“Laet Ia blong Laef,” Liahona, Jenuware 2023.
Laet Ia blong Laef
Sevya Jisas Kraes hem i laet blong yumi, laef blong yumi, mo rod ia blong yumi—yestedei, tedei, mo blong oltaem.
Ol infomesen i kam long Lukluk Nomo long Glad, I Kam long Michael T. Malm
Taem san i stap godaon long wan narafala Sandei long 1948, mi bin stap wokabaot long saed blong Tren Reva long Notingham, Inglan. Olsem wan misinari we i gat 20 yia, oli bin singaotem mi olsem distrik presiden i no longtaem i pas. Hem i bin wan longfala dei we i fulap wetem ol miting mo wok blong givhan, be mi bin glad mo harem gud long wok ia.
Taem mi stap wokbaot long saed blong reva, mi talem wan prea insaed long hat blong mi. Mi stap hop blong kasem sam daereksen blong Lod, mi askem, “?Mi mi stap mekem wanem we Yu Yu wantem?
Wan filing blong pis mo andastaning i kavremap mi. Stret long taem ia, mi kam blong save se Jisas Kraes i save mi mo i lavem mi. Mi no bin luk wan visen o harem wan voes, be bae mi neva save abaot Kraes we i stap laef mo tabu paoa blong Hem sapos Hem i no bin stanap long fored blong mi mo singaotem mi long nem blong mi.
Swit mo kaen eksperiens ia i bin jenisim laef blong mi. Long taem ia kasem tedei, evri impoten desisen we mi bin mekem hem i from save blong mi abaot Sevya. Plante yia i pas mo truaot long wol, mi stap testifae se Jisas Kraes, Hem i Pikinini blong God, mo Laet Ia blong Wol. Hem i wan spesel janis blong yumi blong kam long Hem, blong folem Hem, mo blong filim laet blong Hem insaed long laef blong yumi.
Laet Ia blong Wol
Wan naet, plante yia i pas, afta long misinari eksperiens ia we mi no save fogetem, waef blong mi, Barbara mo mi, mitufala i bin stap lukluk gud i go antap long skae. Taem mitufala i stap mekem olsem, mi lukluk wetem bigfala sapraes from ol milian sta, we mitufala no save bilivim nomo mo oli saen mo oli naes tumas. Ol tingting blong mi oli tanem mo stap tingting plante long ol toktok blong Lod i go long Moses: “Mo mi bin krietem ol wol we i no gat namba blong hem; mo tu, mi bin krietem olgeta from stamba tingting blong miwan; mo mi bin krietem olgeta tru long Pikinini, we i Wan Stret Pikinini blong mi ia Nomo” (Moses 1:33).
Tru long long Sevya, paoa we i krietem ol laet ia blong san, mun ol sta mo wol (luk long Doktrin mo Ol Kavenan 88:7–10). Hem i gat raet blong save talemaot se: “Mi nao, mi olsem laet blong ol man long wol. Man we i biaen long mi, bambae hem i no save wokbaot long tudak. Hem bambae i gat laet blong laef.”(Jon 8:12; luk tu long Jon 9:5).
Long ol toktok blong Presiden Dallin H. Oaks, Fas Kaonsela long Fas Presidensi, “Jisas Kraes, Hem i laet ia blong wol from se hem i stamba blong laet we i ‘tru laet we i saenem evri man we i kam long wol ia’ [Doktrin mo Ol Kavenan 88:12].” Laet blong Sevya hem i “tru laet we i saenem evri man we i kam long wol ia” (Doktrin mo Ol Kavenan 93:2; luk tu long 84:46). Wetem laet ia, bae yumi save, “save long samting we i gud aot long samting we i nogud” (Moronae 7:16). Laet blong yunives oli singaotem “laet ia blong trutok,” “laet blong Kraes,” mo “Spirit blong Kraes” (Doktrin mo Ol Kavenan 88:6; 88:7; Moronae 7:16).1
Aposol Jon i bin talem, “Laet ya i stap saen long tudak, mo tudak i no save winim hem” (Jon 1:5). Long dei blong yumi, Setan i stap wok ova taem blong lidim ol pikinini blong God i go long tudak, mo stap satemaot “laet, mo laef, mo trutok blong wol” (Ita 4:12).
Yumi no save andastanem fulwan—o glad from—Sevya mo gospel blong Hem taem yumi lusum laet mo trutok blong Hem. Be taem yumi sakem sin mo obei, givim seves mo wosipim Hem, yumi winim tudak. Laet ia blong Hem i kambak mo karemaot ol sado blong wol long medel blong yumi mo maen blong yumi.
Kasem Blesing tru long Laet Ia
Taem we wol blong yumi i kam moa tudak mo moa problem i kirap, blong stap filim laet ia blong Lod insaed long laef blong yumi, bae i kam olsem wan jalenj. Be Presiden Russell M. Nelson i bin rimaenem yumi se, “Tudak we i stap kam antap we i kam wetem ol hadtaem, i mekem se laet blong Jisas Kraes i saen we i saen moa oltaem.”2
Mi bin faenemaot se laet blong Hem i stap saen moa insaed long sol blong mi taem mi mekem taem blong ol samting blong Spirit, long ol taem we i kwaet olsem long naet ia wetem Barbara. Hemia i taem we ol filing mo tingting long saed blong spirit, daereksen, mo laet i kam long yumi. Hemia i taem we yumi kam blong andastanem olsem wanem, i tru se yumi bin kasem blesing ia blong gat wan Sevya.
Olsem Laet Ia blong Wol, Sevya i saenem rod blong yumi long laef blong yumi long wol ia, tru long eksampol mo ol tijing blong Hem (luk long Jon 8:12). Hem i karemaot ol hevi samting long yumi tru long lav mo gladhat blong Hem (luk long Matiu 11:28–30). He lightens our hearts with hope and healing through His Atonement (luk long Moronae 7:41). Mo Hem i givim moa laet long maen blong yumi wetem “Spirit blong trutok” (Doktrin mo Ol Kavenan 6:15; luk tu long 11:13).
Elder David A. Bednar of the Quorum of the Twelve Apostles i tijim, “Long evri sisen blong laef blong yumi, long evri situesen we yumi save stap fesem, mo long evri jalenj we yumi save stap fesem, Jisas Kraes, Hem i laet ia we i save karemaot fraet, i save givim hop mo daereksen mo givim pis mo glad ia we i no save finis.”3
Elda Ballard i bin givim seves long Inglan misin stat long 1948 kasem 1950.
Leftemap Laet blong Yufala
Spesel janis ia blong stap serem laet ia blong Sevya wetem ol narafala man mo stap invaetem olgeta blong kam long Hem, mo blong filim lav we Hem i gat long olgeta, i bin spesel oltaem long mi. Mi laekem tumas blong stap olsem wan misinari long Inglan. Mi laekem tumas blong stap olsem wan misin presiden long Kanada. Mi laekem tumas koling blong mi naoia olsem wan memba blong Kworom blong Olgeta Twelef Aposol. Koling blong mi i givim ol janis long mi blong testifae abaot Jisas Kraes mo serem mesej blong Restoresen truaot long wol.
Long taem bifo, Sevya i bin talem long ol disaepol blong Hem:
“Yufala i olsem laet long ol man long wol. Taon we i stap antap long wan hil, i no save haed. …
“Yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao bambae olgeta oli save leftemap nem blong Papa blong yufala, we i stap long heven” (Matiu 5:14, 16).
Long ol pipol blong Nifae, Hem i talem, “Luk mi mi laet we yufala i mas leftemap—ol samting we yufala i bin luk mi mi mekem.” Hem i ademap, “yufala i save ol samting we yufala i mas mekem long jos blong mi; from ol wok we yufala i bin luk mi mi mekem, bae yufala i mas mekem tu” (3 Nifae 18:24; 27:21).
Long dei blong yumi, Sevya i wantem i semmak, se ol disaepol blong Hem oli yusum laet blong Hem blong “ronemaot tudak long medel blong [yumi]” (Doktrin mo Ol Kavenan 50:25). Laet blong yumi i saen taem yumi soem lav olsem we Jisas i stap mekem. Laet blong yumi i saen taem yumi serem testemoni blong yumi abaot Restoresen mo hop we yumi gat long Kraes. Laet blong yumi i saen taem yumi leftemap ol voes blong yumi blong faet from trutok. Mo taem we laet blong yumi i saen, yumi pulum tingting blong ol narafala man i kam long stamba blong laet ia.
Givim seves we i kam long hat blong yu, mo bae yu filim laet ia blong Hem insaed long hat blong yu. Putum tingting i stap daon mo prea from ol janis blong serem gospel, bae spirit i lidim yu i go long olgeta we oli rere blong akseptem laet ia blong Hem. Lavem ol narafala man long ol smol mo ol bigfala wei, mo yu mekem wol ia i kam moa gud mo saen bigwan.
Oli karemaot ol ditel long Jisas Kraes, i kam long Harry Anderson
Wan Laet We I No Gat En
Mi tangkyu oltaem mo bae i no save finis, from eksperiens we mi bin gat olsem wan yang misinari long Inglan taem mi bin kam blong save long miwan se Jisas, Hem i Kraes. Mi save moa abaot hemia tedei se oli tru, taem mi bin kasem eksperiens long laef ia tru ol tes blong laef mo ol glad we mi kasem.
Seves blong mi insaed long Jos i bin blesem mi wetem ol gudgudfala mo spesel eksperiens long saed blong spirit we oli plante tumas mo samfala we oli tabu tumas blong save tokbaot. I nomo gat wan presen we i moa impoten mo naes tumas we mi save givim long ol pikinini blong mi, apupikinini, smol apupikinini, mo yufala ol fren blong mi raon long wol, bitim tru witnes blong mi se Jisas, Hem i Kraes, Pikinini blong Papa we I No Save Finis, Sevya mo Ridima blong evri man.
Naesfala waef blong mi, Barbara, i bin ded long 2018. Mi glad tumas blong save se, tru long long siling blong mitufala long tempol, tru long Jisas Kraes, bae mitufala i stap tugeta bakegen, wetem famli blong mitufala, blong taem we bae i no save finis.
Sam taem mi stap taet. Long ol taem ia, mi stop mo lukluk long wan pikja blong Sevya. Mi tingting long Hem long Getsemane, mo kwiktaem, mi nomo taet bakegen. Mi save insaed long hat blong mi se, from we Hem i winim wol, “tudak i stap lus, mo prapa delaet i stap kamtru” (1 Jon 2:8).
Mi save se Jisas Kraes i stap laef. “Hem i … wan laet we i no gat en, we i no save kam tudak;” (Mosaea 16:9). Sevya, Hem i laet blong yumi, laef blong yumi, mo rod ia blong yumi—yestedei, tedei, mo blong oltaem. Bae yumi stanap strong blong stap folem Hem mo stap saenem Laet blong Hem i go long wol.