaga, ona e i ai lea i le tulaga e maua ai faaaliga pe a e fesootai atu i le Agaga.”

Ia mautinoa e faasoa manatu o tagata uma

Na aoao mai Elder David A. Bednar o le Korama a Aposetolo e Toasefululua: “Ua faataapeapeina faaaliga i sui eseese o se aufono. A oo mai se faafitauli mo le iloiloina, tatou te manaomia, valaaulia, ma faalogo i fautuaga mai tagata uma.”

Pe i se aufono aoao, siteki, uarota, po o le aiga, e manaomia le leo o sui taitasi o le aufono ma e tatau ona faatauaina.

I le avea ai ma se tane ma se ava e galulue faatasi e tuu atu i le la fanau ia maua se leo i lo la aiga, mo se faataitaiga, e mafai ona la aoaoina faapea “o nisi taimi e oo mai ai faaaliga e ala i le leo o se tamaitiiti e valu tausaga,” na saunoa ai Peresitene Bonnie H. Cordon, Peresitene Aoao o Tamaitai Talavou.

Saili manatu o tamaitai

Ata

tamaitai o loo saunoa i le taimi o se fonotaga a le aufono

“O le leo o tamaitai i tulaga uma, e aofia ai le aiga, e taua,” na saunoa ai Peresitene Ballard.

E iai le alualu i luma pe a lotogatasi tamaitai ma alii ma galulue faatasi, na saunoa ai Peresitene Jean B. Bingham, Peresitene Aoao o le Aualofa. I tamaitai o loo fesiligia lo latou taua i se aufono, sa ia fai mai, “O lou leo o se tamaitai e taua.”

Sa toe ta‘ua e Elder Cook manatu o Peresitene Bingham: “E manaomia ona tatou tau fai amo faatasi.” Sa ia ta‘ua le faataitaiga a au peresitene o le korama a toeaina ma le Aualofa o loo “tau fai amo faatasi” i o latou tiutetauave mo le galuega o le faaolataga i le uarota. O le sailia o manatu o tamaitai i aufono o le a faaauau pea ona “faamanuiaina tele ai le galuega o le faaolataga,” na ia saunoa ai.

Faalogo ina ia aoao

A o valaauliaina leo uma e saofaga atu, e tatau i sui auai o le aufono ona “faalogo ina ia aoao” nai lo le na o le faatalitali mo se taimi e saunoa ai, na saunoa ai Peresitene Bingham. O le mana o le fefautuaai e oo mai i le aoaoina faapea “e mafai ona e faalogo i soo se tasi i lena aufono ma maua se mea aoga.”

Na saunoa Peresitene Cordon o le tuueseina o manatu o se tagata lava ia ma faalogo ma le naunautai e aoao—mai isi ma mai le Alii—“e faateleina ai e le Agaga lo tatou iloa ma le malamalama.”

Mo se faataitaiga, i le Aufono a le Au Peresitene Sili ma le Korama a Aposetolo e Toasefululua, e leai se tasi e taumafai e faamalosia se manatu faapitoa, na saunoa ai Elder Bednar. E faia faaiuga i le “tauagafau ma le agamalu ma le mana o le Agaga Paia.”

Saili le autasi, ae le o le fetuutuunai

Na matauina e Peresitene Bingham e faapea, i faatulagaga faalelalolagi, o talanoaga faavaega e masani ona taitai atu ai i le fetuutuunai—o se maliega e ausia a o faaali e itu taitasi ni manatu.

“E le o le ala lena e faatautaia ai se aufono i le Ekalesia. Tatou te galulue e ala i le autasi,“ o lana tala lea. I le faamaoni ma le faasoa atu o manatu, “e faaauau pea ona tatou galulue faatasi, ma vaavaai mo le vaifofo sili e pei ona faailoa mai e ala i faaaliga a le Agaga.” Pe a saili sui auai o se aufono ina ia lotogatasi i se faaiuga, e valaaulia ai le mana o le Alii e faamaonia ai le faaiuga ma fesoasoani ai ia tupu (tagai Mataio 18:19; Mataupu Faavae ma Feagaiga 42:3; 107:27). O le taimi lava e faia ai se faaiuga, ua i ai loa i tagata uma le tiutetauave e agai i luma ma lagolago malosi le faaiuga i fafo atu o le aufono.

O nisi taimi e vave ona ausia se maliega, ma o isi taimi atonu e umi atu, na lapatai mai ai Peresitene Johnson. “Ia onosai i le faagasologa faafaaaliga.”

Se I’uga Sili Atu

Na saunoa Peresitene Ballard o i latou o e aoao e fefautuaai lelei i o latou siteki, uarota, ma aiga—e mulimuli i le mamanu paia na faaali mai e le Tama Faalelagi ma Iesu Keriso ia i tatou—o le a “iu i taimi uma i se taunuuga lelei, e iu lava i se tali sili atu, o le a iu lava i se agaga sili atu.”