Lanwis blong Spirit

I kam long Alison Wood, Ol Magasin blong Jos

Mi lanem se Spirit i save helpem yumi blong toktok tugeta abaot lav blong Papa long Heven, iven taem yumi filim se i yumi no inaf.

Oltaem mi stap spenem sama blong stap travel i go tru long Yurop wetem wan tim blong danis. Ol pipol we oli stap wajem mifala, mo olgeta we oli stap tekempat mo level blong paoa i stap jenis, be mifala i gat wan kastom we i stap semmak oltaem: mifala i klosem evri samting taem mifala i singsing “God Protek Kasem Taem Yumi Mit”¹ long lanwis blong kantri we mifala i stap visitim. From plante long ol tim blong danis blong mi oli pat blong Jos Ia blongJisas Kraes blong Ol Lata-dei Sent, mifala i laekem tumas kastom ia. Hem i wan naesfala wei blong konek wetem ol pipol we oli stap wajem mifala mo serem lav blong Papa long Heven.

Kolosap en blong wan long ol visit ia, mifala i krosem boda blong go insaed long Jemani mo mifala i stap praktisim singsing ia long lanwis blong Jemani rere from taem we bae mifala danis. Be taem mifala i stap kam tru, mifala i faenemaot se pat ia blong Jemani oli toktok long lanwis Sobian, wan lanwis we i defren long wanem lanwis we mifala i bin fetful blong praktisim.

Long taem mifala stap ron long bas i go blong danis, mi taet tumas mo mi wantem blong slip nomo long fultaem we bas i stap ron. Be ol daerekta blong mifala oli gat sam narafala aedia. Oli bin askem olgeta we oli stap wok insaed long bas blong oli transletem hym i go long lanwis blong Sobian. Naoia oli wantem haf blong evriwan we bae oli danis we oli stap slip smosmol blong lanem singsing, blong hamas aoa nomo i stap bifo oli save danis blong ol man i luk.

Mifala i mekem bes blong lanem. Long en blong so blong danis, mifala i stanap tugeta long fored blong stej mo stat blong singsing. Mi tingbaot filing blong sapraes long ol toktok we mi neva save we mi bin lanem sam long sam aoa i pas, oli kam isi long maen blong mi. Mi filim se ol tu tingting we mi gat bifo abaot olsem wanem mifala i stap rere blong singsing, i stap go lus taem mi dipen long Spirit blong rimaenem mi long ol toktok.

Kapol i stap danis — Taem mifala i finis blong danis mo stat blong singsing, Spirit i karem ol toktok blong singsing i kam long maen blong mi.

Ol memba we oli stap wetem ol pipol we oli stap waj, oli sapraes mo glad tumas. Taem we singsing i finis, ples i kwaet. Afta, oli stanap mo oli stat blong singsing wan singsing i kambak long mifala, we biaen, oli eksplenem se hem i wan singsing blong talem tangkyu we oltaem oli stap singsing long hem long ol spesel taem.

Mi filim Spirit i strong long tetaem ia, nomata se mi no save andastanem wanem we oli stap singsing long hem. Mi glad tumas se Lod i bin helpem mi blong tokbaot lav blong Hem nomata ol filing blong mi oli no talem semmak. Oli rimaenem mi se lav blong Papa long Heven i wan wol mesej. Nomata ol samting we i mekem se yumi defdefren we yumi save gat, evriwan long yumi i save andastanem lanwis blong Spirit.