Na’o Tusiga Faatekinolosi
O La‘u Tatalo mo Peati [Peaches] ma Pea
E alala le tusitala i Oregon, ISA.
Sa tali mai le Tama Faalelagi i la‘u tatalo i le tuanai ai o i ni nai masina na ou ole atu ai.
I tausaga ua mavae, a o nonofo pea le toaono o le ma fanau i le fale, sa i ai foi se ma fale tausi lea sa ma tausia ai tagata matutua e maua i le gasegase o le Galonimo [Alzheimer]. I lena taimi, sa matou totoina se togalaau tele ma teufaguina le tele o a matou meaai. I se tasi tausaga sa matou le maua ai ni peati [peaches] po o ni pea, o fualaau aina ia sa sili ona fiafia i ai lo matou aiga ma sa faapitoa le lelei mo mo gasegase o le Galonimo [Alzheimer] o e sa manaomia ni meaai vaivai.
Sa ou filifili e tatalo e uiga i lenei manaoga. Sa ou ole atu i le Tama Faalelagi e taitai atu a‘u i ni peati [peaches] ma ni pea taugofie pe a o Ona silafiaina o loo maua. O lo‘u faamoemoega o le maua lea o ni fualaau aina na semanu e ma’umau.
I ni nai aso mulimuli ane, sa ou aveina atu la‘u fanau i le lotu mo se gaoioiga a le autalavou. Sa sau se uso e fou i le uarota ma fesili mai pe mafai ona ou faaaogaina ni peati [peaches] pula. Na faatoa uma lava ona faatau e lona aiga se fale e tele laau ni peati [peaches] e i ai i le fanua, ma sa tele atu fualaau aina nai lo le mea e mafai ona latou faaaogaina. Sa mafai ona ou faatumuina le tele o pusa peati [peaches] ma teufaguina e aunoa ma se tau.
Sa mavae atu le taimi, ma ou te lei mauaina ni pea. Sa ou manatu ifo ia te au lava, na silafia e le Tama Faalelagi sa ou pisi tele i le faamautuina o tamaiti i le aoga ma le teuina mo se taimi umi o meaai mai le matou togalaau ma sa leai se taimi mo pea.
I ni nai masina mulimuli ane, ina ua uma ona seleseleina fua uma, sa ou i ai i le potu faatalitali o le ofisa o la‘u foma’i ponaivi. A o ou nofo ai iina, sa sau i totonu se alii ma amata ona talanoa ma le tali telefoni. Sa ou te‘i, sa ou faalogo atu o fesili o ia pe na te iloaina se tasi e mafai ona faaaogaina ni pea. Sa tele ni ana pusa pea na teu faamalulu ma sa manao e sue se fale e ave i ai ina ia mafai ona tapē le pusa aisa mo le taumalulu. Sa mafai ona ou faatauina mai ni pusa pea lapopoa ma mananaia mo na o le tolu talā i le pusa—o se tau e tele naua le pa’u e faatusatusa i le mea e masani ona ou totogia!
Sa tali mai le Tama Faalelagi i la‘u tatalo i masina na muamua atu, ma sa Ia faatulagaina foi le maluluina o pea seia lava lo‘u taimi ou te tago ai e teufagu.
I se lauga o le konafesi aoao, na saunoa ai Elder Brook P. Hales o le Fitugafulu: “E silafia e le Tama i tatou, silafia o tatou manaoga, ma o le a fesoasoani atoatoa ia i tatou. O nisi taimi e tuuina mai lena fesoasoani i le taimi lava lena po o se taimi vave pe a maea ona tatou ōle atu mo le fesoasoani faalelagi. O nisi taimi o o tatou manaoga faamaoni ma agavaa e lē taliina mai i le auala tatou te faamoemoe i ai, ae tatou te iloa e i ai faamanuiaga silisili a le Atua ua faapolopoloina. Ma o nisi taimi, o a tatou manaoga amiotonu e lē tuuina maia i lenei olaga.”1
E tele taimi e vave ai ona tali mai a‘u tatalo, ae o nisi o mea ou te tatalo faatauanau ai mo aso uma e lei tuuina mai lava. O le manatuaina o aafiaga e pei o la‘u tatalo mo peati [peaches] ma pea ua faamanatu mai ai ia te a’u e silafia e lo’u Tama Faalelagi au ma o‘u manaoga ma o le a Ia fesoasoani atoatoa mai ia te a’u i auala Na te silafia e sili ona lelei mo a‘u.