Mga Sukaranan sa Ebanghelyo

Nganong Magpuasa Kita

Litrato pinaagi ni Scott Law

Ang pagpuasa nagpasabot nga dili mokaon ug moinom aron mahimong mas maduol ngadto sa Dios. Kon itugot sa ilang panglawas, ang mga miyembro sa Ang Simbahan ni Jesukristo sa mga Santos sa Ulahing mga Adlaw magpuasa sa unang Dominggo sa matag bulan. Apan makapuasa usab kita sa ubang mga panahon, sama kon ang usa ka sakop sa pamilya o miyembro sa ward o branch grabeng nasakit.

Mga Pagtulon-an ni Kristo

Sa mga panahon sa Daang Tugon, si Moises ug Elias nagpuasa (tan-awa sa Exodo 34:28; 1 Mga Hari 19:8). Sa mga panahon sa Bag-ong Tugon, si Jesukristo nagpuasa ug nag-ampo aron mangandam sa Iyang pangalagad (tan-awa sa Mateo 4:1–4). Siya nagtudlo sa Iyang mga disipulo mahitungod sa gahom ug importansiya sa pagpuasa. Ang sugo nga magpuasa nagpadayon karon.

Katuyoan

Ang pagpuasa usa ka paagi alang kanato nga mas maduol ngadto sa Dios. Mahimo kitang magpuasa kon kita nagtinguha og pagpadayag o usa ka piho nga panalangin. Makapuasa kita aron sa pagpahayag og pasalamat sa Dios. Ang pagpuasa naghatag usab og paagi kanato nga makaserbisyo sa uban pinaagi sa mga halad sa puasa.

Pagpuasa ug Pag-ampo

Ang mga propeta mitudlo nga ang pagpuasa nga walay pag-ampo pagpagutom lamang. Kita makasugod ug makatapos sa atong pagpuasa pinaagi sa usa ka pag-ampo, ug kita mahimong magbaton og pag-ampo sa atong mga kasingkasing samtang kita magpuasa. Mahimo kitang mag-ampo alang sa kusog ug inspirasyon ug sa pagsabot sa kabubut-on sa Dios. Mahimo usab kitang mangayo sa Dios og mga panalangin alang sa atong kaugalingon o sa atong mga minahal.

Dominggo sa Puasa

Ang unang Igpapahulay sa bulan kasagaran usa ka adlaw sa puasa. Niana nga adlaw, magpuasa kita sulod sa gidugayon nga 24 oras kon kita makahimo. Kita usab mag-ampo, motambong sa atong mga miting sa Simbahan, ug mohatag og halad sa puasa ngadto sa Simbahan.

Litrato pinaagi ni Shirlene Stoddard

Mga Halad sa Puasa

Ang halad sa puasa usa ka donasyon aron sa pagtabang sa pag-atiman niadtong nanginahanglan. Kabahin kini sa balaod sa puasa. Kon magpuasa kita sa Dominggo sa puasa, gidapit kita sa paghatag og halad nga labing gamay pareha sa kantidad sa mga pagkaon nga wala nato kan-a. Atong ihatag ang donasyon, sama sa ikapulo, ngadto sa usa ka sakop sa atong bishopric o kapangulohan sa branch o isumiter kini diha sa website sa Simbahan.

Miting sa Pagpuasa ug Pagpamatuod

Sa Dominggo sa puasa, ang panagtigom alang sa sakramento mao ang miting sa pagpuasa ug pagpamatuod. Atol niini nga miting, manganta kita, mag-ampo, ug moambit sa sakramento sama sa atong buhaton matag Dominggo. Dayon ang mga sakop sa kongregasyon gidapit sa pagpaambit sa ilang mga pagpamatuod kang Jesukristo ug sa iyang ebanghelyo.

Mga Panalangin Pagpuasa ug Pag-ampo

Kon kita magpuasa ug mag-ampo, mas maduol kita ngadto sa Ginoo ug molambo ang atong espirituhanon nga kalig-on. Mapalig-on usab nato ang atong pagbarog pinaagi sa kinaugalingong paningkamot, makabaton og mas dako nga kapuangod, ug mahimong mas mapainubsanon.

Gikan sa mga Kasulatan

• Ang pagpuasa makatabang kanato nga mahimong mas matarong ug mas duol ngadto sa Dios (tan-awa sa Isaias 58:6–11).

• Ang pagpuasa ug pag-ampo makatabang kanato nga makaangkon og pagpamatuod (tan-awa sa Alma 5:46).

• Ang pagpuasa usa ka sugo (tan-awa sa Doktrina ug mga Pakigsaad 88:76).

Mga Pulong nga Hinumdoman

• Pagpadayag: Komunikasyon gikan sa Dios ngadto sa Iyang mga anak sa yuta.

• Pagpamatuod: Usa ka espirituhanon nga saksi sa kamatuoran nga moabot pinaagi sa Espiritu Santo.

• Pagbarog pinaagi sa kinaugalingong paningkamot: Ang abilidad nga mosangkap sa inyong kaugalingong pisikal ug espirituhanon nga mga panginahanglan.

Pagkaplag pa og Dugang

Kon kamo adunay mga pangutana kabahin sa pagpuasa, mahimo kamong makigsulti sa inyong tigpangalagad nga mga sister o mga brother, sa inyong mga lider sa ward o branch, o sa mga misyonaryo.