“Ol Eksampol blong Fet,” Liahona, Jenuware 2023.
Ol Eksampol blong Fet
Ol Eksampol blong Fet
Mi save se wan wei nomo blong tekem waef blong mi i kam long Jos i tru long eksampol blong mi. Taem mi jenisim fasin blong mi, hem i stat blong filim Spirit blong God.
Foto i kam long Cody Bell
Wan dei long rod blong go long wok, mi luk tu yangfala man i stap prijim toktok blong God long rod. Tufala i stopem mi mo askem sapos mi wantem blong save moa abaot Jos Ia blong Jisas Kraes blong Ol Lata-dei Sent. Long tetaem ia, mi no bin save wanem rod nao famli blong mi i stap folem. Mifala nogat kampas long saed blong spirit blong save faenem rod blong mifala.
Mi bin stap drink alkol long moning ia, mekem se mi no tingbaot tumas wanem ol misinari oli bin talem long mi. Be tufala i givim wan Buk blong Momon long mi mo wan bukletProfet Josef Smit long mi, wetem namba blong fon blong tufala. Afta long dei ia, mi stat blong rid. Wan samting i tajem sol blong mi taem mi stap ridim Buk blong Momon, mo mi bin sapraes long olsem wanem wan boe we i gat 14 yia i save luk wan bigfala visen.
Mi bin stap lukaotem trutok, mekem se mi stat blong mit wetem ol misinari. Afta we mi bin tekem kolosap evri lesen, mi save se mi nidim blong kasem baptaes. Be taem we dei blong baptaes blong mi i kam kolosap, mifala i tekem wan lesen we i had long mi blong harem. Lesen ia i tokbaot Tok blong Waes.
Lesen ia i had long mi from se mi drink alkol tumas. Ol samting raon long mi long ples blong wok i strong tumas. Evriwan we mi wok wetem olgeta oli stap drong, mo i mekem se mi tu mi mekem semmak. Oltaem mi stap go aot afta long wok blong drink alkol mo kam let long naet.
Be ol misinari oli bin mekem wan bigfala wok. Mi stil lavem olgeta from hemia. Oli tijim mi se God i wantem yumi blong stap strong mo we Hem i givim Tok blong Waes blong blesem yumi. Blong stap long loa ia i tru se i had tumas long mi, be sloslo, mi stat blong obei long hem. Mi tingbaot se mi ringim ol misinari evri dei, blong stap talem progres blong mi evri dei mo stap talem long olgeta se mi no drink long dei ia. Oli bin glad tumas long progres blong mi.
Wetem help blong olgeta, mi kasem baptaes mo kam insaed long yad blong Jisas Kraes. !Mi filim Spirit long naesfala dei ia! Be mi bin stap miwan taem mi joenem Jos. Mi wantem blong famli blong mi oli stap wetem mi.
Taem mi toktok long waef blong mi, Clirime, abaot Jos, fastaem, bae hem i no lisin. Bubuman blong hem i joenem wan defren relijin mo hem i stap tingting se from wanem Jos Ia blong Jos blong Jisas Kraes blong Ol Lata-dei Sent i kam long Albania. Mi save se wan wei nomo blong tekem hem i kam long gospel i tru long eksampol blong mi. Tru long ol aksen blong yumi, ol pipol bae oli save luk huia yumi stret.
Clirime i luksave ol jenis long mi taem mi lego alkol mo stat blong kam long haos eli afta long wok. From ol jenis we mi stap mekem, hem i stat blong filim Spirit blong God taem mi tokbaot Jos long hem. Mi no save tokbaot filing blong glad we mi bin filim taem hem i talem long se wan dei bae hem i kasem baptaes tu. I no longtaem, hem i stat blong tekem ol lesen blong ol misinari, we mi helpem ol misinari blong tijim. Mi bin glad tumas speseli taem we hem i putum deit blong baptaes blong hem, sikis manis afta we mi bin kasem baptaes.
Wetem baptaes blong hem mo baptaes blong tufala pikinini blong mitufala taem tufala i kasem eit yia, mi filim se mifala i save kam wan famli we oli no save finis. Be baptaes hem i bin wan stat nomo. Blong rere blong go long tempol, mifala i save se mifala i mas folem God i go kasem en blong laef blong mifala, stap obei ol komanmen, stap go long jos, stap tekem sakramen, stap givim seves long ol koling, stap ridim ol skripja mo stap lanem moa abaot ol kavenan mo plan ia blong sevem man.
Long dei ia we mifala i bin sil olsem wan famli long Frankfurt Gemani Tempol i bin wan narafala naes dei. Insaed long tempol mi kam blong andastanem moa abaot plan ia blong sevem man we God blong yumi i gat blong yumi, mo mi bin filim lav blong Hem.
Mi stap tingbaot yet ol promes we Clirime mo mi i bin mekem long tempol. Enitaem we wan samting i go rong o mifala i stap go tru long wan hadtaem, tingting blong mi i gobak long ol promes ia.
Olsem wan famli, mifala i traem blong laef long pis wetem wanwan long mifala from hemia nao wanem we mifala i bin filim long tempol. Evri taem mi tingting long tempol, mi filim hapi mo filim ol blesing. Mi save se God i stap laef mo we Hem i lavem yumi mo wantem yumi blong stap glad.