“Mga Luha sa Kaguol, Mga Luha sa Kalipay,” Liahona, Okt. 2022.
Mga Tingog sa mga Santos sa Ulahing mga Adlaw
Mga Luha sa Kaguol, Mga Luha sa Kalipay
Ang kamatayon sa akong inahan sakit kaayo, apan ang akong kasakit “[n]abuntog diha sa hingpit nga kalipay ni Kristo.”
Usa ka Dominggo sa hapon, nagsugod ko sa paghunahuna mahitungod kang Jesukristo ug sa Iyang maulaong sakripisyo. Kadto nga mga hunahuna nakatabang kanako nga mobati nga luwas ug walay kadaot.
Apan, kalit lang, nahinumdoman nako ang nagsaka nga mga kaso sa COVID-19 sa akong nasod. Dihadiha dayon, mibati ko og kaguol alang sa mga tawo sa tibuok kalibotan kinsa nag-antos. Miingon ko sa akong kaugalingon, “Wala nila nabati ang samang seguridad ug kalinaw nga akong nabati.” Kadto nga mga pagbati mipaluhod kanako, ug nagsugod ako sa pag-ampo.
Nag-ampo ako alang niadtong kinsa nangamatay, ingon man alang niadtong kinsa nawad-an og mga minahal. Midanguyngoy ko alang kanila tungod kay nasayod ko sa kasakit nga moabot uban sa pagkawala sa usa ka tawo nga imong gihigugma. Atol sa tibuok kalibotan nga COVID-19 nga pandemya, daghan ang nag-inusarang nagpas-an sa kabug-at sa pagkawala sa usa ka minahal.
Dayon nakahunahuna ko sa akong inahan, kinsa mitaliwan sa dihang singko anyos ako. Samtang nagpadayon og dagayday ang mga luha sa akong mga aping, nag-ampo ko sa Langitnong Amahan kabahin sa akong dakong kamingaw kaniya. Dayon nakahinumdom ko nga si Jesus midanguyngoy uban ni Maria ug Marta human si Lazaro, ilang igsoon nga lalaki ug Iyang higala, namatay (tan-awa sa Juan 11:19–35). Ang Iyang kapuangod mihupay kanako, apan mitulo gihapon ang mga luha samtang naghunahuna ko sa akong dakong kamingaw sa akong inahan.
Samtang nagpadayon ko sa pag-ampo, gilakip nako ang akong mama sa akong pag-ampo. Naghunahuna ako kaniya ug gihanduraw siya diha sa akong atubangan. Gisultihan nako ang Langitnong Amahan kon unsa ka dako ang akong gugma kaniya ug kamingaw kaniya. Gipasalamatan nako Siya alang sa panahon nga kauban nako akong mama dinhi sa kalibotan. Gimingaw ko niya, apan nagtuo ko nga usa ka adlaw magkita kami pag-usab ug magkauban isip usa ka pamilya sa kahangtoran.
Mihunong ko, ug ang akong kasingkasing napuno sa paglaom. Nag-ampo ko sa Langitnong Amahan nga panalanginan ang akong amahan ug ako nga makalahutay hangtod nga makita namo pag-usab ang akong mama. Dayon mihilak ko og mga luha sa kalipay ug paglaom alang nianang mahimayaong pagpundok nga nahimong posible pinaagi sa Pagkabanhaw sa Manluluwas.
Mibati ako og dako kaayo nga pasalamat sa Langitnong Amahan alang sa plano sa kaluwasan. Ang kamatayon sa akong inahan sakit kaayo, apan ang akong kasakit “[n]abuntog diha sa hingpit nga kalipay ni Kristo” (Alma 31:38). Mapasalamaton ko alang Kaniya. Gibag-o Niya ang akong paglaom sa kinabuhi nga umaabot. Ang Iyang Pagkabanhaw mas adunay kahulogan kanako karon kay sa kaniadto. Makita nako ang akong inahan pag-usab tungod sa akong Manluluwas.