Filifili le Alii ma Lana Perofeta

Saunia e Elder Jeffrey R. Holland

O Le Korama a Aposetolo e Toasefululua

Ata

Elder Jeffrey R. Holland

E leai se popolega sili atu o perofeta nai lo le taitai atu o fanau a le Atua i le Faaola o Iesu Keriso.

Ata

atatosi o Russell M. Nelson, ma le ata tioata felanulanuai o le Tama ma le Alo i tua atu

O loo i ai se taimi taua i le Feagaiga Tuai e faapea, e pei o le tele o taimi i lena faamaumauga, e masani lava ona ou mafaufau loloto i ai. Na tupu ina ua mavae le taitaiga le mafaatusalia a Mose ma lona sui talavou tuuto, o Iosua.

E ui i le tele o vavega ma le fesoasoani faalelagi i la latou sailiga ia toe maua fanua o latou tama, ae sa aoaiina le fanauga a Isaraelu ona o le taliaina o faiga faapaupau na masani ai i latou o e sa nonofo i na laueleele.

“Ona amio leaga lea o le fanauga a Isaraelu i luma o Ieova, ua latou auauna foi ia Paala:

“Ua latou tuua Ieova le Atua o latou tamā, o le na aumaia i latou mai le nuu o Aikupito, a ua latou mulimuli atu i atua ese, o atua o nuu ua vagavagai ia te i latou, ua latou ifo foi i ai, ma latou faaonoono ai ia Ieova” (Faamasino 2:11–12).

E oo lava i lona toasa, na faaalia lava e Ieova le agaalofa i le faatuina mai o “faamasino, ua latou faaola ia te i latou ai lima o e vetea a latou mea” (Faamasino 2:16). O le silisili o na faamasino uma o Samuelu. Na valaauina e le Alii a o tamaitiiti, sa ia tuputupu ae ma le manuia i le tulaga faamasino lea na lagolagoina ai o ia e Isaraelu uma “e fai ma perofeta a Ieova” (1 Samuelu 3:20).

O Isaraelu sa, e pei ona foliga mai ai ua, foi i le Atua, ua toe foi atu ma toe lagolagoina le taitaiga atoatoa faaperofeta latou te lei iloaina—ma sa lei mananao ai—talu mai le maliu o Iosua. Ma e maeu se aafiaga o lenei toe foi atu i le taitaiga faaperofeta i lo latou tamaoaiga.

I lalo o le taitaiga a le perofeta-faamasino a Samuelu, na taia ai e Ieova i le “faititili ma le taalili tele” i luga o fili o Isaraelu (1 Samuelu 7:10). I le talafaasolopito, afai lava na uai atu ai Isaraelu i le fautuaga a Ieova e ala i Ana perofeta, na faapea ona mulimuli atu ai le manumalo ma le manuia.

Ae na iu lava—ma o lenei vaega ua ou maofa ai—na amata ona vaivai Isaraelu i le taitaiga faafaamasino o Samuelu. Sa latou manatu o lana taitaiga ua le toe aoga ma ua pasiā. Na iu lava ina ta‘u atu e toeaina o Isaraelu ia te ia, “ua e toeaina oe” (1 Samuelu 8:5). Ma, i o latou mafaufau, sa faapea foi le manatu o se faamasino, e tusa lava pe o ia foi o se perofeta. Ua oo i le taimi e teena ai manatu faalelotu tuai ae faaaoga auala faaonaponei o le lalolagi. Ua oo i le taimi mo se tupu.

“O lenei, ia e tofia se tupu mo i matou e faamasino ia te i matou, pei o nuu uma,” sa latou alalaga atu ai (1 Samuelu 8:5), faatasi ma le lesona e tatau ona tatou faaeteete i mea tatou te momoo i ai ona atonu o le a tatou mauaina. Ina ua tatalo Samuelu e uiga i lenei talosaga, sa tau atu e Ieova ia te ia, “E le o oe ua latou lafoaiina, a ua latou lafoaiina o a’u, ia le fai a’u ma tupu ia te i latou” (1 Samuelu 8:7).

Ioe, e pei ona ta‘ua i luga, e le o le taimi muamua lea na faaalia ai e Isaraelu le le fiafia mo Ieova ma Ana perofeta.

“Pei o mea uma ua latou faia talu le aso ua ou aveina ae ai i latou nai Aikupito, e oo i le aso nei, ua latou tuulafoai mai ia te a‘u, ae auauna i atua ese, e faapea foi ona latou faia nei ia te oe,” na ta’u atu ai e le Alii ia Samuelu (1 Samuelu 8:8). Ona, i se faatinoga tuusao o le faamasinoga tonu, na fetalai atu ai le Alii ia te ia e “usiusitai ia i a latou upu” (1 Samuelu 8:9) ae ia lapatai atu i tagata e uiga i ala o tupu amioletonu.

Ata

Ua faamanuia e Samuelu ia Saulo

Samuelu o loo Faamanuiaina Saulo, English School (19th Century), Look And Learn / Bridgeman Images

I le usitai ai, na valoia ai e Samuelu le faaaogāsesēina o le pule ma tulaga taufaamataʻu i aiga ma meatotino. I le faailoa atu ia Isaraelu ua talia lo latou manaoga, na ia lapatai ai i se valoaga:

“E alalaga outou i lea aso ona o lo outou tupu na outou filifilia mo outou, ae e le faafofoga mai Ieova ia te outou i lea aso.

“Ae e le mafafai le nuu ona faalogo i le upu a Samuelu, ua latou fai mai, E leai lava, ae e fai lava so matou tupu;

“Ia pei o nuu uma i matou, ia faamasino mai lo matou tupu ia te i matou; ia alu atu foi o ia i o matou luma, ma ia tau i o matou taua” (1 Samuelu 8:18–20).

O le tulaga tiga lea, ona o loo i ai so latou tupu na muamua atu ia i latou ma tau a latou taua. O Ia o Ieova, le Tupu o tagata uma, ae latou te le toe mananao ia Ieova e pule ia i latou. Latou te le toe mananao ia te Ia e tau a latou taua. Ma o le ogatusa ai ma le autu o le tele o lesona o talafaasolopito, na oo mai ai taunuuga tiga ina ua tuai tele ona aloese ai. Sa tagitui mulimuli ane tagata, “Ua matou faaopoopoina i a matou agasala uma lenei mea leaga, ina ua matou faatoga atu ai i se tupu mo i matou” (1 Samuelu 12:19).

O Faatosinaga a le Lalolagi

I le avea ai ma tagata o lenei lava aiga o Isaraelu e pei ona faauigaina faalautele ai, ua poloaiina i tatou ia aua nei faapei o isi tagata, ia aua nei faapei o le lalolagi. Ae e pei o le nuu o le Atua i ona po o Samuelu, tatou te fetaiai ma faatosinaga malolosi ia faapei o i latou i ala faatauvaa, i latou ua faatoilaloina e ala faalelalolagi i amioga po o talitonuga.

“Mo tagata talitonu moni,” na matauina e Elder Neal A. Maxwell (1926–2004) o le Korama a Aposetolo e Toasefululua, “o faatosinaga ma uunaiga a le lalolagi—e aofia ai ona fiafiaga, mana, viiga, tupe, ma tulaga maualuluga—sa i ai pea lava iina. Ae ui i lea, o le taimi nei, o le tele o faiga lagolago aoga sa i ai muamua ua gausia pe ua motusia. E le gata i lea, o mea leaga o le lalolagi o loo faasalalauina lautele e tekinolosi ma faaaoga e le anoano o ala o faasalalauga, e ono oo atu i le toetoe lava o aiga ma faalapotopotoga uma.¹

Ma o a nisi o na “mea leaga o le lalolagi”? Tilotilo solo. O le tapuai i tagata lauiloa, o mea faalelalolagi, manatu faapito, ma nisi o elemene o sitaili—i le suamalie, o mea faafiafia masani—e faamatauina ai lo tatou tulaga faaleagaga i taimi uma tatou te ki ai le televise, faatautaia se sailiga i luga o le initoneti, pe laa atu i fafo o le faitotoa pito i luma.

Ua valaauina i tatou e vavaeese mai i tatou lava mai le amioleaga (tagai Alema 5:57) ma ia avea ma mea faafefeteina faaleagaga i le lalolagi e aunoa ma le faalaugatasia faaleagaga e le lalolagi.

“Pe a fai mai tagata ia i tatou, ‘e le pei outou o matou,’ tatou te tali atu ‘ua matou iloa; matou te le mananao ai,’” na saunoa ai Peresitene Ioane Teila (1808–87). “Matou te mananao ia faapei o le Alii, matou te mananao e maua Lona finagalo malie ma le faamaoniga ma ola i Lana ala, ma ia faailoa atu, e pei ona sa faia e Isaraelu anamua i se taimi faapitoa ‘O le Alii o lo matou Atua, o lo matou faamasino ma lo matou tupu, ma o le a nofotupu o Ia i o matou luga.’”²

E ala i faaaliga, ua poloaiina ai i tatou e le Alii e “tuu ese mea o lenei lalolagi, ma saili mo mea o se lalolagi sili atu ona lelei” (Mataupu Faavae ma Feagaiga 25:10). E i ai la tatou fesoasoani i lena galuega. Aua e ui ua tatou ola i se lalolagi le mautonu, fefinauai, ma tumu i vevesi, ae ona o le taitaiga faalelagi, e le tatau ona tatou “ola e aunoa ma le Atua i le lalolagi” (Mosaea 27:31).

O Le Ala i le Saogalemu

Faatasi ai ma le agaga o o matou galuega faaaposetolo, matou te tautino atu ai i le lalolagi o le Ekalesia toefuataiina a Iesu Keriso e taitaia e ala i valoaga, tagatavaai, ma faaaliga.

I le auauna ai i le Korama a Aposetolo e Toasefululua mo le toeitiiti atoa le tolusefulu tausaga, e mafai ona ou molimau atu o tamalii faitofa o loo taitaia Le Ekalesia a Iesu Keriso o le Au Paia o Aso e Gata Ai ua i ai se malamalamaaga o mataupu tau amio ma agafesootai e sili atu nai lo soo se tagata poto faatuatuaina i le lalolagi. O o matou olaga, femalagaaiga, ma le tele o talaaga matou te maua ai se vaaiga o le lalolagi lea e toalaiti isi e oo iai.

Pe a matou tuufaatasia lena aafiaga ma le agaga o la matou galuega faaaposetolo, e mafai ona matou tautino atu i le lalolagi o le Ekalesia toefuataiina a Iesu Keriso e taitaia e ala i valoaga, tagatavaai, ma faaaliga. O le malamalama lea e sau mai lena taitaiga paia o le a taialaina Isaraelu i ona po nei e ala i tulaga lamatia faaleagaga ma faaletino o se lalolagi pogisa.

“O taimi uma lava i lo’u olaga pe a ou filifili e faatuai le mulimuli i fautuaga musuia pe filifili foi o a’u o se tuusaunoaga, sa oo ina ou iloa sa ou tuuina au lava i se ala e pagatia ai,” na saunoa i ai Peresitene Henry B. Eyring, Fesoasoani Lua i le Au Peresitene Sili. “O taimi uma lava na ou faalogo ai i fautuaga a perofeta, lagonaina le faamautuina i se tatalo, ma mulimuli i ai, na ou iloa ai lo’u agai atu i le saogalemu.”³

E leai se popolega sili atu o perofeta nai lo le taitaiina o fanau a le Atua i le Faaola o Iesu Keriso, o le o le a, e pei ona sa Ia faia mo e naunau ma usiusitai anamua, e auina atu i latou i le nuu folafolaina. Ae o le faatuai o le usiusitai i fautuaga faaperofeta po o le teenaina o le tuuina lea o tatou ola i se tulaga lamatia.

O le taimi mo tagata e salamo ai na oo mai a o lei tutu’iina e Noa lana fao muamua i le mea o le a avea ma vaa. O le taimi mo le fanauga a Isaraelu e manatua ai a latou feagaiga ma Ieova na oo mai a o lei alu ifo Mose mai le Mauga o Sinai ma taei papamaa. O le taimi mo tagata o Samuelu e teena ai le manatu o se tupu na oo mai a o lei lapataia i latou e Samuelu e uiga i lo latou manaoga lē atamai.

I o tatou aso, ua fetalai mai le Alii e uiga i Lana [auauna] faauuina:

“Uai atu i ana upu uma ma poloaiga o le a ia tuu atu ia te outou e pei ona maua e ia, ma savavali i le paia atoa i o’u luma;

“Ona o lana upu ia outou talia, e pei lava ua mai i loʼu lava gutu, i le onosai ma le faatuatua atoa” (Mataupu Faavae ma Feagaiga 21:4-5).

O Se Perofeta mo o Tatou Taimi

I le avea ai ma se vaega o se aumalaga maimoa i atunuu e valu, sa faafeiloai ai e Peresitene Nelson ma Elder Holland, faatasi ai ma o latou faletua, tagata o le Au Paia i Hong Kong, Saina, i le aso 21 Aperila, 2018.

E pei o Samuelu, o perofeta, tagatavaai, ma talifaaaliga i aso nei, o ni tamalii faitofa, o le tele o ia mea e na o le matua e mafai ona maua ai. O Peresitene Russell Marion Nelson ua 97 [tausaga o lona soifua]. A o tatou iloiloina lana taitaiga musuia, e leai se masalosalo o loo i ai so tatou perofeta i Isaraelu. Mafaufau i ni nai faataitaiga o lana fautuaga ma le taitaiga alofa:

Ua valaau mai Peresitene Nelson ia i tatou “ia faateleina [o tatou] gafatia faaleagaga e maua ai faaaliga,” ma lapatai mai, “o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga mafanafana a le Agaga Paia.”⁴
Ua ia taitaia le Ekalesia i le faatinoina “o se auala fou atu, ma paia atu e tausi ma auauna atu ai i isi.”⁵
Ua Ia taitaia i tatou i lenei taimi o se faama‘i pipisi, fesoasoani ia i tatou e fetuunai i “se Ekalesia e faatotonugalemu-i-le-aiga, ma lagolagoina e mea o loo tutupu i totonu o o tatou fale o paranesi, uarota, ma siteki.”⁶
Ua ia taulai atu a tatou tapuaiga i le Aso Sa i le faamanatuga ma a tatou amioga i le Aso Sa i le tausia o le aso Sapati ia paia.⁷
Ua ia faatelevaveina galuega o le malumalu, fofogaina le fausiaina o le silia ma le 80 malumalu fou o aso e gata ai.
Ua ia fetalai mai “e toefuatai (ai) le igoa sa’o o le Ekalesia a le Alii,” ma folafola mai “o le a liligi mai e Ia o le e ana le Ekalesia Lona mana i lalo ma faamanuiaga i luga o ulu o le Au Paia o Aso e Gata Ai, i auala tatou te lei vaaia lava.”⁸
Ua ia aioi mai ia i tatou ia “lagonaina le mana faamalosiau o le salamo i aso taitasi—o le faia ma le avea ma se tagata lelei teisi atu i aso taitasi.”⁹
Ua ia uunaia le Au Paia e “Faalogo ia te Ia,” o le “mamanu mo le manuia, fiafia, ma le olioli i lenei olaga.”¹⁰
Ua ia tuuina mai se folafolaga o le faamanatuina o le lua selau tausaga i le lalolagi, ma valaaulia tagata uma ia iloa “o loo matala le lagi” ma “o loo faailoa mai e le Atua Lona finagalo mo Ona atalii ma afafine pele.”¹¹
Ua ia valaauliaina le Au Paia e “opogi le lumanai ma le faatuatua” i le Alii o Iesu Keriso, lea e “tatalaina ai le mana o le Atua i o tatou olaga.”¹²

Na tautino mai e Peresitene Nelson: “E silasila agai i luma perofeta. Latou te vaai i tulaga lamatia faigata ua tuuina e le tiapolo pe o le a tuuina i lo tatou ala. E muai vaaia foi e perofeta avanoa silisili ma faamanuiaga o faatalitali mai ia i latou o ē faalogo ma le faamoemoe e usiusitai.¹³

Ou te molimau atu na mua‘i faauuina Peresitene Nelson e avea “o se leoleo i luga o le olo” (2 Tupu 9:17) mo o tatou aso:

O se perofeta e valaauina i tatou
Ia faamuamua le Atua
Ma ia faapotopoto Isaraelu
I itu uma o le veli.14

Tatou te usuina ma le naunautai le viiga sili “Isaraelu, Ua Valaau Mai le Atua.”¹⁵ Tau ina ia avea i tatou o ni Au Paia o Aso e Gata Ai e tali atu i lena valaau i le ala na faia ai e le taulealea o Samuelu a o agai e auauna atu ina ua matua o se perofeta a le Atua: “Fetalai mai ia, Ieova e; aua o loo faalogologo atu lau auauna” (1 Samuelu 3:9; tagai foi fuaiupu 10).