Nagkatigulang nga Matinud-anon

Aduna bay Gustong Isulti ang Ginoo ngari Kanako?

Ni Delbert H. Strasser

Sa kataposan, sa edad nga 90, ang akong mama midawat sa iyang patriyarkal nga panalangin.

Litrato nga giposingan sa modelo

Ang akong mama, si Margaret, mibalhin gikan sa Switzerland ngadto sa Estados Unidos samtang usa pa ka batan-ong babaye. Wala madugay human niana, Siya adunay usa ka sabot nga makadawat sa iyang patriyarkal nga panalangin. Apan sa dihang siya miadto aron makigkita sa partriyarka, wala ang patriyarka didto. Kon unsa man ang rason, ang akong mama mibati nga kadto mao ang kompirmasyon nga ang Ginoo walay bisan unsang butang nga isulti kaniya, ug siya wala na gayod mag-eskedyul pag-usab sa iyang sabot.

Sa matag karon ug unya sulod sa mga katuigan, ako mosugyot ngadto sa akong mama nga iyang hunahunaon ang pagdawat sa iyang panalangin. Siya ang usa sa labing matinud-anon nga babaye nga akong nailhan. Apan, siya mapainubsanon kaayo nga mitubag nga siya walay angayan nga bisan unsa nga espesyal gikan sa Ginoo. Wala siya nagkinahanglan og usa ka panalangin, miingon siya, tungod kay siya yano lang nga babaye. Ug siya OK ra niana.

Sa kataposan, sa dihang siya 90 na, kami mikombinser kaniya sa pagpa-eskedyul sa iyang patriyarka. Sukwahi lang, kay wala usab magkasinabot sa komunikasyon uban niini nga patriyarka, ug sa dihang mitunga si Mama, ang patriyarka mibiyahe. “Tan-awa?” miingon siya. “Giingnan ko ikaw nga ang Ginoo walay espesyal nga isulti ngari nako.”

Swerte nalang, siya ug ang patriyarka nagkaabot pagkasunod nga semana. Sa dihang ang panalangin nahatag, kini napuno sa mga gasa, mga saad, ug mga detalye sa iyang kinabuhi nga personal kaayo nga kini naggikan lang sa pagkaila sa Ginoo kabahin niya.

“Tingali ang Ginoo aduna gyod diay igsusulti ngari nako,” miingon siya.

Naklaro kini nako nga ang Ginoo nakaila kanato sa tinagsa-tagsa. Ug kon kamo anaa man sa sinugdanan sa inyong kinabuhi o sa kataposang bahin niini, Siya nahigugma kaninyo sa hilabihan nga Siya adunay importanteng tambag nga ighahatag nganha ninyo pinaagi sa inyong patriyarka.

Ang tagsulat nagpuyo sa Utah, USA.

Tibuok Kinabuhi nga mga Panalangin

Ni Christy Monson, mga Magasin sa Simbahan

Ania ang pipila ka mga paagi nga akong nasayran nga ang mga senior napalig-on tungod sa ilang mga patriyarkal nga mga panalangin:

• “Sa sayo nga bahin sa akong kinabuhi, nanglimbasog ko sa mga negatibong pagbati kabahin sa kaugalingong bili. Apan ang akong panalangin nagsulti kanako kabahin sa piho nga mga kinaiya nga nakita sa Langitnong Amahan ngari kanako. Akong gilista ang matag kalidad. Samtang akong gitun-an kining listahan latas sa mga katuigan, akong nasuta ang akong kaugalingon sama sa pagkakita sa Dios kanako.”

• “Ang akong panalangin misaad nako nga ang akong bana ug ako magpuyo nga adunay pagtahod ug maghigugmaay sa usag usa. Apan gipahilayo sa akong bana ang iyang kaugalingon gikan sa pamilya ug miugmad og usa ka adiksiyon. Misulti ko sa Ginoo nga akong buhaton ang tanang butang kutob sa akong mahimo aron mahimo ang saad diha sa akong panalangin nga matinuod. Apan ako miingon Kaniya nga Siya kinahanglan nga mogiya sa akong mga lakang. Mikabat og daghang katuigan, apan ang akong bana ug ako nakabuntog sa mga problema, mas nagkasuod, ug nagpabilin nga matinud-anon. Ako nasayod nga ang Langitnong Amahan mihatag nako niana nga saad sa akong panalangin sa pagtabang kanako nga makalahutay.”

• Laing tawo nga akong nailhan mipasakop sa Simbahan sa dihang siya 89 anyos na. Ang iyang lawas nag-antos sa grabe nga kanser. Apan sa iyang patriyarkal nga panalangin misaad nga siya moadto sa templo. Paglabay sa panahon, nakabaton siya og igong kalig-on nga makalingkod diha sa usa ka wheelchair. Natugahan siya ug nasilyo ngadto sa iyang asawa sa wala pa siya mamatay.

Ang mga panalangin sa patriyarka naggikan sa Dios aron motudlo kanato ug mohatag kanato og kahupayan, kalinaw, ug giya. Samtang kita magkatigulang ug motan-aw og balik, atong makita ang impluwensiya sa Ginoo diha sa atong mga kinabuhi pinaagi sa atong patriyarkal nga mga panalangin.