Digital Lamang: Mga Young Adult
3 ka Baroganan Nga Nakatabang Kanako nga Mobalik ngadto ni Kristo
Ang pagserbisyo, gugma nga putli, ug pailob mao ang importante kaayo sa pagtabang sa daghang tawo nga ingon og wala tay gahom sa pagtabang.
Dihang 15 anyos ko, aduna akoy interaksiyon [uban ang usa ka tawo] sa simbahan nga nakapasakit kanako. Dili na gayod ko gusto nga mobalik human niana nga adlaw. Ang akong nagtubo nga pagtuo ug paglaom nahugno samtang hinay-hinay kong nawad-an sa akong pagtutok sa akong balaanon nga pagkatawo. Mibati ako og daghang pagduhaduha ug wala makakaplag og bisan unsang tubag.
Mao nga, misulay ko sa pagpangita og kahulogan gawas sa ebanghelyo. Nagkaanam gayod ko og kalayo samtang daghan sa akong mga minahal nagtan-aw nga adunay kabalaka. Ang akong mga ginikanan naningkamot sa pagtabang sa bisan unsang paagi. Daghang higala ang milakip kanako sa mga kalihokan. Apan wala ko nakasinati og “dako nga kausaban nga nahimo diha sa [akong] kasingkasing” (Alma 5:12). Apan, sa paglabay sa panahon, samtang ang mga tawo diha sa akong kinabuhi mipaambit og Kristohanon nga gugma ug mihatag og maayo nga mga ehemplo, nakat-onan nako ang kahulogan sa plano sa Dios alang kanako.
Kon kamo adunay minahal nga nanglimbasog sa ilang pagtuo, tingali naghunahuna kamo kon unsaon ninyo nga makatabang kanila. Sa akong sitwasyon, ang akong mga minahal milihok isip mga sulugoon sa Ginoo. Ang ila kadtong gugma ug debosyon nga mipabalik kanako sa ebanghelyo.
Ug mahimo usab ninyo ang sama alang sa usa ka tawo nga inyong gihigugma.
Ania ang tulo ka baroganan nga gibuhat sa akong mga minahal nga nakatabang kanako nga makakita sa gugma sa Langitnong Amahan alang kanako:
1. Serbisyo
“Kay ako nahinumdom sa pulong sa Dios nga nag-ingon nga pinaagi sa ilang mga buhat kamo masayod kanila; kay kon ang ilang mga buhat maayo, sila maayo usab” (Moroni 7:5).
Ang akong bishop, usa ka nindot kaayo nga higala ug ehemplo kanako, padayong midapit kanako sa pagpangalagad uban kaniya bisan kon wala nako magtambong sa Simbahan. Importante gayod kaayo siya nga tawo kanako nga dili ko makabalibad sa iyang mga pagdapit. Aduna kami dili maihap nga nindot nga mga kasinatian sa pagserbisyo niadtong among gibisitahan, ug kanunay siyang mitanyag sa pagpaambit og mga panabot sa ebanghelyo ngadto kanila aron dili ako mahimong dili komportable.
Miserbisyo siya kanako samtang midapit usab kanako sa pagserbisyo sa uban, ug kana mihimo og dako kaayo nga kalainan sa pagbalik ngadto ni Kristo.
2. Gugma nga Putli
“Ug ang gugma nga putli mainantoson, ug mabination, ug dili masinahon, dili manghambog, dili mangita alang sa iyang kaugalingon, dili dali nga masuko dili maghunahuna sa daotan … [Ang gugma nga putli] mainantoson sa tanan nga mga butang, matuohon sa tanan nga mga butang, molaom sa tanan nga mga butang, ug molahutay sa tanan nga mga butang” (Moroni 7:45).
Ang akong amahan usa ka talagsaong ehemplo ngari kanako sa gugma nga putli. Kanunay siyang mipakita kanako og gugma nga putli, dili igsapayan sa akong mga gituohan o mga pagpili. Atol sa usa ka lisod kaayo nga panahon sa akong kinabuhi, nakig-istorya ko sa akong amahan ug gitubag ko niya uban sa “tiunay nga gugma ni Kristo” (Moroni 7:47). Naminaw siya nga walay paghukom sa akong mga kabalaka ug mihatag kanako og yano ug bililhon nga tambag.
Usa sa labing gamhanan nga mga butang nga inyong mabuhat alang sa inyong mga minahal mao ang pagpakita kanila og Kristohanon nga gugma, bisan unsa pa ang ilang mga pagpili.
3. Pailob
“Paniguroa nga ang inyong pagkamalahutayon mahingpit aron mahingpit gayod kamo ug dili makulangan sa bisan unsa” (James 1:4).
Mibalik ako sa Simbahan human sa napulo ka tuig nga wala pagtambong, ug ang akong inahan mibuhat og labaw pa uban sa Kristohanon nga pailob. Siya wala gayod mipugos kanako o nasagmuyo kanako. Siya mihigugma kanako, mihinumdom sa akong bili, ug nakahibalo nga ang Espiritu ug ang Langitnong Amahan nag-impluwensiya kanako.
Dili nato madali-dali ang buhat sa Ginoo o pugson ang usa ka tawo sa pagbuhat sa usa ka butang. Hinuon, mahimo kitang magpabilin nga duol ngadto sa Espiritu aron makahibalo kon panahon na ba sa pagdapit o pagserbisyo niadtong atong gihigugma.
Sa dihang mipili ang uban sa pagserbisyo, paghigugma, ug mahimong mapailobon kanako, napanalanginan ako og mga kahigayonan ug mga relasyon nga wala unta nahimong posible kon wala ang ilang tabang. Kini mao ang kahayag sa Manluluwas, ilabi na kon kini gipakita sa atong mga aksiyon, nga mogiya sa uban balik ngadto sa hingpit nga kalipay sa Iyang ebanghelyo. Ang akong mapainubsanon nga saksi mao nga ang Dios nahigugma kanatong tanan dili igsapayan kon hain kita sa kinabuhi o kon unsa ang atong nabuhat, apan Siya mas makapanalangin pa gayod kanato kon kita moduol ngadto Kaniya. Mapasalamaton kaayo ko alang sa ebanghelyo, ug nagpamatuod ko nga sa pagkatinuod pinaagi kadto sa Kristohanon nga mga ehemplo niadtong anaa sa akong kinabuhi nga nakabalik ko.