Lokol Pej
Olsem Wanem Seminari I Stap Helpem Mi blong Mekem Gud long Skul
Olsem eni yangfala insaed long Jos Ia blong Jisas Kraes blong Ol Lata-dei Sent, mi bin go long seminari blong fo yia. Hemia i minim blong lanel gospel blong sam longfala aoa, antap long ol stadi aoa long Sandei mo wetem famli. Samtaem i wan eksperiens we i had, mo i testem mi.
Mi statem seminari long 2017, long Pare Wod long Arua Tahiti Stek. Mi bin stap long Yia 9 long skul long tetaem ia, mo mi bin wantem tumas blong mi pat blong yut grup ia.
Long fasfala yia blong mi, mi bin stap wekap long 5 klok moning long dei blong wik blong go long seminari long taem. Mi stap mekem ol riding blong mi, mo mi bin stap lisingud long klas. Mi bin luksave se seminari i bin helpem mi plante blong mi gat strong gud rilesensip wetem God. Sapos i no gat hem, bae mi no save gat sakses mo no save pasem Nasonol Setifiket long Yia 9 eksam.
Ova long nekis 2 yia afta, mi stap kam slak long ol diuti blong mi, mi mestem seminari, mo mi stap go let long seminari oltaem. Mi lusum hat blong mi blong wantem go long seminari, mekem se mi no stap mekem gud ol wok blong mi.
Nao, folem hemia, yia 10 blong mi i bin had long skul, be mi no bin save long tetaem ia se hemia i go wetem wei we mi stap mekem long seminari.
Long Yia 11, mi stat blong go aot wetem ol fren blong klas blong mi we oli stap go mekem ol samting we Jos i no laekem, olsem dring strong dring mo smokem sigaret. Mi iven filim se mi sem, from se mi no olsem ol fren ia, mo mi nomo go aot wetem olgeta.
Folem hemia, ol mak blong mi long skul oli godaon, mo sapos mi mas tekem eksam long yia ia, ating bae mi no save pasem nomo.
Afta, Kovid wol sik ia i jenisim evri dei laef blong mifala, mo mi talem tangkyu long God from. Taem we ol klas blong seminari oli stat long ol smatfon, i olsem se i kam blong blokem devel we i bin stap wokbaot insaed ia finis.
Nomata i bin gat wanwan taem we mi no bin strong, mi bin disaed blong hang long ples ia mo traem, wetem ful tingting blong mi, blong folem ol lesen blong seminari, blong kasem help blong God long ol stadi blong mi bakegen.
Angka Ia we I Sevem Laef blong Mi
Mi talem tangkyu from papa mo mama blong mi. Sapos i no tufala, bae mi lego seminari mo folem sem rod ia olsem ol fren blong mi we oli no memba. Ol fevret seminari tija blong mi, oli bin lukaotgud mi blong meksua se mi stap konek wetem God.
Afta, ol helti sosol rilesensip blong mi wetem ol yut blong wod oli kam ol laen blong laef blong mi. Ol aktiviti we mifala i bin gat tugeta, evri taem, i mekem mi mi kam niu evri taem we mi stap gat wan nogud taem. Long medel blong ol fren ia, i gat Corail Summers, we i neva jajem mi, be oltaem, i bin lisin mo i bin leftemap tingting blong mi, mo i bin leftemap mi tru long eksampol blong hem.
Long wanwan wei blong olgeta, wanwan long ol yut ia oli mekem se i gat balens long laef blong mi.
Oltaem ol hadwok i gat praes blong ol i kam wetem
Disiplin ia, blong draon evri dei insaed long ol skripja, i givim riwod long las yia blong seminari, mo semtaem mi bin stap long Yia 12, mo i las yia blong sekendri skul.
Ol evri dei fasin blong mi, blong seminari, oli letem mi blong mi oganaes i gud moa. Mi mi no laekem blong stap rid tumas, be mi traehad blong rid evri dei. I letem mi blong holemtaet rilesensip blong mi—nomata rilesensip ia i no strong tumas—wetem Papa long Heven.
Long yia ia, mi pasem bajela diploma blong mi wetem top mak. Mi kasem draeving laesens blong mi long fas raon. Mi kasem koling blong mi blong go long wan misin long Paris. Long evri samting, han blong God i bin stap insaed long laef blong mi long fultaem ia we mi bin stap long Seminari mo long skul.
Taem mi lukluk i gobak, mi testifae se God bae i oltaem help, from se Hem i lavem yu.
Seminari i stret samting we yumi nidim olsem ol yang pipol blong helpem yumi blong trastem God mo blong letem Hem i win insaed long laef blong yumi. Oltaem, Hem i bin trastem mi.