Dali, Sunod Kanako

Jeremias 1

Ang Dios Nakaila Kanako Sa Wala Pa Ako Matawo

Nagpuyo kita kauban sa Langitnong Amahan sa wala pa kini nga kinabuhi. “Ang atong personal nga panaw wala magsugod diha sa pagkahimugso. Sa wala pa kita matawo, nag-uban kita didto sa usa ka kalibotan sa pagpangandam diin kita ‘midawat sa [atong] unang mga leksiyon didto sa kalibotan sa mga espiritu’ [Doktrina ug mga Pakigsaad 138:56].”¹ Giklaro kini nga kamatuoran sa Ginoo ngadto kang propeta Jeremias sa dihang Siya miingon, “Sa wala pa nako ikaw buhata diha sa taguangkan nakaila na ako kanimo, ug … gipili ko ikaw nga propeta ngadto sa kanasoran” (Jeremias 1:5).

Gihatagan ba kita sa Ginoo usab og mga misyon nga tumanon?

Si Sister Wendy W. Nelson miingon:

“Sa premortal nga kinabuhi kamo ug ako gihatagan og talagsaong mga misyon nga tumanon samtang ania kita sa yuta. …

“Ang pagpili anaa ra kaninyo ug kanako. Buhaton ba nato ang bisan unsa nga gikinahanglan aron matuman ang talagsaong mga misyon diin gipadala kita sa yuta?”²

Sa samang hilisgotan, si Elder Bruce R. McConkie (1915–85) sa Korum sa Napulog Duha ka Apostoles mitudlo, “[Si Apostol Pablo] miingon usab sa mga miyembro sa Simbahan nga ‘sa wala pa matukod ang kalibotan, ang Dios nagpili kanato diha kang Kristo aron kita mabalaan ug dili masaway diha sa iyang atubangan pinaagi sa gugma,’ ug nga kita giorden nang daan nga mahimong ang mga anak ni Jesukristo pinaagi sa pagsagop, sa ingon makabaton og ‘kapasayloan alang sa atong mga kalapasan’ niini nga kinabuhi ug usa ka kabilin sa mahangtorong himaya sa umaabot nga kinabuhi [Mga Taga-Efeso 1:7].”³

Panaghisgotan

Sa unsang paagi nga makatabang kaninyo ang paghinumdom nga ang Dios nakaila kaninyo sa wala pa kamo matawo? (tan-awa sa Jeremias 1:5; tan-awa usab sa Abraham 3:22–23).

Sa unsang paagi nga ang pagkahibalo nga mipili kamo sa pagsunod sa plano sa Langitnong Amahan diha sa kinabuhi sa wala pa dinhi sa yuta makaapekto sa inyong mga pagpili niini nga kinabuhi? (tan-awa sa 2 Nephi 2:26–27; Abraham 3:25–26).

Mubo nga mga Sulat

1. Neil L. Andersen, “Ang Personal nga Panaw sa usa ka Anak sa Dios,” Liahona, Mayo 2021, 46.

2. Wendy W. Nelson, “Paglaom sa Israel” (tibuok kalibotan nga debosyonal sa kabatan-onan, Hunyo 3, 2018), HopeofIsrael.ChurchofJesusChrist.org

3. Bruce R. McConkie, “God Foreordains His Prophets and His People,” Ensign, Mayo 1974, 73; tan-awa usab sa Gospel Topics, “Foreordination,” topics.ChurchofJesusChrist.org.