Famli Histri
Elizabeth Ann Butler mo Rilif Sosaeti long Viktoria, Ostrelia
Elizabeth Ann Butler i bon long 10 Mei 1846 long Nofolk, Inglan, hemia 16 yia afta we Jos Ia blong Jisas Kraes Ia blong Ol Lata-dei Sent i bin oganaes tru long Profet Josef Smit long Feyet, Niu Yok.
Long ol eli yia blong ol 1850, famli blong Elizabeth i bin joenem naenti taosen man, raon long wol, we oli muv blong go lukaotem gol long Viktoria, Ostrelia. Oli bin putumap haos kolosap long Bendigo long 1853, taem we Elizabeth i bin gat seven yia.
Sori tumas, famli blong hem i no mekem tumas mane taem oli bin lukaotem gol ia. Taem we Elizabeth i kam bigwoman, papa mo mama blong hem i aot long famli. Anggel blong hem nao i lukaotem hem, mo hem i no bin save go long skul, mo plante taem, hem i wok longfala aoa long fam blong anggel blong hem.
Elizabeth i maredem wan Jaenis fama, be hem tu, i foldaon long giaman blong lukaotem gol, mo i lego hem i stap blong i lukaotem eit pikinini, mo hem i gat skil blong lukaot haos mo somap nomo. Ol taem ia oli bin had tumas.
Nomata se hem i no save rid mo raet, Elizabeth i save se edukesen i impoten, mo i faenem sam gudfala wei blong lanem samting. Hem i gat strong tingting blong givim moa gud janis long ol pikinini blong hem blong oli stap long wan gud laef bitim laef blong hem. Eksampol: hem i mekem ol fofala yang boe blong hem oli ridim niuspepa evri dei, i go long hem, mo tufala i save rid gud taem we tufala i statem skul.
Taem hem i kasem 53 yia, Elizabeth i holem wan moa janis blong lanem samting. Hem mo gel blong hem i bin wokbaot daon long wan rod long Bendigo, taem we wan man we i werem blak kot mo hat i talem nem blong hem olsem wan misinari blong Jos Ia blong Jisas Kraes blong Ol Lata-dei Sent. Hem i givim wan buk long tufala, mo talem se bae i tijim tufala ol plan we God i gat long ol pikinini blong Hem. Oltaem Elizabeth i laekem blong akseptem ol fri buk, be buk ia bae i jenisim laef blong hem.
Long ful naet ia, Jessie i bin ridim Buk blong Momon long mama blong hem, mo Tabu Spirit i bin konfemem long tufala se buk ia i tru.
Elizabeth mo ol trifala pikinini blong hem oli bin baptaes long namba tu Febwari 1902. Tu yia afta, tufala apuboe blong hem i bin baptaes.
Famli i bin gobak long Melbun, mo oli bin joenem ol nara memba blong Jos. Oli bin laekem tumas blong stap raon long ol pipol we oli tingting semmak. Elizabeth, i bin glad tumas long gudfala welkam we oli bin kasem long ol sista, we oli openem haos blong olgeta blong holem ol miting long Sandei, mo oli bin gat open hat blong givim kaekae.
I nomata oli no bin oganaes olsem pat blong ofisol Rilif Sosaeti oganaesesen yet, ol sista oli bin wok tugeta blong kuk, blong somap, blong kodinetem ol fanresing blong gat wan niu japel. Elizabeth i bin filim kampani blong ol woman ia we hem i neva save olgeta bifo.
Nao, taem i go mo Wol Wo 2 i brokaot. Blong help blong ol woman oli konek wetem wanwan long olgeta long taem ia blong jalenj, Jos i pablisim magasin blong Ol Rilif Sosaeti, we i kam wan impoten risos blong ol sista long Melbun. Oli toktok raon long ol atikol blong magasin ia, mo ol poem mo ol stori, taem we oli kam tugeta blong wivim ol stoking, mo rere long ol katen blong ol soldia long Yurop mo long Medel Is.
Tufala apuboe blong Elizabeth i go faet long wo. Boe blong hem, Honore, hem tu i go long wo, mo oli sendem hem long Medel Is, wetem ol nara Hos ami blong Ostrelia.
Namba blong pipol long jos i no go antap tumas, from i gat moa brata i go long wo. I no longtaem, i gat ol woman nomo—Elizabeth mo ol fren blong hem—blong holem taet smol branj i stap tugeta. Ol sista oli wet blong gat wik miting blong olgeta blong kasem niu tingting, mo gat sosol laef mo kam antap long saed blong spirit.
Taem we wo i finis, kolosap evri famli long eria ia i lusum wan brata, wan hasban, wan boe, o apuboe. Long Elizabeth, hem i lusum apuboe blong hem, William Wallace Cameron Butler we i bin ded long Faet blong Fromels. Wanem i holem ol sista tugeta long branj ia gro i kam strong moa taem oli bin sapsapotem olgeta tru long taem we hat i soa. Oli stat blong bildimbak laef blong olgeta.
Presiden Arnold Miller, oli bin singaotem hem blong lidim “Viktoria Konfrens”, wanem we tedei, bae yumi singaotem wan distrik. Wan long ol fas wok we hem i putum, i blong sapotem ofisol oganaesesen blong Rilif Sosaeti blong Ostrelia, anda long daereksen blong prishud.
Fasfala miting blong Rilif Sosaeti long Ostrelia, oli bin holem long Viktoria long namba 15 Julae 1921. Taem 1923 i kam, Elizabeth i stap long medel blong 22 sista we oli stap insaed long Rilif Sosaeti blong Melbun branj. Hemia ol hapi taem, we ol sista oli save mekem wanwan i kam strong moa mo filim se oli gat paoa.
Afta, long laef blong hem, Elizabeth i tingting tu taem bifo i tokbaot taem hem i bin smol i go long ol pikinini blong hem—stori blong hem i no wan hapiwan. Be yet, sid blong fet we hem i letem blong i gro insaed long hat blong hem, i gro i bitim mak blong hem. Olgeta we oli kamaot long laen blong hem, mo oli tekem Elizabeth olsem eksampol, oli bin ol strong pipol insaed long ol wod, mo ol stek, mo oli bin fetful blong bildim Jos long weaples we oli stap go stap long hem.
Tru long ol ae blong laef blong madam ia we i gat tingting i stap daon, yumi save luk i gobak long ol stat blong oganaesesen blong Rilif Sosaeti long Ostrelia mo luk tru long histri mo wok blong hem, mo faenem tru stamba tingting: blong rere ol woman blong oli kasem ol blesing blong laef we i no save finis, blong mekem wanwan man, woman, mo famli i kam strong moa, mo blong kam wan long wan hadwok blong helpem olgeta we oli stap long nid.