Welcome Niini nga Isyu

Ang Gugmang Walay Paglubad sa Walay Kataposang Pakigsaad sa Dios

Diha sa Oktubre 2020 nga kinatibuk-ang komperensiya, si Presidente Russell M. Nelson mihatag sa iyang makasaysayanong pakigpulong nga “Ipatigbabaw ang Dios Labaw sa Tanan.” Gihisgotan niya nga sobra sa 36 ka tuig, gitun-an niya ang pagpundok sa Israel, lakip ang mga pangalagad ni Abraham, Isaac, ug Jacob, ug “sa pakigsaad nga gihimo sa Dios uban kanila ug gipadayon tadlas sa ilang kaliwatan” (Liahona, Nob. 2020, 92).

Niadtong Marso 31, 2022, mipaambit siya og dugang pa gikan sa iyang mga pagtuon diha sa usa ka miting uban ang kinatibuk-an nga mga lider sa Simbahan. Mibati siya nga nadasig sa pagpaambit sa samang mensahe uban sa tanang miyembro sa Simbahan sa isyu niining bulana sa Liahona. Sa iyang artikulo, “Ang Walay Kataposan nga Pakigsaad” (tan-awa sa pahina 4), si Presidente Nelson nagtudlo og dugang sa unsay iyang nakat-onan mahitungod sa relasyon sa pakigsaad nga gitanyag sa Dios sa Iyang mga anak.

Ang pagkat-on nga ang Israel nagpasabot “ipatigbabaw ang Dios labaw sa tanan” miabli sa akong hunahuna sa pagkakita sa pagpundok sa Israel sa bag-o nga mga paagi. Karon akong nakaplagan nga si Presidente Nelson miabli sa akong salabotan samtang gipasabot niya ang kahulogan sa hesed, usa ka Hebreohanon nga pulong nga kasagarang gihubad isip “gugmang walay paglubad.” Ang pagsabot kon sa unsang paagi ang mga pakigsaad mopalambo niining mahigugmaong relasyon nga gusto sa Dios uban sa Iyang mga anak nakapausab kon giunsa nako pagtan-aw ang akong relasyon ngadto Kaniya.

Samtang atong tun-an ang mga pagtulon-an ni Jeremias mahitungod sa pagpundok sa Israel niining bulana diha sa Dali, Sunod Kanako, si Presidente Nelson nagtabang kanato nga makakita kon sa unsang paagi ang pagpili og katawhan sa pakigsaad dili usa ka buhat nga wala nag-apil sa tanan apan hinuon ang dalan ngadto sa hingpit nga paglakip sa tanan. Dili lang nga si bisan kinsa makadawat sa mga panalangin sa walay kataposang pakigsaad, apan kadtong kinsa mosulod niini nga pakigsaad mopasidungog niini pinaagi sa pagpaambit niini sa tibuok kalibotan.

Pagkanindot nga panalangin nga magkaanaa og mga propeta sa Dios, sa nangagi ug sa kasamtangan, nga motabang kanato sa pagpasabot kon unsaon nato nga makakonektar ngadto sa gugma sa Dios pinaagi sa Iyang walay kataposan nga pakigsaad!

Matinuoron,

Elder Michael T. Ringwood

Sa Seventy

Tigtambag ngadto sa mga Magasin sa Simbahan