“Abius, Adopsen—mo Hiling,” Liahona, Jenuware 2023.
Ol Yang Adalt
Abius, Adopsen—mo Hiling
Famli blong mi i go tru long Plante abius mo famli i no stap wan, be tru long Kraes, naoia mi gat hop blong fiuja famli blong mi.
Ol model nao oli stanap long ol foto ia
Mi gro long wan ples we evri samting raon long mi oli no stap gud. Papa mo mama blong mi we tufala bonem mi tufala i abius mi mo no wantem mi, mo mi eksperiensem plante jalenj we oli had tumas. Mi faet wetem wari, sem long bodi we mi gat, filing blong no wantem stap kakae, mo ol nogud situesen we i stap afektem mi,we oli holem mi stap prisena blong plante yia.
Stret papa mo mama blong mi tufala i bin sil long tempol, be afta we mi kasem baptaes taem mi gat eit yia, oli stat blong go longwe long Jos. Mo taem oli stap go moa longwe long ol kavenan blong olgeta, ol situesen i kam moa nogud.
Taem mi gat 14 yia, mi nao mi stap lukaotem brata mo mama blong mi we tufala i gat sik long bren. Mi lus mo nomo gat kontrol long mi. Mi no laekem miwan mo situesen blong mi mo biliv se laef blong mi bae i neva save jenis.
Be afta wan merikel i hapen. Stret mama blong mi i kam blong luksave se hem i nomo save lukaotem mi mo i ringim brata blong hem long Singapo blong askem sapos hem i wantem blong adoptem mi. Wetem ol basket blong mi we i fulap long ol ting blong mi mo ae we i fulap long wota, mi go insaed long plen—wan we i fri long abius. Be blong stap mekem ol jenis blong kam pat blong famli we i adoptem mi mo niufala kalja i wan had samting blong mekem, mo mi bin traehad blong muv fored.
Papa mo mama we tufala i adoptem mi tufala i mekem evri samting we tufala save mekem blong helpem mi. Mi go luk ol man we oli givim kaonsel long saed blong ol famli problem mo ol dokta. Mo tu, mi stat blong gobak long jos bakegen, be blong stap lanem abaot wan Papa long Heven we i lavem mi mo i gat wan stamba tingting blong laef blong mi, i bin had, from mi no bin bilivim from afta evri had samting we mi bin go tru long olgeta.
Mi no bin hapi. Mi no save olsem wanem blong kam oraet long ol samting we i pas mo tu, mi no gat hop abaot fiuja.
Strong Filing long Hat blong Kam Oraet
Wan dei taem mi stap tingting hevi long hamas taem i sot long laef blong wol ia. Mi no wanem spendem laef blong mi blong stap harem nogud nomo. Mi nidim blong lanem samting aot long ol hadtaem blong mi, praktisim ol prinsipol blong gospel we oli bin tijim long mi, mo invaetem Kraes i kam insaed long laef blong mi.
Mi statem wan wokbaot wetem fet mo statem blong nildaon mo askem long Papa long Heven evri dei blong givim paoa long mi blong fogivim papa mo mama blong mi we tufala i bonem mi i kam long wol ia, blong jenisim fraet blong mi i kam long fet, blong stap faenem hiling mo hapines mo blong stap luksave lav insaed long laef blong mi. Mi go long institiut mo stat blong stap stadi long ol skripja mo praktisim ol trutok blong gospel insaed long laef blong mi.
Mi rili lukaotem paoa blong hiling blong Jisas Kraes mo Atonmen blong Hem. Afta ol taem i pas, laef blong mi stat blong jenis. Taem mi gat tingting ia blong stap wet longtaem, mi kasem ol tritmen long man we i givim kaonsel long saed blong famli problem mo ol medikol tritmen blong mi, mo fulumap laef blong mi wetem Spirit evri dei, mi stat blong kam oraet: mi filim se mi nomo stap miwan mo filim se mi gat moa taem wetem miwan. Mi filim sef. Mi givim seves long ol narafala man. Mi lavem, fogivim mo akseptem miwan. Mi bildimap ol helti rilesensip we i gat lav. Mi stat blong filim lav blong Papa long Heven we i gat long mi. Mo blong fastaem long laef blong mi, mi filim tru glad.
Kraes I Givim Hop blong Fiuja blong Yumi
Mi no save jenisim wanem we i pas, be olsem long Doktrin mo Ol Kavenan 122:7 i talem, “Evri samting ia bae i givim eksperiens long [mi], mo bae i blong gud blong [mi].” Mi save naoia se Sevya i sapotem mi truaot ol hadtaem blong mi. Nomata olgeta hadtaem ia, mi bin kam antap bigwan from strong filing blong hat blong mi blong wantem jenis mo from se mi gohed blong tanem mi i go long Hem.
Sapos yu stap long wan situesen blong famli we i had tumas, save se yu gat wan Papa long Heven we i save yu mo lavem yu mo bae Hem i openem ol doa long wan gudfala fiuja blong yu. Bifo oli adoptem mi, mi talem long miwan se bae ol situesen blong mi bae oli neva jenis, mo se bae mi neva mared o gat ol pikinini from mi fraet se bae oli safa olsem mi bin fesem. Be mi bin lanem se nomata wanem hadtaem we yumi bin eksperiensem long ol famli blong yumi, taem yumi lukaotem Kraes, yumi save bildimap ol fiuja hom mo famli blong yumi we i no save finis wetem hop, trutok blong gospel mo lav.
Olsem we Elda Clark G. Gilbert blong Olgeta Seventi i bin tijim: “Yumi evriwan … stat long ol defren ples wetem ol defren samting we yumi bon wetem long laef. Sam, oli bon wetem plante samting, we laef i fulap long ol janis. Sam narawan, … oli stat wetem ol situesen we i gat jalenj. … Afta, yumi progres folem laen ia blong progres blong yumiwan. Fiuja blong yumi, bae i no dipen tumas long ples we yumi stat long hem, be i dipen long wei we laen ia i slip long hem. Jisas Kraes i stap luk hae paoa we yumi kasem, i nomata weaples yumi stat long hem. … Bae Hem i mekem evri samting we Hem i save mekem blong helpem yumi tanem laen ia i slip i go long heven.”1
!Nomata wanem ol situesen yumi stap fesem, i gat hop mo hiling we yumi faenem long Jisas Kraes! Hem i stap wetem yu mo Hem bae i lidim yu blong kasem pis mo glad taem yu lukaotem Hem—oltaem.