Digital Lamang
Ang Hingpit nga Kalipay ug Gasa sa Paghinulsol—Bag-o nga mga Mensahe gikan sa mga Propeta ug Apostoles
Tan-awa kon unsa ang bag-ohay lang nga gitudlo sa buhing mga propeta diha sa social media mahitungod sa paghinulsol.
Sa Abril 2022 nga kinatibuk-ang komperensiya, si Presidente Russell M. Nelson midapit kanato nga “diskobre[hon] ang kalipay sa inadlaw nga paghinulsol.”1 Siya midugang:
“Ang paghinulsol mao ang yawe sa kalamboan. Ang lunsay nga hugot nga pagtuo maghimo nga makapadayon kita sa dalan sa pakigsaad.
“Palihog ayaw kahadlok o ilangay ang paghinulsol. Si Satanas mahimuot sa inyong kaalaotan. Putla kini. Isalikway ang iyang impluwensiya sa inyong kinabuhi! Sugdi karon ang pagsinati sa kalipay sa pagsalikway sa kinaiyanhon nga pagkatawo. Ang Manluluwas nahigugma kanato kanunay apan labaw pa kon kita maghinulsol.”2
Ang mga sakop sa Unang Kapangulohan ug sa Korum sa Napulog Duha ka Apostoles namulong sa kinatibuk-ang komperensiya bahin sa hingpit nga kalipay sa paghinulsol. Mipaambit usab sila og mga mensahe mahitungod niini nga hilisgotan diha sa social media, lakip na sa mosunod:
Paghinulsol ug Kahupayan pinaagi kang Kristo
“Ang Dios adunay mga emosyon. Siya nagbantay kanato inubanan sa tanan nga pagbati sa usa ka malumo nga ginikanan. Naghunahuna ko sa hingpit nga kalipay nga Iyang gibati sa pagkahibalo nga ang [Iyang Hinigugmang Anak] sa kataposan mahimayaong makadaog batok sa sala ug sa kamatayon—nga naghimong posible sa langitnong mga posibilidad aron nga ikaw ug ako ugma damlag makapuyo pag-usab uban sa atong mga minahal.
“Apan nagtuo usab ako nga ang Iyang hingpit nga kalipay nalig-on pinaagi sa hingpit nga kahibalo sa unsay naghulat sa Iyang Hinigugmang Anak. … Kining sama nga Anak mag-antos sa walay samang naantos o maantos ni bisan kinsa.
“Apan tungod kay ang atong Langitnong Amahan nahigugma gayod kanato, gitugotan Niya kining malipayon ug masakit nga panghitabo nga mahinabo sa hustong lugar niini. Tungod ang kalibotan nagkinahanglan og pagluwas, ug tungod ikaw ug ako nagkinahanglan og pagluwas, gipadala Niya kanato ang usa ka Manluluwas.
“… Dawaton nato ang hingpit ug bililhon nga gasa sa Dios. Atong itugyan ang atong mga kabalaka ug mga sala sa tiilan sa Manluluwas ug makasinati sa hingpit nga kalipay nga moabot gikan sa paghinulsol ug pag-usab. Sundon nato si Jesukristo ug awaton ang Iyang kinabuhi.”
Presidente Russell M. Nelson, Facebook, Dis, 24, 2021, facebook.com/russell.m.nelson.
Unsay Bation sa Dios Kon Makahimo Kita og mga Sayop
“Usa ka batan-on kausa nangutana kanako, ‘Presidente Ballard, unsay bation sa Dios kanako kon makahimo ako og mga sayop?’ Tingali naghunahuna usab kamo niini.
“Ang Dios nahigugma sa tanan sa Iyang mga anak, ug nakasabot Siya nga ang kinabuhi usa ka kasinatian alang kanatong tanan. Dili kita hingpit. Makahimo kita og mga sayop. Gihatag Niya kanato ang Iyang Anak, si Jesukristo, aron sa pagtabang kanato nga mag-usab ug makasugakod sa mortalidad.
“Sa kataposan, kinahanglang makat-on kita nga magpakabuhi sa paagi nga gusto Niya nga kita magpakabuhi, apan dili igsapayan sa kapaspas nga kita mag-usab ug mouswag, ang Iyang gugma alang kanato dili mausab tungod kay kita ang Iyang mga anak.
“Ang Ginoong Jesukristo makatabang kanato nga ayohon ang bisan unsa nga kinahanglang ayohon sa atong kinabuhi pinaagi sa Iyang maulaong sakripisyo.”
Presidente M. Russell Ballard, Facebook, Sept. 16, 2021, facebook.com/mrussell.ballard.
Mga Milagro sa Paghinulsol ug Kapasayloan
“Kinahanglan maningkamot kita nga makabenepisyo sa unsay nangagi. Ako nangamuyo kaninyo nga hinumdoman nga ang nangagi pagakat-onan, apan dili pagapuy-an. Kita motan-aw sa kagahapon aron sa pagkat-on sa maayong mga kasinatian ug dili ang mga bati nga mga kasinatian.
“Ug kon kita makakat-on kon unsa ang kinahanglan nga makat-onan ug atong gibuhat ang atong labing maayo sa atong nasinati, dayon kita molantaw sa unahan ug mohinumdom nga ang hugot nga pagtuo kanunay nagtumong ngadto sa umaabot. Ang hugot nga pagtuo kanunayng adunay kalabotan sa mga panalangin ug sa mga kamatuoran ug sa mga panghitabo nga moabot pa nga mobunga og maayong mga resulta sa atong kinabuhi.
“Tingali ang uban kaninyo naghunahuna—ilabi na samtang magpuyo kita latas sa inadlaw nga kagubot sa kalibotan sa atong palibot karon—‘Aduna bay bisan unsang kaugmaon alang kanako?’ Unsay ikadalit sa bag-ong tuig alang kanako? Ako mahimo bang luwas ra? Mamaayo ra ba ang kinabuhi? Ako ba makasalig sa Ginoo ug sa umaabot?
“Palihog hinumdomi kini: ang hugot nga pagtuo nagsalig nga ang Dios adunay talagsaon nga mga butang nga giandam alang sa matag usa kanato ug si Kristo mao ang tinud-anay nga ‘labawng sacerdote sa mga maayong butang nga nanagpangabot’ (Mga Hebreohanon 9:11).
“Ipabiling nakatutok ang inyong mga mata sa inyong mga damgo, bisan dugay ug layo pa. Pagpakabuhi aron makita ang mga milagro sa paghinulsol ug pagpasaylo, sa pagsalig ug balaanon nga gugma nga mopausab sa inyong kinabuhi karon, ugma, ug hangtod sa kahangtoran. Kana mao ang New Year’s resolution nga akong gihangyo kaninyo nga himoon.”
Elder Jeffrey R. Holland, Facebook, Ene. 9, 2022, facebook.com/jeffreyr.holland.
Usa ka Makalimpyo nga Gasa
“Ang walay kinutoban nga Pag-ula sa Manluluwas hingpit nga mousab sa paagi nga atong lantawon ang atong mga kalapasan ug mga pagkadili hingpit. Imbes nga magsige og hunahuna niini ug mobati nga wala nay katubsanan o wala nay paglaom, makakat-on kita gikan niini ug mobati nga malaomon. Ang makalimpyo nga gasa sa paghinulsol motugot kanato nga makabiya sa atong mga sala ug motumaw nga bag-o nga binuhat.”
Elder Dieter F. Uchtdorf, Facebook, Hunyo 5, 2021, facebook.com/dieterf.uchtdorf.
Usa ka Kausaban sa Kasingkasing
“Ang atong mga kasingkasing mausab pinaagi sa mga kamatuoran nga atong makat-onan diha sa templo mahitungod sa Dios ug ni Jesukristo—ug pinaagi sa gihimo nato nga mga saad nga mohigugma ug moserbisyo. Mas menos kitang motutok sa unsay atong gusto ug mas motutok sa pagpahiangay sa atong kabubut-on ngadto sa kabubut-on sa Dios. … Ang nag-unang katuyoan sa balay sa Ginoo mao ang pag-usab kanato ug mahimong bag-o nga mga linalang diha ni Kristo.
“Kasagaran sa kalibotan, ang kausaban gisulayan gikan sa gawas pasulod. Daghan ang nagtuo nga ang pag-usab sa mga kahimtang sa usa ka tawo mao ang labing maayo nga paagi sa pag-usab sa usa ka tawo.
“Ang Dios, hinuon, kasagaran nga nagtrabaho gikan sa sulod pagawas. Kon tugotan nato Siya, ang Dios makausab sa atong mga kasingkasing— ug dayon kita mapanalanginan og kapasidad ug kalig-on sa pag-usab sa atong mga kahimtang.
“Diha sa balaan nga mga templo, ang unsay atong makat-onan ug gisaad nga buhaton makapausab kanato gikan sa sulod pagawas, nga makapahimo kanato nga mahimong mas mapahinungoron nga mga disipulo ni Jesukristo.”
Elder David A. Bednar, Facebook, Abr. 19, 2022, facebook.com/davida.bednar.
Pagkaila sa Ginoo
“Pipila kaninyo mahimong motuo nga si Jesukristo mao ang Anak sa Dios ug nga Siya mitanyag og walay kinutoban ug mahangtoron nga maulaong sakripisyo. Apan mahimo usab kamong motuo nga ang Iyang Pag-ula magamit alang sa tanan—apan dili kanimo. Mopakita kamo og hugot nga pagtuo sa Manluluwas apan mahimong dili motuo nga ang tanang gisaad Niya nga mga panalangin maanaa kaninyo o makatabang sa inyong kinabuhi. Ako modapit kaninyo nga dili lang mahibalo kabahin sa Ginoo apan makaila usab Kaniya.
“Gitambagan kita sa Manluluwas sa pagkahimo nga sama Kaniya. Mahimo kitang makaila sa Ginoo samtang magtinguha kita pinaagi sa gahom sa Iyang Pag-ula sa pagkahimong sama Kaniya. Mahimo kitang makaila sa Ginoo kon kita moserbisyo Kaniya ug maghago sa Iyang gingharian. Mas hingpit kitang makaila sa Ginoo kon kita dili lang motuo diha Kaniya apan motuo usab Kaniya ug sa Iyang mga gipangsaad.
“Ang pagtuo Kaniya—pagdawat nga tinuod ang Iyang gahom ug mga saad—magdala og panglantaw, kalinaw, ug hingpit nga kalipay sa atong kinabuhi. Ang Iyang Pag-ula indibidwal; personal kini. Ug kini alang kanatong tanan.”
Elder David A. Bednar, Facebook, Mar. 14, 2021, facebook.com/davida.bednar.
Personal nga Responsibilidad
“Ang Manluluwas, sa pagbayad sa silot sa atong mga sala, wala mokuha gikan kanato sa personal nga responsibilidad kon giunsa nato sa pagpuyo ang atong kinabuhi. Ang kaimportante sa pagtrabaho, kakugi, paghago uban sa atong kusog, pagpalambo sa atong mga talento, ug pagsangkap alang sa mga pamilya kanunayng giproklamar diha sa mga kasulatan sukad sa sinugdanan.
“Ang akong hagit ninyo mao ang pagsusi sa inyong mga tumong ug pagtino hain niini ang magtugot kaninyo nga matuman ang mga obligasyon sa pamilya, magpabilin kaninyo sa inyong dalan sa pakigsaad, ug magtugot kaninyo nga makabaton sa kalipay nga gusto sa Ginoo alang kaninyo. Hinumdomi, ang pagbaton og tumong magtugot kaninyo nga makadaginot og panahon ug paningkamot pinaagi sa sayo nga pagplano ug dili mataligam-an ang importante nga mga panginahanglanon ug mga tagal sa panahon [deadline].
“Dili kamo kinahanglang mahadlok bisan pa sa mga kakuyaw ug mga hagit nga inyong atubangon. Kamo mapanalanginan ug mapanalipdan kon kamo magtinguha og matarong, mahinungdanon nga mga tumong; magplano ug maningkamot nga adunay kaisog ug determinasyon; ug mosalig ug motutok sa hugot nga pagtuo, paghinulsol, makaluwas nga mga ordinansa, ug sa maulaong sakripisyo sa Manluluwas samtang molahutay kamo hangtod sa kataposan. Ang pagtutok diha sa templo makatabang ninyo sa pagkab-ot niini nga mga tumong.
“Ako ligdong nga mopamatuod mahitungod sa kabalaan ni Jesukristo. Tungod Kaniya dili kita angay nga mahadlok, kay diha Kaniya hingpit ang atong kalipay.”
Elder Quentin L. Cook, Facebook, Dis. 8, 2021, facebook.com/quentin.lcook.
Matinuoron, Sinsero nga Personal nga mga Pag-ampo
“Akong nakaplagan sa akong kaugalingon nga kinabuhi, sa dihang usa ka minahal o usa ka higala mosugyot og mga butang nga kinahanglan nakong usbon, bisan kon kini tinuod, ang kinaiyanhon nga tawo sulod kanako usahay mogawas ug moingon, ‘Wala ka nakakita niini gikan sa akong panglantaw,’ o ‘Kinsa ka man aron mohusga?’ O tingali ako gani maghunahuna, ‘Tingali kinahanglan kang mopalambo sa imong kaugalingon.’ Apan, kon ako moluhod nga mapainubsanon atubangan sa akong Langitnong Amahan, ug mangutana sa tinud-anay gayod, ‘Amahan, unsa ang kinahanglan nakong usbon?’ ‘Asa man dapita ang kinahanglan nakong hinulsolan?’ ‘Asa man ako nagkulang?’ Usa ka kalma nga pagbati ang moabot kanako, ug sa tukma nga panahon, makadungog ako Kaniya. Ug ang Iyang kamatuoran, ang Iyang mahangtoron nga kamatuoran, mosulod sa akong kasingkasing.
“Ang matinuoron, tinud-anay nga personal nga pag-ampo niadto nga hilom nga mga higayon mag-abli sa bentana ngadto sa pagpadayag gikan sa atong Langitnong Amahan. Makadungog kita Kaniya. Siya mamulong kanato. Ang pagpaningkamot sa pagpaminaw ngadto sa hilom nga mga pag-aghat sa Espiritu ug pagsaad sa akong Langitnong Amahan nga ako mahimong mas mohatag og pagtagad niadto nga mga butang diin ako makapalambo ingon og makahatag kanako og mas dako nga abilidad aron nga ako makapaminaw Kaniya.
“Ang tinuod nga kausaban tagsa ra kaayo nga mahitabo sulod sa usa ka adlaw. Nasayod ko nga kini dili mahitabo alang kanako. Apan uban sa panahon, mahimo kitang mas maayo gayod kay sa kita kaniadto. Samtang ako maminaw Kaniya ug molihok sa espirituhanong direksiyon nga akong nadawat gikan Kaniya, Siya mobubo sa Iyang espiritu ug sa Iyang pag-uyon ngari kanato. Walay laing mas maayo kay sa niana—pagbati sa Iyang pag-uyon, pagbati sa Iyang Espiritu. Ang Espiritu Santo mokompirmar sa gugma sa Langitnong Amahan alang kanato. Ug nasayod ko sa akong sitwasyon, Siya mopasalig kanako nga bisan kining ginagmay nga mga lakang sa pag-uswag nagtabang kanako nga mas maduol ngadto Kaniya.”
Elder Neil L. Andersen, “How I Hear Him,” Dis. 27, 2021, facebook.com/neill.andersen.
Uban sa Tinuod nga Katuyoan
“Bag-ohay lang usa ka misyonaryo nangutana kanako, ‘Mga tigpakaaron-ingnon ba kita kon dili nato tumanon ang tanang kasugoan nga atong gitudlo ngadto sa mga tawo?’ Kini usa gayod ka nindot nga pangutana! Nahunahunaan nako nga ipaambit nako ang akong tubag dinhi. Nasayod ako nga dili ko kinahanglang mahimong hingpit aron matawag nga mahimong sakop sa Korum sa Napulog Duha ka Apostoles. Mas maayo akong nasayod kay ni bisan kinsa nga dili ako hingpit. Maong kinahanglan ba kitang mahimong hingpit aron moserbisyo sa Ginoo? Siyempre dili. Kini dili kabahin niana.
“Adunay dako nga kalainan tali sa rebelyon ug kahuyang. Mao nga kini mapakaaron-ingnon nga motudlo og sugo nga wala ninyo gitinguha nga sundon. Kana mapakaaron-ingnon. Apan ang pagtudlo sa mga kasugoan ug dayon makasala ug maghinulsol—kana dili mapakaaron-ingnon, tungod kay gitinguha ninyo nga mosunod sa sugo. Kon mobuhat kita sa mga butang uban sa tinuod nga katuyoan, kini nagpasabot nga gitinguha nato nga mosunod sa mga sugo. Mao nga walay bisan unsa nga mapakaaron-ingnon mahitungod sa pagtudlo mahitungod sa dalan sa pakigsaad o mahitungod sa pagtudlo kabahin sa mga sugo sa Dios kon kamo sa pagkatinuod nagtinguha sa pagsunod niining tanan. Kamo nakahibalo ug makapamatuod nga ang pagsunod niadto nga mga sugo magdala og mga panalangin.
“Diha sa Basahon ni Mormon, ang Moroni 6:8 nag-ingon, ‘Apan ingon sa kanunay nga sila maghinulsol ug mangayo og kapasayloan, uban sa tinuod nga katuyoan, sila pasayloon.’ Ang mapakaaron-ingnon nga bahin moabot kon kita makahimo og sayop ug dili maghinulsol ug wala nagtinguha nga maghinulsol. Ang kaligdong mao nga ang atong mga aksiyon ug ang atong mga gituohan hingpit nga nagkauyon—kini mao ang paagi nga kita naningkamot sa pagpuyo sa atong mga kinabuhi. Apan kini mapakaaron-ingnon ba kon kita dili kanunayng makabuhat niana? Dili, mao kana ang tibuok nga punto sa paghinulsol, dili ba? Kita makahinulsol gikan niadto nga mga butang nga bisan pa man sa atong maayo nga mga paningkamot kita mapakyas sa pagbuhat. Tungod sa Pag-ula ni Jesukristo, ang kapasayloan tinuod.”
Elder Dale G. Renlund, Facebook, Peb. 15, 2022, facebook.com/DaleGRenlund.
Ang Kamabination ug Dili Matandi nga Gahom sa Dios
“Minahal kong mga higala, ako mopamatuod kaninyo nga kon kita tinud-anay nga maghinulsol sa atong mga sala, gitugotan nato ang maulaong sakripisyo ni Kristo nga mahimong hingpit nga epektibo sa atong kinabuhi. Ang gasa sa paghinulsol mao ang usa ka pagpadayag sa kamabination sa Dios ngadto sa Iyang mga anak, ug kini usa ka pagpakita sa Iyang dili matandi nga gahom sa pagtabang nato nga mabuntog ang mga sala nga atong nahimo.”
Elder Ulisses Soares, Facebook, Hunyo 2, 2021, facebook.com/soares.u.