Ang Damgo sa Akong Lolo

Ni Elder Jorge T. Becerra

Sa Seventy

Unsay nakita sa akong lolo nakatabang niya nga makasabot sa gahom ug kamatuoran sa ebanghelyo.

Sa dihang nagpakita siya ngadto kang Propeta Joseph Smith, si Moroni mikutlo og importante nga mga kasulatan ug mga pagtulon-an gikan sa Malaquias ug Isaias. Sa makapaikag nga paagi, mikutlo usab siya sa mosunod nga panagna gikan sa ikaduha nga kapitulo sa Joel:

“Unya ibubo ko ang akong espiritu sa tanang katawhan; ang inyong mga anak nga lalaki ug babaye magsangyaw sa akong mensahe; ang mga tigulang ninyo magdamgo, ug ang batan-on ninyong mga lalaki makakitag mga panan-awon” (Joel 2:28; tan-awa usab sa Joseph Smith—Kasaysayan 1:41).

Ang mga damgo usa ka paagi nga ang Ginoo mopadayag sa kamatuoran ngadto sa Iyang mga anak. Kini mahimong kabahin sa usa ka balaanon nga proseso nga Iyang gigamit aron sa pagpalawom sa espirituhanon nga pagsabot.

Diha sa Job atong mabasa:

“Kay ang Dios nagsulti diha sa usa ka paagi, ug sa duha, bisan ug ang tawo wala makasabot niini.

“Diha sa usa ka damgo, diha sa usa ka panan-awon sa gabii, sa diha nga ang paghinanok anaa sa katawhan, samtang natulog sila diha sa ilang mga higdaanan;

“Unya iyang buksan ang mga dalunggan sa katawhan, ug hadlokon sila pinaagi sa mga pasidaan” (Job 33:14–16).

Usa ka Kabilin sa Pamilya

Sa ingon niana nga damgo, ang mga dalunggan sa akong lolo nabuksan ug ang pasidaan nahatag, o nasilyo, nga mousab sa among pamilya sa kahangtoran.

Si Brígido Becerra nagdako sa Puebla, Mexico. Subo lang, nagdako siya nga walay amahan, ug sa edad nga 11, ang inahan ni Brígido namatay diha sa iyang mga bukton. Nabiyaan siya nga nag-inusara nga magpakabuhi kutob sa iyang mahimo. Niadtong panahona, walay sosyal nga mga programa o mga oportunidad sa pag-abag sa usa ka ilo nga batang lalaki sama ni Brígido. Walay bisan unsa nga giya o tawo nga moatiman kaniya, naadik si Brígido sa ilimnong makahubog. Kana nga pagkaadik negatibong nakaapekto sa hapit matag aspeto sa iyang kinabuhi.

Sa usa ka punto ang iyang pagkaadik nahimong grabe kaayo, nga nabati niya nga mawad-an siya sa iyang asawa ug mga anak. Sa kadesperado, mihukom siya nga mag-ampo. Wala siya gipadako nga adunay bisan unsang relihiyon ug mao nga mihalad og pag-ampo sa iyang kaugalingong paagi. Nangamuyo siya alang sa tabang sa pagbuntog sa iyang pagkaadik ug sinserong mitinguha og kalingkawasan gikan sa iyang mga problema.

Usa ka Tubag sa Pag-ampo

Sa milabay nga panahon human siya misulti nianang sinsero nga pag-ampo, ang sister nga mga misyonaryo sa Ang Simbahan ni Jesukristo sa mga Santos sa Ulahing mga Adlaw mibisita sa iyang panimalay. Nahimamat nila ang iyang asawa, si Julia, ug gisultihan ang mga bata mahitungod sa Primary diha sa lokal nga ward. Gitinguha nila karon ang pagtugot ni Brígido aron makatambong ang mga bata.

Ang mga sister nagsugod sa pagtudlo ni Brígido ug sa iyang pamilya mahitungod sa Pagpahiuli sa ebanghelyo ni Jesukristo. Kaniadto, ang mga misyonaryo nagtudlo gamit ang mga flannel board aron sa pagpakita og mga hulagway samtang nagtudlo sila. Atol niini nga leksiyon gipakita nila ang hulagway ni Propeta Joseph Smith. Nakaila dihadiha dayon si Brígido sa lalaki diha sa hulagway. Gisultihan niya ang sister nga mga misyonaryo nga nakaila siya niini nga lalaki. Naglibog sila sa unsay gisulti ni Brígido. Taga-Mexico siya ug si Joseph Smith nagpuyo ug namatay sa Estados Unidos daghang katuigan na sa wala pa gani matawo si Brígido. Walay paagi nga si Brígido nakaila ni Joseph Smith.

Ang Damgo

Gipaambit dayon sa akong lolo ang iyang damgo ngadto sa mga misyonaryo. Gisultihan niya sila nga nagdamgo siya nga nagtrabaho siya diha sa iyang gamay nga ranso nga namutol og alfalfa gamit ang iyang sundang ug nanguha og ubang pagkaon aron ipakaon sa iyang mga manok ug mga baboy. Samtang bisi siya nga nagtrabaho, usa ka dako nga halas ang miatake kaniya. Nakig-away ang akong lolo sa halas kutob sa iyang mahimo, apan milikos kini kaniya, miabli sa baba niini, ug hapit na unta siyang lamyon nga tibuok.

Nianang panahona gayod sa kapeligro, usa ka lalaki nga nagsul-ob og puti, ug naggunit og espada, miputol sa ulo sa halas. Samtang nahulog kini nga namatay diha sa tiilan ni Brígido, mihangad siya aron sa pagtan-aw kon kinsa ang miluwas sa iyang kinabuhi. Wala siya makaila sa lalaki apan mitimaan nga nagsul-ob siya [ang lalaki] og puti. Dayon gipasabot niya nga ang lalaki diha sa hulagway nga gipaambit sa mga sister mao ang lalaki diha sa iyang damgo. Dihadiha dayon nailhan ni Brígido nga mao kini ang lalaki diha sa iyang damgo, ang lalaki nga miluwas kaniya. Karon nasayod na siya nga ang ngalan sa lalaki mao si Joseph Smith.

Kini nga damgo usa ka tataw nga kasinatian sa pagkat-on alang sa akong lolo. Nabati niya nga kini usa ka direkta nga tubag sa iyang mga pag-ampo ug mga pangamuyo. Miingon siya nga nabati niya nga ang halas mao ang usa ka representasyon sa iyang pagkaadik ngadto sa mga ilimnong makahubog. Ug nakasabot siya, nga pinaagi sa gamhanan nga mga pagtulon-an ni Propeta Joseph Smith ug sa doktrina sa gipahiuli nga ebanghelyo ni Jesukristo, nga siya makabuntog sa iyang pagkaadik. Nasayod siya nga makakaplag siya og kahupayan ug makadawat sa hingpit nga mga panalangin sa Pag-ula ni Jesukristo.

Ang lolo ni Elder Becerra, si Brígido Becerra ug iyang asawa, gilitratohan sa ilang bugtong nga pagbisita sa Estados Unidos.

Litrato sa maayong kabubut-on sa tagsulat

Usa ka Panalangin alang sa mga Henerasyon

Wala madugay human sa pagpaambit niini nga kasinatian ngadto sa sister nga mga misyonaryo, ang akong lolo si Brígido Becerra nabunyagan isip usa ka miyembro sa Ang Simbahan ni Jesukristo sa mga Santos sa Ulahing mga Adlaw. Gihigugma niya ang ebanghelyo ni Jesukristo. Aduna siyay espesyal nga gugma alang sa Basahon ni Mormon ug sa tanang propeta, ilabi na kang Joseph Smith.

Ang damgo sa akong lolo migiya kaniya ngadto sa tinuod nga ebanghelyo ni Kristo ug wala lang miluwas kaniya gikan sa usa ka kinabuhi sa pagkaadik ug kagul-anan apan mipanalangin usab sa mga henerasyon sa matinud-anon nga mga miyembro sa Simbahan. Sa dihang mitaliwan ang akong lolo sa edad nga 98, mibiya siya og mga 120 ka kaliwat—mga anak, mga apo, mga apo sa tuhod, ug mga apo sa apo. Ang matag usa naapektohan sa iyang damgo ug sa iyang kabilin sa pagpamatuod ug kamatinud-anon ngadto sa Simbahan ug ngadto sa Manluluwas, si Jesukristo.

Sama ni Daniel diha sa Daang Tugon, ang akong lolo nakasabot nga “may Dios sa langit nga nagpadayag sa mga tanghaga” (Daniel 2:28).

Nganong Matinuod ang mga Damgo?

Ang uban tingali mangutana kon nganong ang uban kanato usahay adunay mga damgo nga adunay espirituhanon nga katuyoan. Sa kinatibuk-ang komperensiya, si Elder David A. Bednar sa Korum sa Napulog Duha ka Apostoles mipaambit og kasinatian nga adunay kalabotan sa mga damgo. Namulong siya bahin sa usa ka dinasig nga lider sa pagkapari kinsa naaghat nga hibaloon ang mga ngalan sa tanang kabatan-onan diha sa iyang stake. Wala madugay human nahibaloan sa lider ang tanan nilang ngalan, ang Ginoo mipadayag og kamatuoran pinaagi sa usa ka damgo.

“Usa niana ka gabii, ang lider sa pagkapari nagdamgo kalabot sa usa sa batan-ong lalaki nga iyang nailhan sa litrato lamang,” miingon si Elder Bednar. “Diha sa damgo iyang nakita ang batan-ong lalaki nga nagsul-ob og puti nga polo ug adunay missionary name tag. Adunay kauban nga naglingkod sa iyang tupad, ang batan-ong lalaki nagtudlo og usa ka pamilya. Ang batan-ong lalaki naggunit og Basahon ni Mormon, ug makita nga daw nagpamatuod siya sa katinuod sa basahon. Dayon ang lider sa pagkapari nahigmata gikan sa iyang damgo.

“Sa sunod nga panagpundok sa pagkapari, ang lider miduol sa batan-ong lalaki nga iyang nakita sa iyang damgo ug mihangyo nga makigsulti kaniya sa makadiyot. Human sa mubo nga pag-ilaila, gitawag sa lider ang batan-on sa iyang ngalan ug miingon: ‘Ako dili tigdamgo. Wala gayod ako makadamgo bisag usa ka miyembro niini nga stake, gawas kanimo. Sultihan ka nako sa akong damgo, ug dayon gusto ako nga motabang ka nako nga makasabot unsa ang gipasabot niini.’

“Giasoy sa lider sa pagkapari ang damgo ug nangutana sa batan-ong lalaki kon unsa ang kahulogan niadto. Nasud-ipan tungod sa pagkahinuklog, ang batan-ong lalaki yanong mitubag, ‘Kini nagpasabot nga ang Dios nakaila kinsa ako.’”¹

Tingali mao kana ngano nga nadawat sa akong lolo ang iyang saksi diha sa usa ka damgo. Kadto usa ka kasegurohan nga ang Dios nasayod kon kinsa siya ug sa kabilin nga iyang mabilin. Ang iyang damgo usa ka saksi sa kamatuoran sa ebanghelyo ni Jesukristo, ug kini adunay gamhanan nga epekto sa daghan sa iyang kaliwatan alang sa kahangtoran.

Ang Ginoo mopadayag gayod sa Iyang mga sekreto kanato. Ang paagi diin makadawat kita og personal nga pagpadayag lahi-lahi tungod kay kitang tanan managlahi ug tungod kay Siya usa ka Dios nga personal nga makig-istorya sa matag usa sa Iyang mga anak. Kon kini usa man ka panan-awon, usa ka hunahuna, usa ka tingog diha sa atong hunahuna, usa ka pagbati, o usa ka damgo, sa pagkatinuod Siya makig-istorya gayod kaninyo ug kanako.