30 ka Yano nga mga Paagi sa Pagtabang sa Pagpundok sa Israel

Ni Brittany Beattie

Mga Magasin sa Simbahan

Makatabang kamo sa pagpundok sa Israel sa daghang paagi. Kini nga mga ideya makatabang kaninyo sa pagsugod samtang magtinguha kamo og inpirasyon mahitungod kon unsay ipabuhat sa Langitnong Amahan kaninyo.

Imahe

batan-on nga babaye nga nagbasa sa mga kasulatan

Litrato pinaagi ni Cody Bell

Sa iyang makasaysayon nga pakigpulong, “Paglaom sa Israel,” si Presidente Russell M. Nelson mitudlo: “Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug templo, nagtabang kamo sa pagpundok sa Israel. Ingon lang niana ka yano.”¹

Si Presidente Russell M. Nelson miingon usab: “Ang Ginoo mipadali sa Iyang buhat sa pagpundok sa Israel. Kana nga panagpundok mao ang labing importanting butang nga nahitabo sa yuta karon. Walay makatandi niini sa gidak-on, walay makatandi niini sa kaimportante, walay makatandi niini sa kahalangdon. Ug kon pilion ninyo, kon gustohon ninyo, mamahimo kamong dakong bahin niini. Mahimo kamong dakong parte sa usa ka dakong butang, mahinungdanong butang, halangdong butang!”²

Maayo gani, ang pagkahimong bahin niining mahinungdanon nga kawsa wala nagkinahanglan kanunay og grande nga mga buhat—ang yano nga mga butang nga atong gibuhat matag adlaw makahimo og dako nga kalainan. Ang mga ideya sa ubos makatabang kaninyo nga makahunahuna og pipila ka paagi sa pagtabang sa pagpundok sa Israel.³ Samtang kamo morebyo niini ug magtinguha og personal nga pagpadayag alang sa dugang nga mga ideya, pag-ampo nga ang Langitnong Amahan mopanalangin kaninyo nga makahibalo pinaagi sa Espiritu kon unsa ang inyong mabuhat aron mas maayong makatabang sa pagpundok sa Israel sa duha ka habig sa tabil.

Sunda ang ebanghelyo isip usa ka sumusunod ni Jesukristo.

Si Presidente Spencer W. Kimball (1895–1985) mitudlo nga “ang dakong pagtubo nga moabot sa Simbahan sa kataposang mga adlaw moabot tungod kay daghang buotang mga babaye sa kalibotan … ang mapaduol sa Simbahan sa tumang kadaghan. Kini mahitabo sa kahimtang nga ang mga babaye sa Simbahan moaninaw sa pagkamatarong ug sa ilang pagkamaayo og abilidad sa pagpahayag sa ilang mga kaugalingon ug sa kahimtang nga ang mga babaye sa Simbahan makita nga talagsaon ug lahi––sa malipayong paagi––gikan sa mga babaye sa kalibotan.”⁴ Ang mga lalaki sa samang paagi mamahimong usa ka lig-on nga impluwensiya sa pagdani sa uban ngadto sa Langitnong Amahan ug ni Jesukristo pinaagi sa pagsunod sa ehemplo sa Manluluwas.

Samtang kita mosunod sa ebanghelyo, ang uban madani ngadto sa atong kahayag, hingpit nga kalipay, hugot nga pagtuo, ug pagtutok, ug mahimong makapadasig kini kanila nga gustong magkat-on pa og dugang mahitungod sa Langitnong Amahan, ni Jesukristo, ug sa mga baroganan ug mga ordinansa sa ebanghelyo. Makatabang kita sa uban nga moduol ngadto sa Langitnong Amahan ug ni Jesukristo samtang kita:

Mabinationg mopanalipod sa unsay atong gituohan ug motabang sa uban nga makasabot kon nganong mahinungdanon kanato ang doktrina.
Maghisgot kon sa unsang paagi ang pagbasa sa Basahon ni Mormon ug ang ubang mga kasulatan mopanalangin kanato, ug mopaambit og kopya sa Basahon ni Mormon ngadto sa uban o moawhag kanila nga i-download ang Basahon ni Mormon nga app.
Mosunod sa mga sumbanan sa ebanghelyo, lakip niadtong anaa sa Alang sa Kalig-on sa mga Kabatan-onan, dili igsapayan sa atong edad. Pangandam sa paghisgot kon nganong mipili kita sa pagsunod sa mga sumbanan nga atong gibuhat ug sa unsang paagi ang pagbuhat sa ingon mopanalangin sa atong mga kinabuhi.
Modapit sa uban nga moapil uban kanato sa pagsunod sa ebanghelyo—gikan sa paghatag og serbisyo ngadto sa pagsunod sa mga sumbanan sa ebanghelyo—aron makasinati sa mga kalipay nga atong nabati.
Moapil sa Kabataan ug Kabatan-onan ug dayon maghisgot sa uban kon sa unsang paagi si Kristo nagtabang kanato nga molambo ug mouswag sa tanang aspeto sa atong mga kinabuhi.
Morekord og espirituhanon nga mga kasinatian diha sa atong journal. Ipaambit kini karon, ingon nga angay ug ingon nga giaghat, ngadto sa atong pamilya ug usab ipreserbar kini aron ang umaabot nga mga henerasyon makakaplag og kalig-on pinaagi sa atong matinud-anon nga mga kasinatian.
Magtuon ug magtinguha nga mas makapalambo og Kristohanong mga hiyas. Ang mga ideya sa kapitulo sayis sa Isangyaw ang Akong Ebanghelyo makahatag og nindot nga pagsugod.

Pakigkonektar sa uban.

Ang pagtabang sa uban nga moduol ngadto ni Kristo magsugod sa pagmugna og mga koneksiyon ngadto kanila. Kon mas daghang tawo ang atong maila-ila, mas daghang tawo ang atong matabangan nga madala ngadto sa Langitnong Amahan ug ni Jesukristo. Hunahunaa kon unsaon nato:

Ipaila-ila ang atong kaugalingon ngadto sa mga tawo nga atong mahimamat sa tibuok natong komunidad. Pagmugna og bag-o nga mga panaghigalaay aron ang uban gusto nga makahibalo og dugang mahitungod sa atong mga kinabuhi ug mga tinuohan.
“Pangandam kamo kanunay pagtubag kang bisan kinsa nga magpakisayod [kanato] mahitungod sa [atong] paglaom” (1 Pedro 3:15).
Pagkat-on og mga pinulongan aron mas maayo kitang makatabang sa mga tawo gikan sa atong nasod o sa ubang nasod. Basaha mahitungod sa unsang paagi gidawat ni Presidente Nelson ang pagdapit sa pagkat-on og Ininsek ug sa unsang paagi kini mitabang kaniya sa pagserbisyo sa katawhan sa China.
“Pag-ampo matag adlaw nga ang tanang anak sa Dios makadawat sa mga panalangin sa ebanghelyo ni Jesukristo.”⁵
Pag-ampo nga ang tanang nasod mahimong bukas sa pagsangyaw sa ebanghelyo.
Ipaambit ang mga kasinatian sa social media o sa personal mahitungod kon sa unsang paagi ang Langitnong Amahan ug si Jesukristo mopanalangin sa atong kinabuhi ug sa unsang paagi ang atong hugot nga pagtuo Kanila naghatag kanato og kalig-on.
Pagserbisyo sa uban sa ngalan ni Kristo ug pahibaloon sila nga kita nagserbisyo kanila alang Kaniya.

Andama ang inyong kaugalingon sa espirituhanong paagi.

Aron sa pagtabang sa uban nga mangandam aron makahimo ug makatuman sa sagrado nga mga pakigsaad ngadto sa Dios, kinahanglan gibuhat nato ang samang butang. Makahimo kitang:

Mag-ampo matag adlaw aron mahibalo kon unsaon nato nga mahimong mga instrumento diha sa buhat sa Ginoo, ug dayon lihokon ang mga pag-aghat nga moabot sa tibuok adlaw.
Magtuon sa mga kasulatan kada adlaw, lakip ang pag-apil sa Dali, Sunod Kanako nga pagtuon. Kon mas nakahibalo kita mahitungod sa ebanghelyo, mas makapaambit kita niini ngadto sa uban.
“Mousab sa [atong] [mga] panimalay ngadto sa usa ka santuwaryo sa hugot nga pagtuo,” mitudlo si Presidente Nelson, ug “makugihon … nga molihok aron sa pagbag-o sa [atong] [mga] panimalay ngadto sa usa ka sentro sa pagkat-on sa ebanghelyo.”⁶
Pagtuon pa og dugang mahitungod sa mga pakigsaad diha sa mga kasulatan ug sa temples.churchofjesuschrist.org. Magmahimong andam sa paghisgot mahitungod kon unsa nga mga pakigsaad ang atong himoon ug nganong himoon nato kini.
Pagtuon sa mga hilisgotan sa ebanghelyo nga kasagaran adunay mga pangutana ang mga tawo, aron makahibalo kita asa mopakli diha sa mga kasulatan, ug pagtuon sa mga pulong sa buhi nga mga propeta pinaagi sa ilang mga mensahe sa kinatibuk-ang komperensiya kon motumaw ang mga pangutana.

Unaha ang family history ug pagsimba sa templo.

Makahimo kita sa buhat diha sa mga templo aron kadtong anaa sa pikas nga habig sa tabil kinsa mopili sa pagdawat sa atong serbisyo makadawat sa mga ordinansa nga dili nila madawat sa ilang kaugalingon. Makatabang usab kita niadtong kinsa mga buhi nga makakita kon sa unsang paagi ang mga ordinansa sa templo makapanalangin sa ilang mga kinabuhi karon ug motugot sa ilang mga pamilya nga magpuyo nga magkauban sa kahangtoran. Hunahunaa kon unsaon nato:

Pag-andam og dugang pa nga mga ngalan sa pamilya pinaagi sa FamilySearch.org.
Pagtabang sa uban nga makahibalo mahitungod ug makat-on kon unsaon sa paggamit sa FamilySearch.org ug pagpangita sa ilang mga ngalan sa pamilya.
Pag-index og mga rekord sa FamilySearch.org aron ang uban mas sayon nga makapangita og digital nga impormasyon alang sa ilang mga sakop sa pamilya.
Paghisgot mahitungod sa mahangtorong mga pamilya ngadto sa uban. Pagtudlo kanila mahitungod sa templo, sa mga ordinansa nga gipahigayon didto, ug sa unsang paagi ang mga pamilya—buhi ug patay—mahimong masilyo sa usag usa sa kahangtoran.
Pagtakda og regular nga panahon sa pagtambong sa templo ug sunda kana nga gitakda nga panahon.
Pagdapit sa uban nga moapil kanato sa atong pagsimba sa templo.

Paghimo og Regular nga Gitakda nga Panahon uban sa Ginoo ug Tumana Kini

“Akong minahal nga mga kaigsoonan, ang mga pagpangatake sa kaaway paspas kaayo, sa gikusgon ug sa matang. Ang atong panginahanglan nga maanaa sa templo kanunay wala sukad pa nga mas labaw nga gikinahanglan. Mohangyo ko kaninyo nga mainampoong motan-aw kon giunsa ninyo paggamit ang inyong oras. Pagpahinungod og oras alang sa inyong kaugmaon ug diha sa inyong pamilya. Kon adunay templo nga dili kaayo layo kaninyo, giawhag ko kamo sa pagpangita og paagi sa paghimo og regular nga pakigkita sa Ginoo—moadto sa Iyang balaan nga balay—dayon tumanon kanang pakigkita nga hingpit ug malipayon. Ako mosaad kaninyo nga ang Ginoo mohatag og mga milagro nga Siya nasayod nga inyong gikinahanglan samtang kamo naghimo og mga sakripisyo sa pagserbisyo ug pagsimba diha sa Iyang mga templo.”

Presidente Russell M. Nelson, “Ang Mahimong Labing Dalaygon nga mga Santos sa Ulahing mga Adlaw,” Liahona, Nob. 2018, 114.

Pangita og mga paagi sa pagsakripisyo sa inyong panahon.

Kitang tanan adunay bisi nga mga kinabuhi, maong dili kanunay sayon nga mogahin og panahon sa pagbuhat sa mga butang nga motugot kanato sa pagtabang sa pagpundok sa Israel. Apan samtang atong ilakip kining yano nga mga aksiyon sa atong inadlaw nga mga kinabuhi ug mga kasinatian, atong makaplagan nga adunay labaw pa sa igong panahon sa pagbuhat sa mga butang nga ang Langitnong Amahan ug si Jesukristo nahibalo nga labing mahinungdanon kanato ug ngadto sa uban nga atong matabangan nga mas mapaduol ngadto Kanila. Hunahunaa ang mga paagi sa:

Pagrebyo sa atong eskedyul aron makita kon unsay angay natong hunongon og buhat o sugdan og buhat aron makahimo og dugang nga panahon sa pagpundok sa Israel.
Kunhoran ang panahon nga gigahin sa mga gadget matag adlaw aron mas hingpit nga makaapil sa pagpundok sa Israel.
Mohimo og mas tinuyo nga mga desisyon mahitungod sa atong mga katuyoan ug mga posibilidad sa pagkahimong anaa sa social media—gamiton kini nga usa ka himan sa pagtabang sa pagpundok sa Israel.
Mohimo og mas tinuyo nga mga desisyon mahitungod sa pakigkonektar sa uban sa mga kalihokan nga ato nang giapilan.
Hinumdomi nga “ayaw pangita sa mga butang niini nga kalibotan apan paninguha kamo sa pagtukod og una sa gingharian sa Dios, ug sa pagpatunhay sa iyang pagkamatarong, ug kining tanan nga mga butang idugang nganha kaninyo” (Hubad ni Joseph Smith, Mateo 6:38 [diha sa Ang Hubad ni Joseph Smith apendiks]).