Lokol Pej
Taem blong Ol Wil blong Trak
Long en blong yia 2020, mi bin faenem i had blong filim spirit blong Krismes, mekem se mi stap lisin long buk blong John Bytheway, we taetol blong hem i Bon long Hapi Moning Ia1 blong kasem sam aedia. Long wan japta, hem i bin serem wan eksperiens abaot wan taem we hem i bin pem sam wil blong trak blong wan woman we hem i jes mitim nomo.
Brata Bytheway i talem se maet bae hem i no kasem sam blesing from hem i talem mifala abaot seves ia, be i oraet, from hem i wantem serem bigfala glad mo harem gud we hem i stil filim taem hem i tingbaot taem ia. Hemia i blong mekem yumi tingbaot se yumi kasem moa blesing taem yumi givim bitim taem we yumi kasem samting.
Glad mo harem gud, i stret samting we i nogat insaed long laef blong mi. Long Krismes taem ia, mi bin biliv se filing ia bae i helpem mi blong lukluk moa long Sevya blong mi, mekem se long Disemba, mi bin livim kaekae blong mi kam wan tul long han blong Papa long Heven. Mi bin wantem blong helpem wan—we mi no plan from—blong mekem se bae oli save se Lod i kea long olgeta, mo tu, blong mi save filim nomo pis mo glad blong spesel taem ia. Taem mi bin stap traem blong eksplenem long Papa long Heven wanem nao mi bin stap livim kaekae from, mi talem ol toktok ia: “Yu save, semmak olsem John Bytheway mo ol wil blong trak”.
Long nekis dei blong hem, mi lukaot raon blong faenem ol janis blong givim seves, mo afta, taem mi bin stap glad blong spendem wan naet blong go aot wetem wan gudfala fren blong mi, !sista ia i talem se mi nidim ol niu wil blong trak!
Mi openem maot blong mi bigwan, mo hat blong mi i bin solap taem mi harem Spirit i talem klia long mi se: “Sara, hemia nao ol wil blong trak blong yu, mo hemia nao ansa we i kamaot from yu bin livim kaekae.”
Mi tanem storian i gobak long ol wil blong trak, mo faenemaot se, fren blong mi mo hasban blong hem i savegud se tufala i mas jenisim ol wil blong trak blong tufala i no longtaem, be tufala i bin filim se tufala i mas pem niu wil blong trak kwiktaem.
Mi tokbaot long hem se mi bin livim kaekae, mo mi filim se hemia i bin ansa blong prea blong mi long Papa long Heven. Afta, mi askem sapos mi save pem ol wil blong trak blong hem.
Fren blong mi i nomo toktok blong smoltaem, mo afta i sakem hed i talem yes. Afta sam moa taem we hem i krae, hem i bin eksplenem se, hem mo hasban blong hem, tufala i no save pem ol niufala wil blong trak we tufala i nidim, be tufala i stil folem ol kwaet toktok blong Spirit we tufala i bin kasem, mo tufala i bin oganaesem blong pem wan niu set blong wil. I bin hapen se, long stret sem dei we mi stap livim kakae blong gat wan eksperiens, yu save “olsem John Bytheway mo ol wil blong trak,” tufala tu i bin stap livim kakae blong save pem niufala wil blong tufala.
Mi save talem gud long yufala se mi no bin ting se bae ansa blong mi, we mi livim kaekae from, !bae i stret olsem we mi askem! Be Lod i bin jusum stret taem, mo wan merikel olsem wan ansa blong ol wanwan prea blong yumi.
Sapos merikel ia i bin stop long ples ia, bae hem i stap yet olsem wan fevret taem blong serem abaot fasin blong “lisingud long Hem”, insaed long laef blong mi. Be, jes 2 dei afta we naesfala famli ia i kasem ol niufala wil blong trak blong olgeta, fren blong mi i ring. Mi no save tekem fonkol blong hem, we mi laekem tumas, from se i minim se mi gat yet voes mesej blong hem long fon blong mi, we hem i eksplenem se, long stat blong dei, taem hem i bin stap draev wetem ol yangfala pikinini blong hem, i gat bigfala ren, mo i gat wan trak we i no gat laet blong brek i kam insaed long trafik we i kam fored long hem, mo hem i mas brek fulwan mo strong. Trak i stop wantaem. Hem i bin save wantaem se, sapos hem i stap ron wetem olfala wil blong trak blong hem, bae hem i bangem trak long fored blong hem. Hem i talem se i wan merikel, mo i endem fon mesej ia wetem: “Tangkyu tumas”.
Mi wantem ripitim wanem we mi bin harem Sista Joy D. Jones i bin talem: “Bae mi neva talem se mi nao mi mekem samting we God nao i mekem wetem wan lav we i swit, i stret evriwan; be mi mi glad tumas se Hem i letem mi mi stap olsem wan smol pis blong pasol ia!”2
Brata Bytheway i talem: “Tedei, i gat wan we i stap aotsaed ia, wan neba, wan fren, wan memba blong wod, we i stap traem blong muv fored, we wil blong trak blong hem i nogud evriwan. Oli save posta long eni taem. Wil blong trak blong olgeta, maet i go wetem filing, o i long saed blong spirit, o long saed blong bodi, o [olsem we mi bin faenemaot], oli save ol stret wil blong trak.”3
Blong faenem mo helpem wanwan long yumi, yumi save mekem folem wanem we Presiden Dallin H. Oaks i mekem yumi tingbaot long hem, se: “Ol han blong yumi oli ol han blong Hem taem yumi lisingud long Hem mo yumi filim se yumi mas helpem wan long ol pikinini blong Hem.” Hem i stap talem long yumi: “Taem yu kasem wan filing, o tingting, mekem folem, nomata yu filim se i no stret tumas, o yu filim se i no wan stret samting blong folem. Mekem folem. I gat wan risen from. Maet yu no save risen, be ol blesing bae oli kam long yu, mo long ol narawan sapos yu harem Hem, mo sapos yu folem daereksen blong Hem.”4