Ol Voes blong Ol Lata–dei Sent

?From Wanem Mi No Save Fogiv?

I kam long Samuel Kuosmanen, Not Ostrobothnia, Finlan

Mi prea se Papa long Heven bae i helpem mi blong winim ol rabis filing blong mi mo fogivim mi.

Pikja i kam long Allen Garns

Mi bin joenem sam brata long wod blong mi blong helpem wan sista blong muvaot. Be taem we mifala kasem apatmen blong hem, wan trak we i stop i stap we i no saed gud i stopem mifala blong no putum trak blong mifala long ples blong trak blong hem.

Mi ringim namba long saed blong trak se bae wan i kam muvum trak. Wan man i ansa mo promes se bae hem i kam i no longtaem.

Afta 15 minit i pas, mi ring bakegen be hem i no ansa. Long en, afta mi mekem wan kol bakegen, hem i kamkamaot wetem tu pikinini. Hem i kros mo talem wan samting we mi kasem mi. Mi traem blong fogetem taem mifala i stap gohed blong muvaot ol ting.

Long naet blong taem ia, mi tingting abaot eksperiens ia. Mi prea se Papa long Heven bae i helpem mi blong fogetem ol filing ia mo fogivim man ia. Hem i ansarem prea blong mi.

Smoltaem i pas, taem mi stap ridim lokol nius pepa be mi luksave wan atikol abaot man ia. I gat tu wan pikja blong hem. Ol rabis filing blong mi long hem oli stap blong kambak bakegen. So, bakegen mi gohed long semmak rod bakegen. Mi askem Lod se situesen ia we i no impoten ia bae i nomo stap kam krosem maen blong mi, mo we Hem i helpem mi blong fogivim man ia. Wan gudfala filing i kam.

I no longtaem tumas i pas, i jes hapen se mi luk semfala man ia bakegen long wan stoa. Ol rabis filing blong mi oli kambak bakegen. Mi sapraes tumas. Mi askem Lod se from wanem mi no fogetem eksperiens ia. Samfala dei i pas, Hem i tijim wan lesen long mi.

Mi stap muvaot long ol graon blong tempol blong Helsinki Finlan, taem mi luksave semmak man ia i stap wok insaed long ol garen blong tempol. Mi no save bilivim wanem we ae blong mi i stap luk. Maen blong mi i open mo mi andastanem se hem, olsem mi, i bin stap givim seves long Lod, i bin gat ol dei we ol samting oli wokaot nomo. Afta long taem ia, mi stat blong lukluk long man ia olsem brata blong mi. Wetem niufala ae, mi filim respek mo lav long hem. Afta long hemia, evri filing ia blong fastaem oli lego mi, oli neva kambak.

Taem yumi lukluk long ol narafala man olsem we Lod i stap luk luk long yumi, yumi save folem komanmen blong Hem blong fogivim man fulwan (luk long Matiu 6:14–15; Doktrin mo Ol Kavenan 64:9–10). Eksperiens ia i wan memori, naesfala sore blong Lod, we mi stil stap tingting hevi long hem yet long hat blong mi.