Alang sa mga Ginikanan

Ang Misyonaryo nga Buhat sa Kataposang mga Adlaw

Minahal nga mga Ginikanan,

Bisan pa man sa kasamok sa kalibotan, ang buhat sa Ginoo magpadayon sa unahan. Kita nakasaksi sa buhat sa Ginoo samtang ang mga templo gianunsiyo ug gitukod, samtang ang mga miyembro sa tibuok kalibotan makugihon nga nagserbisyo, ug samtang ang mga misyonaryo nagboluntaryo sa ilang panahon sa pagpaambit sa ebanghelyo ni Jesukristo. Ang Ginoo naghangyo usab kanato sa pagpangalagad ngadto sa tawo. Mahimong kana nga tawo daan nang miyembro sa Simbahan, o usa ka bag-ong higala nga nagpakita og kainteresado sa atong mga tinuohan, ang Ginoo nakaila kanila, ug Siya nakaila kaninyo.

Mga Panaghisgotan sa Ebanghelyo

Mga Pagkigsaad ug ang Pagpundok sa Israel

Ipaambit sa inyong pamilya ang pipila ka mga kinutlo gikan sa makapadasig nga mga artikulo ni Presidente Russell M. Nelson diha sa pahina 4 ug hisgoti kon sa unsang paagi ang pagtuman sa atong mga pakigsaad motabang kanato “nga makabaton og kalig-on sa pagbatok sa makanunayon nga impluwensiya sa kalibotan.” Kon kamo adunay mga bata nga nag-andam sa pagserbisyo og misyon, ipaambit ang iyang pagtulon-an kabahin sa mga misyonaryo nga nagbuhat “sa labing talagsaong buhat sa yuta karon.”

Ang Dios Nakaila sa Matag Usa Kanato

Kitang tanan mga anak sa Langitnong Amahan, ug Siya nahigugma kanato. Tungod niini, Siya usab nagpakabana sa atong personal nga pagkakabig. Basaha ang mensahe ni Elder Jorge T. Becerra diha sa pahina 40 kabahin sa kasinatian sa iyang apohan nga lalaki uban sa personal nga pagkakabig ug hisgoti kon unsaon ninyo sa pagkasayod nga ang Ginoo nakaila ug nahigugma kaninyo.

Pagbaton og Husto nga Pagpokus diha sa Pagsunod sa Ebanghelyo

Aron matabangan ang inyong mga anak nga mas makasabot kon unsa ang ipokus samtang sila maningkamot sa pagsunod sa ebanghelyo, basaha ang artikulo diha sa pahina 30 aron makakat-on kon sa unsang paagi ang usa ka young adult miusab sa iyang panghunahuna aron makita ang katuyoan sa matang sugo ug baroganan sa ebanghelyo.

Dali, Sunod Kanako Kalingawan sa Pamilya

Mga Sumpay sa Gugma

Isaias 52

Diha sa Isaias 52:7, ang propeta nagsulti kanato nga si Kristo mohatag kanato sa kalinaw, sa ebanghelyo, ug kaluwasan.

1. Hisgoti ang mga paagi nga kamo makapaambit niining talagsaong mga panalangin pinaagi sa misyonaryo nga buhat. Paglista og daghan kutob sa mahimo nga mahunahunaan sa inyong pamilya. (Mga ehemplo: ipaambit ang ebanghelyo sa inyong mga higala; dad-a ang mga ngalan sa inyong katigulangan ngadto sa templo aron makompleto ang ilang mga ordinansa.)

2. Pagbutang og usa ka Basahon ni Mormon sa pikas kilid sa kwarto. Pabaroga ang usa ka tawo sa pikas kilid ug, ayaw ipalihok ang iyang mga tiil, mokab-ot sa basahon. (Siguroha nga ang basahon mabutang sa dili makab-ot.)

3. Palinyaha ang matag sakop sa inyong pamilya taliwala sa tawo sa kilid sa kwarto ug sa Basahon ni Mormon. Isumpay ang mga kamot, nga magkinadina ang mga tawo, ug ipasa ang Basahon ni Mormon ngadto sa unang tawo. (Pinaagi sa pagkahibalo kon pila ka tawo ang anaa sa inyong grupo, inyong mabana-bana kon unsa kalayo magsugod ang unang tawo.)

Panaghisgotan: Unsang matang sa mga aksiyon diha sa atong mga kinabuhi ang lagmit mamugna sa “mga sumpay” aron matabangan ang uban nga makaila sa mga panalangin sa ebanghelyo?

Ania ang usa ka paresan sa mga pakigpulong sa komperensiya nga mahimong mabasa o mapaminaw sa inyong pamilya kabahin niining hilisgotan:

• Dieter F. Uchtdorf, “Ang Dios Mobuhat og Butang nga Dili Mahanduraw,” Liahona, Nob. 2020, 51–54.

• Ahmad S. Corbitt, “Makahimo Kamo sa Pagpundok sa Israel!” Liahona, Mayo 2021, 61–64.

Gisumiter ni Brenda Slade

Gikan sa Alang sa Kalig-on sa mga Kabatan-onan nga Magasin

Ang Ginoo Mopundok sa Iyang Katawhan ug Mogiya Kanila sa Paggawas sa Pagkabinihag

Si Elder Quentin L. Cook nagtudlo kon unsaon nato nga makalikay sa pagkabihag pinaagi sa pagpundok uban sa katawhan sa Ginoo ug mosunod Kaniya. Ug kita kinahanglan usab mopasiga sa atong kahayag ug mogiya sa uban ngadto ni Kristo.

Teknolohiya ug ang Panagpundok

Si Presidente Bonnie H. Cordon nagpaambit og lima ka paagi sa paggamit sa teknolohiya sa pagpundok sa Israel.

Maayo nga Kataw-anan

Basaha ang pipila ka mga hunahuna kabahin sa maayong kataw-anan ug ang positibo nga epekto niini diha sa atong mga kinabuhi.

Gikan sa Higala nga Magasin

Magpabilin nga Maalamon sa Media

Basaha ang usa ka istorya kabahin ni Nathan, nga nagkat-on sa paghimo og himsog nga mga kinutuban kabahin sa iyang oras sa video game. Dayon mangita og dugang positibo nga mga tabang sa media diha sa seksiyon nga Alang sa Mas Magulang nga mga Bata.

Tabang gamit ang Dali, Sunod Kanako

Pangita og sinemana nga mga kalihokan aron matabangan ang inyong pamilya nga makalingaw ang pagtuon sa kasulatan.

Magasin sa Family History

Pagkat-on kon giunsa ni Liv ug Melanie gikan sa Taiwan sa paghimo sa ilang kaugalingong magasin aron madukomentohan ang ilang family history.

Nagtabang sama ni Jesus

Himamata si Edrick gikan sa Guatemala ug pagkat-on kon giunsa niya sa pagtabang ang uban, sama ni Jesus. Dayon tabangi ang inyong anak sa pagbuhat sa Hagit sa Matinabangong mga Kamot [Helping Hands] niining bulana.

Alang sa Gagmay nga mga Higala

Pangita ug mga istorya ug mga kalihokan niining seksiyon nga gihimo ilabi na alang sa atong mga pinakabata nga tigbasa.