O Faifeautalai Tamaitai Muamua

O se vaega lenei mai le voluma 3 o le Au Paia: O Le Tala o le Ekalesia a Iesu Keriso i Aso e Gata Ai, lea o le a faalauiloa i le tautotogo o le 2022.

A o ulu atu lana vaa i le uafu o Liverpool, Egelani, sa vaaia e Inez Knight le luasefulu tasi tausaga le matua, lona tuagane matua o Viliamu i luga o le uafu, o faatalitali mai i se motu o uso a faifeautalai. O le aso 22 o Aperila 1898. O Inez ma lana soa, o Jennie Brimhall, na o mai i le Misiona a Peretania e avea ma uluai tamaitai nofofua na vaetofia o ni “faifeautalai tamaitai” mo le Ekalesia. E pei o Uili ma isi alii faifeautalai, o le a latou talai atu i fonotaga i magaala ma o atu i lea faitotoa ma lea faitotoa, ma faasalalau atu le talalelei toefuataiina a Iesu Keriso.¹

I le tele o tausaga ua mavae, sa auauna atu ai Luisa Pratt, Susa Gates, ma isi tamaitai faaipoipo i ni misiona faamanuiaina faatasi ma a latou tane, e ui sa leai ni valaauga aloaia faamisiona. E le gata i lea, o Taitai i le Aualofa ma le Asosi o le Alualu i Luma mo Tamaitai Talavou [lea ua ta‘ua nei o Tamaitai Talavou], o ni amepasa lelei mo le Ekalesia i nofoaga e pei o le Faaaliga a le Lalolagi i le 1893. Ma o le toatele o tamaitai talavou, e lei faaipoipo na mauaina le poto masani i le aoao atu ma le taitaiga i fonotaga a le AALTT, ma saunia ai i latou e talai atu le afioga a le Atua.²

Ina ua mavae le toe feiloai ai ma Uili, sa savavali atu Inez ma Jennie i le laumua o le misiona, o se fale e fogafale-fa na nofoia e le Au Paia talu mai le vaitau o le 1850. O iina na latou feiloai ai ma Peresitene McMurrin. “Ou te manao ia malamalama outou taitoatasi ua valaauina outou iinei e le Alii,” na ia saunoa ai. A o ia saunoa, sa lagona e Inez mo le taimi muamua le tiutetauave tele o loo i luga o ona tauau.³

O le aso na sosoo ai, sa la malaga faatasi ai ma Jennie ma Peresitene McMurrin ma isi faifeautalai i Oldham, o se taulaga o falegaosi mea i sasae o Liverpool. I le afiafi, sa latou faataali‘oli‘o ai i se tulimanu pisi o le auala, faia se tatalo, ma usu ni viiga seia oo ina siomia i latou i se motu o tagata e toatele. Sa faasilasila mai e Peresitene McMurrin o le a faia se fonotaga faapitoa i le aso e sosoo ai, ma sa ia valaaulia tagata uma e o mai ma faalogo i le talaiga mai “tamaitai Mamona moni.”

A o ia saunoa i lea mea, sa totolo a‘e se lagona faafaufau ia Inez. Sa popole o ia i le talanoa atu i se motu o tagata toatele. Ae, a o tu o ia faatasi ma faifeautalai i o latou pulou silika ma suti uliuli, sa sili atu lona fiafia ina ua avea o ia ma se tagata o le Au Paia o Aso e Gata Ai.⁴

O le afiafi na sosoo ai, sa gatete Inez a o ia faatalitali mo lona taimi e lauga ai. O le faalogo ai i pepelo matautia e uiga i tamaitai o le Au Paia o Aso e Gata Ai, sa fia iloa ai e tagata e uiga ia te ia ma isi tamaitai sa lauga i le sauniga. O Sara Noall ma Karoline Samita, o le faletua ma le tuafafine faaletulafono o se tasi o faifeautalai, na saunoa muamua i le faapotopotoga. Ona saunoa lea o Inez, e ui i lona fefe, ma sa faateia o ia lava i lona lelei tele.

E le‘i leva ae tofia Inez ma Jennie e galulue i Cheltenham. Sa la‘ua o atu i lea faitotoa ma lea faitotoa ma molimau atu i fonotaga i magaala i taimi uma. Sa la‘ua taliaina foi valaaulia e feiloai ma tagata i o latou fale. E masani lava ona taulimaina lelei i la‘ua e le au faalogologo, e ui o nisi taimi e faatauemu ai se tasi ia i la‘ua pe tuuaia i la‘ua i le pepelo.

Sa faamoemoe Inez ma Jennie e vaai i ni tamaitai se toatele e auauna atu i ni misiona. “Ma te lagona o loo faamanuia i ma‘ua e le Alii i a ma taumafaiga e faafilemu le faailoga tagata ma faasalalau atu le upumoni,” na la lipoti atu ai i taitai o le misiona. “Ma te talitonu o le toatele o tamaitai talavou agavaa i Siona o le a faatagaina e olioli i le avanoa lava lea e tasi ua ma maua nei, aua ua ma lagona e mafai ona latou faia mea lelei e tele.”⁵