“Sapos Hem I Save Mekem Wota i kam Waen … ,” Liahona, Jenuware 2023.
Ol Merikel blong Jisas
Sapos Hem I Save Mekem Wota i kam Waen …
Tri samting we mi lanem aot long merikel ia we oltaem yumi no stap luksave.
Jon i wan man ia nomo we i raetem Gospel we i talem abaot Sevya we i mekem wota i kam waen (luk long Jon 2:1–11). Hem i iven gat strong filing ia inaf blong talem long yumi abaot eksperiens ia se i bin “stat blong ol merikel” (Jon 2:11).
Long saed blong kastom, ol risal blong nogat waen bae i spolem olgeta we oli stap stanap long taem blong lafet. 1 Mo folem hemia, mi no bilivim se wan merikel i mas stap olsem wan drama blong i save jenisim laef, mi stap tingting plante se from wanem Jon i bin filim se merikel ia i impoten tumas long medel blong plante narawan we oli tugeta drama mo i save jenisim laef.
?From Wanem Ol Merikel?
?From wanem ol merikeloli impoten tumas truaot long seves blong Sevya? I tru se hemia i pat from se Hem i gat bigfala sore long olgeta we oli stap long nid (luk long Mak 1:41). Blong ademap, ol merikel oli bin ol impoten pruf blong tabu paoa mo atoriti blong Hem (luk long Mak 2:5, 10–11). Ol bigbigfala merikel we oli hapen oli save mekem fet i kam strong tu mo blong pulum tingting blong ol pipol i kam long mesej blong Hem (luk long Jon 2:11; 6:2).
Afta, wan i poenemaot long mi se, ol merikel blong Sevya oli no tekem ol pipol oli kam blong harem mesej; oli help blong tijim mesej.2 Taem mi askem miwan wanem nao mi lanem abaot Jisas Kraes mo tabu misin blong Hem we i blong mekem wota i kam waen, mi stat blong luksave ol niufala samting.
Hemia tri lesen we mi bin lanem aot long merikel long Kena abaot Sevya mo paoa blong Hem blong sevem man.
1. “Taem blong mi i no kam yet ya”
Taem Meri i askem help long Jisas, Hem i ansa, “Taem blong mi i no kam yet ya” (Jon 2:4). Sapos i nogat plante infomesen, i no bin klia gud tumas long rekod blong Jon long wanem we Meri i stap ting long hem o wanem we Jisas i minim long ansa blong Hem se taem blong Hem i no kam yet ya.
Sentens ia i kam klia long mi se i impoten. Hem i posibol se Jisas i stap talemaot sam samting we bae oli hapen long fiuja, olsem taem we seves blong Hem long pablik bae i hapen. Long semmak taem, toktok ia i gat wan eko we i stap talem bakegen wanem we Jon i bin rekodem long evri ples, plante taem i stap poenem i go fored long lasfala merikel blong Hem we i atonmen mo sakrifaes blong Hem (luk long Jon 4:21–23; 5:25–29; 7:30; 8:20). Long en, toktok ia i ripit bakegen long en blong seves blong Hem long laef long wol ia, taem “Jisas i save we taem blong hem i kam finis blong hem i aot long wol ya, i gobak long Papa blong hem” (Jon 13:1, oli ademap italik; luk tu long Jon 12:23, 27; 16:32). Mo bifo Hem i stap go long Getsemane, Hem i prea, “Papa, taem blong mi i kamtru finis; mi mi Pikinini blong yu, mo mi wantem blong yu leftemap nem blong mi, blong mi mi save leftemap nem blong yu” (Jon 17:1, oli ademap italik).
Blong stap olsem wanem Jon i stap ripripitim sentens ia truaot long rekod blong hem i helpem mi blong luk en finis long wanem we bae i hapen long stat. Faswan, Jisas i mekem wota i kam waen blong karemaot tosta long saed blong bodi. Afta, long en, Hem i yusum waen blong sakramen blong representem blad blong atonmen blong Hem, we i mekem se laef we i no save finis bae i kam posibol mo mekem olgeta we oli biliv long Hem blong oli neva tosta bakegen (luk long Jon 4:13–16; 6:35–58; 3 Nifae 20:8).
2. “Yufala i mas mekem olsem we hem i talem”
Afta we hem i askem help long Jisas, Meri i talem long ol wokman, “Yufala i mas mekem olsem we hem i talem” (Jon 2:5). I gat wan lesen long toktok ia mo wanem we i gud tumas mo semmak long stori ia mo stori blong Josef long Ijip.
“Nao taem ol man Ijip oli stat sot long kakae, olgeta oli hanggri, nao oli kam askem long king blong i givim kakae long olgeta. Mo king i talem long olgeta se oli mas go luk Josef; oli mas mekem olsem we hem i talem” (Jenesis 41:55, oli ademap italik).
Meri, ating hem i no gat intres blong mekem koneksen ia mo iven Jon tu. Be taem mi luksave ol samting we oli semsemmak, tu aedia i kam long maen blong mi.
Faswan, mi luk yet Josef long wan narafala wei mo ol narafala samting aot long OlTesteman we oli talemaot Jisas Kraes mo misin blong Hem. Be moa impoten, ol stori blong Ijip mo Kena oli rimaenem mi se, Jisas Kraes i no sevem yumi nomo long sin mo ded tru long Atonmen blong Hem—we afta, Hem i ripresentem wetem bred mo waen—be Hem i save sevem yumi tu long saed blong bodi mo long sosol mo ol long ol narafala jalenj. Taem ol pipol oli nomo gat bred, Fero i talem long olgeta blong mekem eni samting we Josef i talem. Oli bin mekem mo oli kasem bred mo oli bin sef mo no safa long saed blong bodi. Taem ol wokman oli nomo gat waen, Meri i talem long olgeta blong mekem eni samting we bae Jisas i talem. Oli bin mekem mo oli kasem waen mo olgeta we oli tekpat oli bin sef taem oli no mekem gud ol resposibiliti blong olgeta.
Sapos yumi wantem blong mekem wanem we Jisas i stap talem, Hem i save mekem ol merikel long laef blong yumi.
Oel blong Giliad, i kam long Annie Henrie Nader, oli no save mekem kopi
Sapos yumi mekem wanem we Jisas i stap askem yumi blong mekem, Hem i save mekem semmak olsem long yumi mo mekem ol merikel long laef blong yumi (luk long Hibrus 10:35–36). Blong stap sef hem i wan long ol bigfala merikel blong Hem, mo i nidim yumi blong stap obei long pat blong yumi (luk long Doktrin mo Ol Kavenan 14:7; Ol Toktok blong Bilif 1:3).
3. “Yufala i fulumap ol botel ya long wota”
Sevya i givim daereksen long ol wokman blong fulumap sikis botel ia wetem wota. “Yufala i fulumap ol botel ya long wota” (Jon 2:6–7).
Be olgeta we oli stadi gud oli tingting i defren, i gud blong talem se wanwan botel i save holem ol bigfala dram wota. O bae i had blong mekem wan bigfala dram wota i kam waen o 100 dram blong wota i kam waen, mi no save. Wanem we i jenisim laef blong mi hem i tingting ia se Jisas i gat paoa blong jenisim wan samting i go long wan samting we i defren olgeta. Hem i no mekem tes blong waen nomo insaed long wota; Hem i tekem wota mo evri samting we i mekemap tes blong wota mo tanem evriwan i kam waen, we i tekem plante handred defdefren samting insaed long wota.
Sapos Hem i save mekem hemia, afta bae Hem i save tanem ol jalenj blong mi i kam ol blesing—i no blong ademap wan laet we i saen i go long wan bigfala win be blong bae Hem i jenisim gud evri pat blong ol hadtaem ia i kam wan samting we bae i stap blesem mi (luk long Rom 8:28; 2 Nifae 2:2).
Mo sapos Hem i save mekem hemia wetem wan jalenj, Hem i save mekem wetem evriwan long ol jalenj. So, taem we laef i kam fulap wetem ol tes blong laef, tingbaot se Hem i save jenisim wota i kam waen. Hem i save jenisim ol asis i kam wan naesfala samting (luk long Aesaea 61:3). Hem i save mekem ivel mo tanem i kam gudfala samting (luk long Jenesis 50:20). Hem i save jenisim ol mistek blong mi mo mekem mi kam antap mo karemaot ol sin blong mi mo jenisim aot long ol fasin blong raorao i go long progres.3
Mo long mi, wanem we mi kam blong luksave ia, i moa impoten bitim evriwan. Merikel ia we mi nating long hem long wantaem, i bin tijim mi se tru long paoa blong Hem, sapos yumi gat fet blong mekem wanem Hem i askem long yumi, Hem i save jenisim yumi long wanem we bin stap olsem bifo i kam wanem we yumi save kam—olsem Hem.