Dali, Sunod Kanako

Jeremias 31

Unsaon Nato nga Matuman ang Bag-o ug Walay Kataposan nga Pakigsaad?

Detalye gikan sa Christ at Emmaus [Kristo diha sa Emmaus], ni Carl Heinrich Bloch

Pinaagi kang Jeremias, ang Ginoo mipahayag nga Siya “maghimo [og] bag-ong kasabotan uban sa katawhan sa Israel ug sa Juda” (Jeremias 31:31). Kini nga saad natuman sa atong adlaw sa dihang ang “pakigsaad gipadayag pag-usab ngadto sa mga tawo dinhi sa yuta ni Jesukristo pinaagi ni Propeta Joseph Smith. … Kon ang mga katawhan modawat sa ebanghelyo ug mosaad sa paghupot sa mga sugo sa Dios, ang Dios mohimo og pakigsaad sa paghatag kanila sa mga panalangin sa iyang bag-o ug walay kataposan nga pakigsaad.”¹

Ikonsiderar kini nga mga pangutana samtang inyong tun-an ang Jeremias 31:

• Asa man “isulat” sa Ginoo ang Iyang balaod? (tan-awa sa bersikulo 33).

• Unsa man ang buhaton sa Ginoo alang kanato kon atong tumanon ang atong mga pakigsaad? (tan-awa sa bersikulo 34).

• Unsa man ang buhaton sa Ginoo kon dili nato tumanon ang Iyang balaod? (tan-awa sa mga bersikulo 36–37).

Si Elder D. Todd Christofferson sa Korum sa Napulog Duha ka Apostoles mitudlo: “Ang bag-o ug walay kataposang pakigsaad mao ang ebanghelyo ni Jesukristo. Sa lain nga pagkasulti, ang mga doktrina ug mga sugo sa ebanghelyo naglangkob sa mahangtoron nga pakigsaad tali sa Dios ug sa tawo nga bag-o nga gipahiuli sa matag dispensasyon.”²

Panaghisgotan

Ang Ginoo misaad, “ibutang ko ang akong sugo sa ilang kaisipan ug isulat ko sa ilang kasingkasing” (Jeremias 31:33). Kanus-a ninyo nabati nga ang pakigsaad sa Ginoo nasulat diha sa inyong kasingkasing?

Mubo nga mga Sulat

1. Giya ngadto sa mga Kasulatan, “Bag-o ug Walay kataposan nga Pakigsaad,” churchofjesuschrist.org/study/scriptures/gs/new-and-everlasting-covenant?lang=ceb.

2. D. Todd Christofferson, “Ang Gahom sa mga Pakigsaad,” Liahona, Mayo 2009, 20.