“Gipasinawan Niya ang Among mga Sapatos,” Liahona, Okt. 2022.
Mga Tingog sa mga Santos sa Ulahing mga Adlaw
Gipasinawan Niya ang Among mga Sapatos
Ang Kristohanon nga serbisyo ni Paulo mitudlo kanako mahitungod sa gasa sa Pag-ula sa Manluluwas sa usa ka paagi nga mibilin og permanente nga impresyon sa akong kalag.
Samtang nagserbisyo ko isip usa ka misyonaryo sa Brazil Salvador South Mission, ang walo ka misyonaryo sa among zone kasagaran magkaubang mangaon sa panimalay ni Paulo, usa ka miyembro sa Itapua Ward. Mangaon kami uban niining samang pamilya kada semana sa usa ka piho nga adlaw.
Sa usa ka piho nga adlaw nangaon kami diha sa panimalay ni Paulo ug sa iyang asawa ug anak nga babaye. Nag-ulan kadto sa tibuok semana, ug ang mga dalan napuno sa tubig. Kasarangan ang panimalay ni Paulo, nga adunay semento nga salog nga nahamis sa paglabay sa panahon. Ang iyang pamilya walay igong lingkoranan alang sa tanang walo ka misyonaryo, mao nga ang kadaghanan kanamo naglingkod sa salog.
Si Paulo usa ka kinabig sa Simbahan kinsa wala nakabaton sa oportunidad nga moserbisyo og misyon. Sa dihang nahuman na namo ang among pagpangaon, nangutana siya kon asa kami moadto alang sa among mga paningkamot sa pagsangyaw sa ebanghelyo nianang hapona. Gisultihan namo siya nga moadto kami sa buhatan sa misyon alang sa among regular nga mga interbiyo uban sa presidente sa misyon.
“Elders,” miingon siya, nga nagtan-aw sa among mga sapatos nga napuno og lapok, “dili kamo mahimong makigkita sa inyong presidente sa misyon nga adunay mga sapatos nga ingon niana og dagway!”
Misulod siya sa iyang kwarto ug mibalik nga adunay lata sa pagpasinaw sa sapatos nga hapit na walay sulod. Dayon miluhod siya sa salog ug nagsugod sa pagpasinaw sa among mga sapatos.
Giunsa man niini nga tawo kinsa misakripisyo na og maayo aron sa pagpakaon og walo ka gigutom nga mga misyonaryo kada semana sa pagpasinaw pa gihapon sa among mga sapatos? Ako ang usa sa kataposan sa linya, ug mihukom ako nga mabinationg mobalibad kon moabot na ang akong turno. Apan sa dihang miabot na siya sa akong mga sapatos, nasayod ako nga kon akong isalikway ang iyang tanyag, akong isalikway ang usa ka sagrado nga gasa gikan sa usa ka mapainubsanon gayod nga tawo.
Tungod sa Kristohanon nga serbisyo ni Paulo, nabati nako akong kasingkasing nga napuno gayod sa hingpit nga kalipay matag higayon nga maghunahuna ako kaniya. Gitudloan ko niya mahitungod sa gasa sa Pag-ula sa Manluluwas sa paagi nga mibilin og permanente nga impresyon sa akong kalag.
Si Jesukristo miantos og dakong kasakit alang sa matag indibidwal. Kon andam kita nga modawat sa Iyang tanyag alang kanato, maghinulsol sa atong mga sala ug mosunod Kaniya, ang atong gugma alang Kaniya molambo (tan-awa sa Doktrina ug mga Pakigsaad 88:33). Ang Iyang gugma alang kanato hingpit nga matuman kon atong dawaton ang unsay gawasnon Niyang gihatag ngadto sa tanan nga mahinulsolon ug mabasolon.