Eria Lidasip Mesej
Wokbaot wetem God long Kavenan Rod Ia
Long stat blong yia ia, mi filim se mi laekem tumas, ol stadi blong mi blong Kam Folem Mi we i pulum tingting blong yumi long toktok ia “Stap Wokbaot wetem God.”
Long bisi laef blong yumi, bae yumi save luk olsem wanem Inok i bin filim taem we Lod i bin singaotem hem blong i talemaot fasin blong sakem sin long ol pikinini blong Hem1. Inok i bin talem: “Olsem wanem nao yu glad blong mi save stanap long fes blong yu, from mi mi wan yang boe nomo, mo evri pipol oli no laekem mi nating from mi no save toktok gud; taswe, ?from wanem nao mi wokman blong yu?”2
Sapos yumi bin filim olsem, nao yumi stap gud. Laki nomo, yumi no nid blong lusum hop, from se hemia nao wanem we Lod i talem long kwestin blong Inok:
“Yu go mo mekem olsem we mi givim oda long yu blong mekem, mo bae i no gat man i stikim yu. Openem maot blong yu, mo toktok bae i fulap long hem, mo bae mi givim long yu paoa blong toktok, from we evri man i stap long han blong mi, mo bae mi mekem olsem we mi luk se i gud . . .
“mo bae yu stap wetem mi, mo bae mi stap wetem yu; from hemia, yu wokbaot wetem mi.”3
Insaed long Topical Guide, long Inglis, blong ol standet tabu wok, yumi save faenem ova long 100 refrens i go long toktok ia, Wokbaot wetem God. Adam i bin wokbaot wetem God insaed long garen blong Iden4; Inok i bin wokbaot wetem God5; Noa i bin wokbaot wetem God6; Ebraham mo Aesak i bin wokbaot wetem God7.
Invitesen ia blong wokbaot wetem God, i stap yet tedei; i tru, “Hem i stap invaetem evriwan blong go long Hem mo karem wanem we i gud long Hem,”8 o long nara toktok, blong wokbaot wetem Hem.
Blong wokbaot wetem Papa blong yumi long Heven mo Pikinini blong Hem, Jisas Kraes, faswan, yumi nidim blong save huia olgeta. Yumi kam blong save olgeta taem yumi givim seves long olgeta 9 mo stap obei long ol komanmen blong Tufala.
Yumi stap wokbaot wetem God taem we yumi lavem God mo neba blong yumi10, mo taem yumi givhan long ol wei we oli moa hae mo moa tabu. Yumi stap wokbaot wetem God taem we pikja blong Hem, i stap long fes blong yumi, mo taem yumi gotru long wan bigfala jenis long hat 11. Yumi wokbaot wetem God taem we yumi stanap olsem ol witnes blong Hem, taem yumi leftemap wanwan long yumi, mo kea long olgeta we oli stap long nid, mo taem yumi luk se bae i nomo gat eni puaman long medel blong yumi12.
Long ol yia we oli pas, Presiden Russell M. Nelson i bin tokbaot gud wanem ia hem i blong “Stap Wokbaot wetem God,” taem hem i bin talem:
“Naoia, long wanwan memba blong Jos, mi talem long yu se, yu stastap long kavenan rod. Komitmen blong yu blong folem Sevya taem yu stap mekem ol kavenan wetem Hem, mo afta, stap obei long ol kavenan ia, bambae i openem doa blong evri blesing long saed blong spirit, mo blong evri spesel janis we ol man, ol woman, mo ol pikinini long evri ples oli save kasem.
“Olsem wan niu presidensi, mifala i wantem stat wetem en i stap long maen blong mifala. From risen ia, mifala i stap long wan tempol mo toktok i kam long yufala. En ia, we wanwan long yumi i stap traehad from, i blong Hem i kavremap yumi wetem paoa insaed long haos blong Lod, blong yumi sil olsem ol famli, blong yumi fetful long ol kavenan we yumi mekem insaed long wan tempol we bae i mekem yumi kwalifae from presen blong God ia we i hae moa long evriwan—presen ia we i laef we i no save finis. Ol odinens blong tempol mo ol kavenan blong tempol we yu stap mekem insaed ia, oli ki ia blong mekem laef blong yu, mared blong yu, mo famli blong yu i kam strong moa, mo tu, blong mekem paoa blong yu blong save stanap agensem ol atak blong enemi, i kam strong moa. Wosip blong yu insaed long tempol, mo seves blong yu insaed long tempol we bae yu mekem long bihaf blong ol bubu blong yu, bae i blesem yu wetem moa revelesen we i blong yuwan, mo wetem pis, mo bae i mekem yu kam strong blong komitim yu blong stap long kavenan rod ia.
“Naoia, sapos yu kamaot long rod ia, mi invaetem yu, wetem evri hop ia insaed long hat blong mi, blong plis, yu kambak. Nomata wanem wari blong yu, nomata wanem jalenj blong yu, i gat wan ples blong yu insaed long ples ia, insaed long Jos blong Lod. Yu mo ol jeneresen we oli no bon i kam long wol yet, bambae oli gat blesing from ol aksen blong yu naoia blong kambak long rod ia blong kavenan. Papa blong yumi long Heven i laekem tumas ol pikinini blong Hem, mo Hem i wantem wanwan long yumi blong gobak hom long Hem. Hemia nao bigfala gol blong Jos Ia blong Jisas Kraes blong Ol Lata-dei Sent—blong helpem wanwan long yumi blong gobak hom.”13
Olsem ol memba blong Jos Ia blong Jisas Kraes blong Ol Lata-dei Sent, bae yumi evriwan i mekem evri samting we i stap long paoa blong yumi blong folem ol eksampol blong ol gudfala profet blong yumi taem yumi stap wokbaot wetem God folem kavenan rod ia, blong mekem se long ol dei we oli stap kam, bae Lod i singaotem yumi Saeon, mo bae Hem i akseptem yumi olsem ol man blong Hem14.