“Usa Kini ka Talagsaong Adlaw aron Magmapasalamat,” Liahona, Okt. 2022.
Digital Lamang: Mga Hulagway sa Hugot nga Pagtuo
Usa Kini ka Talagsaong Adlaw aron Magmapasalamaton
Among nasuta nga pinaagi sa pagpaambit og paglaom, kami nakakaplag og paglaom. Ang among tumong nahimong ang pagtabang sa uban, ingon man sa among mga kaugalingon, aron maandam alang sa kahangtoran.
Mga litrato pinaagi sa maayong kabubut-on sa pamilyang Koch
Cristi: Sila miingon nga ako adunay duha na lang katuig nga mabuhi. Gisultihan nako si James nga makasabot ra ko kon sobra ra kini sa gusto niyang sagubangon. “Higayon na ni nimo nga mobiya,” miingon ko. Apan miingon siya, “Mas pilion nako nga makauban ka. Kita mag-uban nga makigbatok sa kanser ug buhaton kutob sa atong mahimo. Atong dawaton bisan unsang panahon niini nga kinabuhi nga ihatag sa Langitnong Amahan kanato. Hinumdomi lang, mag-uban kita niini sa kahangtoran.” Ug husto siya, di ba. Ang usa ka mahangtoron nga kaminyoon dili motapos tungod lang kay ang usa ninyo mobalhin na ngadto sa sunod nga kinabuhi.
James: Nasayod ko nga siya ang akong gusto nga masilyo nako. Kaming duha naminyo na sa una, ug ako nagpuasa ug nag-ampo sa dugayng panahon aron makit-an siya. Nag-andam ko nga mahimong takos alang kaniya ug aron mamahimong usa ka bana kinsa moamuma kaniya. Dili ko basta lang mobiya gikan niana.
Si Cristi ug James nasilyo didto sa Draper Utah Temple.
Cristi: Kami mihukom nga gusto namo buhaton tanan nga among mahimo aron magmalipayon karon ug magmalipayon sa kahangtoran.
James: Kaming duha kanunayng aktibo sa pisikal nga paagi, ug mihukom kami nga mopadayon sa pagbuhat sa mga butang nga among ganahan hangtod sa among mahimo—modagan, maglakaw, maglangoy, mobiyahe, magbisikleta, ug magmotorsiklo. Ug ganahan mi mogahin og panahon sa among pamilya. Bisan human sa mga pag-opera aron pagtangtang sa mga tumor gikan sa iyang dughan ug sa iyang buko-buko, si Cristi mipadayon sa pagbuhat kutob sa iyang makaya. Sa samang higayon, siya misugod sa pagbuhat og lain pang mga butang nga siya mibati nga kinahanglan usab nga matuman.
Cristi: Gikan sa mga kaminyoon kaniadto, si James adunay lima ka anak, ug ako adunay upat. Nakahukom ko nga kinahanglan kong magpadala og sulat ngadto kanila. Busa, gipuno ko kining usa ka kahon sa mga sinulat, ug tag-ana unsa—milabay ang katuigan sukad niadto, ug karon ang akong bukton namaga na ug puno sa mga tumor nga dili nako makasulat. Pipila lang ka adlaw ang milabay misulay ko og sulat sa akong anak nga babaye alang sa iyang adlawng natawhan, ug ang akong bukton hilabihan kasakit nga naglisod kog ginhawa. Mao nga, ang pagsulat niadtong mga sulat sa diha nga akong gibuhat maoy inspirasyon. Nalipay ko nga naminaw niadto nga pag-aghat tungod kay karon dili na ko makahimo niini.
James: Si Cristi aduna niining Kristohanong abilidad nga makakita sa maayo diha sa uban. Siya adunay lawom nga pagpamatuod sa iyang Manluluwas ug usa ka dakong tinguha sa paghimo og misyonaryo nga buhat.
Cristi: Nakahinumdom ko nga nanghangyo sa Ginoo. Taudtaod gyod, mura kini og, “Sige na, ayoha nako. Ganahan ko mopundok sa Israel!” Misulay ko sa pagsugo-sugo sa Dios, apan wala kini nagsilbi. Dayon naghunahuna ko, “Ok, akong ngalan, nga Cristi, pasabot ‘sumusunod ni Kristo.’ Samtang ania pa ko dinhi, ganahan ko nga makadala og daghang kalag ngadto ni Kristo kutob sa akong mahimo.
James: Ug kana misangpot ngadto sa laing pag-aghat.
Si Cristi mipakigbahin sa iyang mga hagit apan mipakigbahin usab og madasigon nga mga mensahe sa hugot nga pagtuo.
Cristi: Misugod ko sa paghimo og usa ka mensahe diha sa social media sa matag adlaw, usa ka gamay nga mensahe sa paglaom ug gugma. Gitawag ko kini og “Usa Kini ka Talagsaong Adlaw aron Magpakabuhi.” Ang mga tawo misugod sa pagpaminaw kabahin niini. Ang akong bayaw ateyista , apan miingon siya, “Mahimo ba ko nimong sugdan og padala sa imong mga mensahe?” Paglabay sa panahon siya nahimong usa ka tumutuo, ug karon siya usa na ka miyembro sa Simbahan. Ug ang akong igsoong lalaki misugod sa pagbasa sa mga mensahe. Kini nakatabang kaniya nga makakaplag og usab sa hugot nga pagtuo. Karon siya aktibo na sa Simbahan.
James: Magsige ko og biyahe tungod sa trabaho, moadto sa gagmay nga mga lungsod sa Texas ug Georgia. Si Cristi kasagaran mouban kanako. Kami makahimamat sa mga tawo nga gusto namong makumusta, ug siya moingon, “Mahimo ba ko nga mopadala kanimo sa usa sa akong mga mensahe? Dayon makadesisyon ka kon gusto ba nimong magpadayon sa pagdawat niini.”
Cristi: Ang gidaghanon sa mga tawo nga ganahan sa akong mga mensahe nagkadaghan. Karon aduna nay mga 200. Ang uban mga miyembro sa Simbahan; ang uban dili. Sulod sa taas nga panahon, mipadala ko og usa ka hunahuna kada adlaw, apan karon nag-anam na og kalisod. Tingali ang mga mensahe mahimong sama sa usa ka gamay nga kasaysayan. Kon mawala na ko, ang akong pamilya ug mga higala makasaksi gihapon kabahin sa unsay akong nahibaloan nga tinuod.
Si James ug si Cristi nagkauyon nga, “Mag-uban kita niini hangtod sa kahangtoran.”
James: Unsa ang iyang nasulat makatabang kanamo nga maghupot og mahangturon nga panglantaw. Siya permi nga mosulti nako nga magbantay siya nako, magbantay kanamo. Kami gustong mamahimong usa ka mahangtorong pamilya. Mao kana ang tinuod nga tumong.
Cristi: Pito na ka tuig sukad nga ako na-diagnose. Samtang nagkalisod ang pagsulat sa akong mensahe, ako usahay motawag niini og, “Usa kini ka Talagsaong Adlaw aron Magmapasalamaton.” Mapasalamaton kaayo ako alang ni Jesukristo ug sa Iyang Pag-ula. Maghunahuna ko og mga pulong sa himno nga “Ipha ang Inyong Panalangin.”1 Kon kita mawad-an sa tanang butang niining kinabuhia, anaa gihapon nato ang saad nga ang mga pamilya mahimong mahangturon. Kita kanunayng makasalig niana nga panalangin, ug kini makabayaw kanato.
Gipuno ni Cristi ang iyang kinabuhi sa paglaom ug mitabang sa uban nga mobuhat sa ingon.