“Ol Famli mo Laet blong Wol,” Liahona, Jenuware 2023.
Blong Ol Papa mo Mama
Ol Famli mo Laet blong Wol
Ol Dia Papa mo Mama,
Famli hem i stamba samting insaed long plan blong hapines blong Papa long Heven blong ol pikinini blong Hem. Ol atikol blong magasin blong manis ia oli save helpem yu blong kam antap long saed blong komunikesen insaed long famli mo help blong faenem rod aot long ol jalenj insaed long ol famli rilesensip. Yu save yusum magasin ia tu blong helpem yu tijim ol pikinini sam long ol impoten lesen aot long Niu Testeman.
Ol Gospel Toktok Storian
Jisas Kraes I Tru Laet Ia blong Yumi.
Serem wetem famli blong yu sam long ol tijing long atikol blong Presiden Ballard long pej 4 abaot rol blong Jisas Kraes olsem Laet Ia blong Wol. Olsem wan famli, mekem lis blong ol defdefren kaen laet long hom blong yu mo toktok raon long ol defdefren samting we laet i stap mekem long yumi. ?Long ol wanem wei nao Jisas Kraes, olsem bigfala stamba blong laet ia long saed blong spirit i save helpem yumi?
Open Komunikesen insaed long Ol Famli
Hem i impoten blong stap rere long saed blong spirit long taem blong ol jalenj blong laef. Long pej 12, ridim sam advaes blong kaonsela long saed blong helt blong tingting long olsem wanem blong gat ol storian we oli impoten, we i save mekem ol pikinini oli save gro. ?Wijwan long olgeta tingting mo ol aedia ia bae yu save putum insaed long famli blong yuwan?
Stap Rere long Hat blong Yumi blong Kasem Toktok
Ridim atikol blong Brata Camargolong pej 38 abaot parabol blong man we i planem sid. Toktok raon wetem famli blong yu long mining blong ol defdefren graon long parabol ia. Ol yangfala pikinini oli save droem ol aetem we i stap long parabol mo tokbaot olgeta, mo ol bigfala pikinini oli save ridim parabol insaed long Mak 4:3–20 mo serem ol tingting mo ol kwestin blong olgeta.
Kam Folem Mi Hapi Famli Taem
Stap Mekem Ol Samting we I Had wetem Help blong God
Olsem Meri mo kasen blong hem Elisabet (luk long Luk 1:5–55), samtaem oli askem yumi blong mekem ol had samting mo yumi bae tingting sapos yumi save mekem o nogat.
-
Putum wan emti kontena olsem wan baket o wan bokis long wan en blong rum.
-
Givim wan feta long wanwan memba blong famli.
-
Stat long nara en blong rum longwe long nara en we kontena i stap, askem wanwan memba blong famli blong traem blong blo long feta we i no mas foldaon be i mas flot nomo blong i go insaed long kontena taem oli stap krosem rum.
-
Blong mekem se bae i moa had, letem oli mekem blong 30 seken nomo mo yusum wan stro blong blo long feta. Gohed blong katemdaon taem blong aktiviti ia kasem we i nomo save posibol.
Toktok raon: Tingting long hemia long maen blong yu se, sam jalenj bae yumi no save stretem long laef ia serem wan eksperiens we i mekem testemoni blong yu i kam strong se “ol samting we oli no posibol wetem man oli posibol wetem God” (Luk 18:27) ?Wanem smol step we yu save tekem evri dei blong kasem ol samting long laef blong yu we yu ting se oli no save hapen?