Unsaon Nako nga Mabati ang Espiritu Pag-usab?

Ni Stephanie Self Hirtle, Oregon, USA

Sa dihang ang choir mikanta sa “Jesus, Kanhi Kabos,” ang grabe nga mga pagbati sa depresyon nga nagpalibot kanako nagsugod sa pagkahanaw.

Bisan atol sa akong kinalisoran nga mga panahon, kanunay nakong nabati ang kalinaw sa akong mga pagsulay pinaagi sa Espiritu Santo. Apan nausab kana sa dihang nagpatambal ko alang sa dugay na nga kasakit nga mihimo kanako nga naglubog na lang sa katre sulod sa duha ka bulan.

Ang kasakit mimenos human natapos ang pagpatambal, apan nagsugod ko sa pagpakigbisog sa depresyon. Sa samang higayon, murag para nako nawad-an ko sa akong abilidad nga mobati sa Espiritu.

Sulod sa unom ka bulan, gibati nako nga gibiyaan ug desperadong nagtinguha nga mobati sa Espiritu pag-usab. Ang akong pagkaayo dugay ug sakit, nga ingon og mas lisod pa gani nga wala ang Espiritu.

Nakigtagbo ko sa akong bishop, kinsa mipasabot nga ang depresyon usahay mosalipod sa Espiritu nga dili nato kini mabati. Ang iyang tambag mihupay kanako, ug ang usa ka panalangin sa pagkapari gikan sa akong bana mihatag kanako og dugang nga kalig-on samtang malaomon akong naghulat nga mobati sa Espiritu Santo pag-usab.

Ang kinatibuk-ang komperensiya kanunay nga nahimong usa ka tinubdan sa espirituhanon nga kalig-on kanako, apan atol sa pangbukas nga sesyon sa Abril 2019 nga kinatibuk-ang komperensiya, wala akoy nabati. Nausab kana atol sa sunod nga sesyon sa dihang ang usa ka hiniusa nga choir gikan sa Brigham Young University mikanta sa “Jesus, Kanhi Kabos.”¹

Ang mga pulong sa awit ug ang paghulagway ni Jesukristo isip usa ka kordero milukmay sa akong kasingkasing. Nakaamgo ako nga ang usa ka bungbong sa kasuko, depresyon, ug sayop nga mga pagbati sa pagkabiniyaan misalipod sa akong abilidad nga mobati sa Espiritu. Ang grabe nga mga pagbati sa depresyon mipalibot kanako, nga naghimong imposible sa Espiritu nga makasulod sa akong kasingkasing. Sa dihang ang choir mikanta sa ikaduhang bersikulo, kana nga grabe nga mga pagbati nagsugod sa pagkahanaw.

Si Elder Jeffrey R. Holland sa Korum sa Napulog Duha ka Apostoles misunod sa himno sa iyang pakigpulong nga “Tan-awa ang Kordero sa Dios.”² Uban sa dugang nga gahom sa iyang mga pulong, nabati gayod nako og maayo ang gugma alang sa Manluluwas ug sa Langitnong Amahan.

Daghang babag ang makabalda kanato sa pagbati sa Espiritu, apan makabuntog kita niini nga mga babag uban ang tabang gikan sa Langitnong Amahan ug sa Iyang Anak. Hingpit nga nakasabot si Jesukristo sa akong mga pagpakigbisog. Tungod sa gugma alang kanato ug sa Iyang Amahan, “Dugo, luha, mitulo.”³

Ang Langitnong Amahan nasayod kon unsay maghatag kanato og kahupayan, ug nasayod Siya kon kanus-a kita panalanginan alang sa atong kinadak-an nga espirituhanon nga paglambo.