O Tala e Fusia Faatasi ai i Tatou

Saunia e Christy Monson

E mafai ona tatou faamalosia o tatou aiga e ala i le faasoa atu o faataitaiga o le faatuatua ma le lototele, i le taimi ua tuanai ma le taimi nei.

Ata

taavale solofanua i luga o le laufanua ua faamata’uina e se malaia lea na tapeina e se afā oso faafuasei.

Ata na tusia e Carolyn Vibbert

A o faasolo ina ou matua, ua suia lo‘u tulaga i lo’u aiga. Sa i ai se taimi sa avea ai au ma tina talavou o loo faamaopoopoina se vaega o tamaiti tiotio i se ituaiga o vevesi faatulagaina sa matou ta’ua o afiafi faaleaiga. O le taimi nei o au o le tinamatua, o nisi taimi i le lotolotoi o mea e tutupu i le aiga ma o nisi taimi i tua atu. Ua ou me’i i luga i se sootaga o le filifili o le olaga. Ua ou fiafia i augatupulaga e lua na muamua atu, e aofia ai lo‘u toalua, o loo i ai nei i le isi itu o le veli. Ma ou te faamemelo i augatupulaga e lua i le taimi nei i luga o le fogaeleele (faaopoopo i ai ma ni nai fanau a fanau mai le augatupulaga pe a mavae lena).

O se tasi o matafaioi o loo ou faia nei e faia i le faaiuga o a matou konafesi vitio faaleaiga o le Sau, Mulimuli Mai ia te A‘u . I le avea ai ma se aiga lautele, matou te faaaogaina se polokalama o taaloga i luga o le initoneti e fesoasoani ai i tausoga ia iloa e le tasi le isi ma fesoasoani ia i matou uma ia manatua pe faamasani i o matou tuaa. A o matou faia lenei mea, ua ou iloa ai e le gata ina fusia faatasi e faavavau o tatou aiga i a tatou feagaiga o le malumalu, ae e faapena foi a tatou tala fefaasoaai o le lototele ma le faatuatua.

Uunaiga mai le Tuanai

Ata

o se alii o loo papatisoina i se alia

Ou te talitonu ua tofu i tatou ma se tala o le faatuatua ma le lototele e faasoa atu. E mautinoa lava o i latou na muamua atu ia i tatou e mafai ona uunaia i tatou a o tatou manatuaina o latou agaga ma osigataulaga. Mo se faataitaiga:

E faafetai lo matou aiga mo se tama talavou, o Christian Hans Monson, o le sa tuuina atu taumafataga i le vaitau o le 1800 i faifeautalai i le falepuipui i Fredrikstad, Nouei. Sa latou aoao o ia i le talalelei. Sa ia aumaia faalilolilo i latou i fafo o le falepuipui, ma sa latou papatisoina o ia i le alia i se tasi po maninoa. Ina ua ia auai i le Ekalesia, sa tuli o ia i fafo e lona tamā. Ae sa ia agai atu i le Vanu o Sate Leki e tausia se fanau amiotonu.
Ua musuia foi i tatou i le tala ia Johanna Kirstine Larsen. I le taimi o la latou savaliga sopo i le Vanu o Sate Leki, o lana vaega o paionia, na taitaia e Brigham Young Jr., na fetaiai ma se afi i le vao. Ina ua uma ona latou faia se tatalo faatauanau, sa avea se ao itiiti i le tafailagi ma afā taalili na tapeina le afi.

Uunaiga mo le Asō

O le tama teine a lo‘u afafine ma le tama teine “vaetamaina” a lo’u afafine, o se talavou liliu mai na sau e nonofo ma le aiga o la‘u tama teine.

Ou te lagona le loloto o le agaga faafetai mo nei agaga faamaoni, lototetele. Ae ua faalotomaualaloina foi au e agaga totoa i lo matou aiga i aso nei. O lea, sa ou filifili ai i fonotaga taitasi a le matou aiga, ou te talosagaina ni fanau a fanau se toalua e faasoa mai a la molimau o le faatuatua ma le lototele. E le gata e uunaia e lenei mea le aiga atoa, ae e mafai foi e i latou e faasoa ona faaalu ni nai minute e vaai ai i le ala na fesoasoani ai le Atua ia i latou i taimi faigata. O a la tala nei e lua.

Sa tauivi le afafine o le ma atalii ma le kanesa o le faaaī a o talavou. Sa ia fai mai, “Na taialaina a‘u e le Tama Faalelagi, aemaise lava i lo’u vaiaso o le faaesea i togafitiga. O la‘u molimau ma la’u tama‘i taifau o Daisy na faamalosia a’u.
Ina ua iloa e se talavou liliu mai ua leai sona fale po o se aiga, sa aumai o ia e faifeautalai i le fale o le ma tama teine. Sa matou talia o ia ma vaai atu ia te ia o se tasi o le matou aiga. Sa fai mai lenei talavou liliu mai fiafia, “Ua ou aoaoina e tusa lava pe ou te fefe, e mafai ona ou faia mea faigata i le fesoasoani mai a le Tama Faalelagi.” Na te faamanuiaina i matou i ona uiga alofa, ma le fiafia.

I la‘u matafaioi o se tinamatua, ua ou toe aoaoina ai foi e tele mea e mafai ona tatou faia o ni matua ma matua matutua e faamalosia ai sootaga i la tatou filifili o aiga e faavavau. O le faasoaina o tala o le faatuatua ma le lototele, mai le taimi ua tuanai ma le taimi nei, o se tasi lea o auala e fesoasoani ai i a tatou fanau ma fanau a fanau ia maua le faatuatua ma le lototele a o latou feagai ai ma le lumanai. Ma o se auala sili e fesoasoani ai e liliu loto o fanau i o latou tama ma tina (tagai Malaki 4:6).

E alala le tusitala i Iuta, ISA.