“Stap Faenem Rod Aot long Ol Hadtaem blong Ol Rilesensip,” Liahona, Jenuware 2023.
Stap Faenem Rod Aot long Ol Hadtaem blong Ol Rilesensip
Ol hadtaem blong famli i save kam oraet sapos yumi wantem blong lukaotem help blong Lod blong jenis mo blong kam antap.
Ol pikja droing oli kam long Ale+Ale
Blong stap faenem rod aot long ol jalenj insaed long famli rilesensip blong yumi, i save stap traem ol hamas yumi save stap kros o ol narafala filing. Olsem wan kaonsela long saed blong ol famli problem, mi luk plante situesen we i mekem ol hat oli brokbrok. Be mi witnesem tu ol blesing we oli kam long laef blong olgeta we oli stap fesem ol famli hadtaem tru taem oli stap lukaotem help blong Lod blong oli save kam antap long saed blong toktok tugeta, mekem lav mo save i kam antap, mo wok tugeta blong mekem ol impoten jenis. Wetem help blong Lod, oli faenem paoa blong gro aot long ol problem blong olgeta.
Fasin blong toktok tugeta, olsem blong Kraes, i save givim lav mo save
Tom mo Joan (ol nem oli bin jenisim), tufala tugeta i bin lusum ol patna blong tufala we oli bin mared wetem. Waef blong Tom i bin ded from kansa, mo hasban blong Joan, hem i no save kontrolem ol samting we oli nogud mo i bin lego hem mo stap long ol narafala rilesensip. Tom mo Joan, tufala i bin mit long wan konfrens blong ol Singgel mo tufala i stap rere from mared blong tufala.
Wanwan long tufala i gat ol pikinini,we yia blong olgeta i stat long 15 i godaon. Ol famli blong tufala oli bin stap wokbaot mo go aot tugeta, mo tugeta, Tom mo Joan i save luk finis ol problem we bae i save kirap long taem we bae oli stap tugeta. Oli kam long kaonsela blong kasem sam aedia long olsem wanem blong oli save toktok tugeta, tru ol wei we oli helti blong save faenem ol stret rod long niufala japta blong laef blong tufala.
Mi givim tingting long tufala blong luklukbak long mesej blong Presiden M. Russell Ballard, olsem Akting Presiden blong Kworom blong Olgeta Twelef Aposol. “Ol pikinini oli nidim tumas wan papa mo mama we i wantem lisin long olgeta,” hem i tijim, “mo famli kaonsel i save givim wan taem we ol memba blong famli oli save lanem blong andastanem mo lavlavem olgeta.”1
Blong famli kaonsel blong olgeta, oli bin disaed long ol ajenda ia:
-
Wanem problem.
-
Toktokraon long ol ansa blong problem.
-
Jusum wan plan.
-
Putum long aksen.
-
Toktok raon blong skelem wanem sakses blong plan ia long nekis wik mo tokbaot bakegen ol samting we sapos i nid blong wok from.
Blong ademap, long saed blong fasin blong stap kaonsel tugeta olsem wan famli, Tom mo Joan tufala i lanem se taem we wari blong ol rilesensip i kam bigwan, bae i gat nid ia blong lanem blong kam antap long saed blong toktok long wanwan tu.
Tom mo Joan tufala i lanem sam wei blong save helpem tufala blong kam antap long saed blong toktok tugeta mo rilesensip blong tufala wetem ol pikinini blong tufala.
-
Papa mo mama, tufala i stanap o wok tugeta blong stap faenem ol ansa blong ol problem wetem ol pikinini.
-
Sapos wan pikinini i stap fesem hadtaem blong stap mekem ol wok blong hem evri dei, wan long tufala, papa mo mama, bae i spenem taem wetem olgeta, blong stap toktok raon abaot dei ia mo semtaem oli wok tugeta blong flatem ol wok blong dei ia.
-
Tufala i spenem taem blong tufala evri wik, blong mekem rilesensip blong tufala i kam moa strong wetem wanwan pikinini.
-
Tufala i bin toktok raon finis se bae tufala stap go aot taem i gat “ol strong filing” we i mekem bren blong man i stap (singaot) mo i tekem ova ples blong “ol gudfala tingting,” we bren i sud lukluk nomo long olgeta blong toktok raon long hem.
-
Long ol taem we i gat wan situesen bitwin papa, mama mo pikinini, papa o mama i mas aot taem tufala i kasem wan filing blong mekem olsem, mo kambak afta blong oli save faenem wan gudfala plan blong ol toktok raon long hem.
Taem we famli oli mekem bes blong olgeta blong luksave mo stretem ol jalenj insaed long ol rilesensip long ol fetful mo helti wei—mo stap toktok raon tugeta abaot ol jalenj blong olgeta mo stap wok tugeta blong stretem—Tom mo Joan tufala i luksave se ol pikinini mo tufala, oli stap gro i kam antap, mo luksave olsem wanem hemia i impoten tumas.
Blong stap andastanem mo soem lav, i save tekem yumi kam moa kolosap tugeta
Taem ol pikinini oli kam ol adalt, oltaem oli no stap mekem ol joes we yumi wantem se bae oli mas mekem. ?Long wanem wei nao yumi save helpem olgeta long ol kaen situesen olsem? ?Olsem wanem nao yumi save stap gohed nomo o iven mekem rilesensip blong yumi wetem olgeta i stap strong, mekem se yumi save stap gohed blong sapotem mo stap olsem wan gudfala eksampol long laef blong olgeta?
Terry mo Bruce tufala i bin kam long ofis blong mi i no longtaem afta we Terry mo boe blong tufala, Seth, i bin gat wan rao tru long fon. Seth i bin go aot blong skul blong tri yia. Hem i bin kasem wan sik we i series tumas mo dokta i no rilisim hem yet long tritmen blong hem. Hem i no bin go long misin from sik blong hem. Terry mo Bruce tufala i no save wea ples testemoni blong hem i stap long hem o iven sapos hem i stap go long jos o no. Tufala i wari se Joylin, niufala gelfren blong Seth bae i no kaen gel we bae tufala i wantem long laef blong Seth. Tufala tugeta, papa mo mama blong hem, tufala i stap harem nogud abaot rod we Seth i stap folem.
Taem mifala i tokbaot wanem we tufala i save mekem, mifala i toktok raon long parabol blong smol sipsip we i bin lus. Man blong lukaotem sipsip i mas lisin long krae blong smol sipsip bifo hem i faenem, i lavem, mo karem i kambak long yad (luk long Luk 15:6). Terry mo Bruce tufala i luksave se bae tufala no save jenisim Seth, be tufala i disaed blong traem lisin long hem, blong stap lavem hem, mo invaetem hem blong kam hom. Tufala i no save jusum waef blong hem o rod blong laef blong hem, be tufala i save rimaenem hem long lav we famli i gat long hem mo blong gospel.
Terry i singaotem Seth mo talem sori from rao blong tufala. Hem i lisin nomo taem Seth i talem long hem se, hem i sem from hem i no save go long wan misin. Hem i wari se olsem wanem nao bae hem i save deitem wan gel insaed long jos. Tufala i bin invaetem Seth mo Jolyn i kam long haos long taem blong wan skul holidei.
Seth mo Jolyn i kam. Sista blong Seth i welkamem tufala mo laekem tufala. Tugeta, papa mo mama tufala i glad blong gat Seth i kam long hom mo tufala i bin talem long hem olsem. Terry mo Bruce tufala i konek moa evri dei wetem Seth. Terry i sendem mesej tru long teks wanwan taem long wan wik. Famli oli kam tugeta blong gat vidio konfrens evri Sandei. Papa blong Seth i spenem taem wetem hem blong go plei kolf mo go fising. Evri samting i hapen sloslo be Seth i kambak insaed long famli. Long en, Seth i disaed se blong jusum Joylyn long rod ia i no stret blong hem. Afta, hem i maredem wan naesfala woman we hem yet i baptaesem woman ia.
Terry mo Bruce tufala i faenem smol sipsip blong tufala we i bin lus tru long fasin blong stap lisin, lavem mo stap invaetem hem i kambak long yad ia.
Blong stap wok tugeta blong mekem jenis i save mekem i kam strong ol rilesensip mo helpem wanwan blong gro.
Marie mo hasban blong hem, David, tufala i bin mared blong plante yia, mo oli ol memba blong komuniti we ol pipol oli respektem olgeta. Be wan dei Marie i fanemaot wan samting we David i no save, we hem i stat blong gat wan rilesensip wetem wan narafala woman.
Marie i kam insaed long ofis blong mi, mo stap filim wan miks filing blong kros, harem nogud mo sore. Taem hem i stap krae mo talem stori blong hem, hem i save finis se hem i mas talemaot long David wanem hem i filim, be bae i talem long wan wei we i no kros, blong mekem se Spirit bae i stap wetem olgeta.
Afta we hem i rere mo prea, hem i talem long David se hem i lavem hem be hem i no glad blong fanemaot rilesensip blong hem wetem wan narafala woman. Tufala bae i nidim blong mit wetem bisop mo tingting long mared blong tufala. David i no wantem blong lusum waef blong hem o famli blong hem. Wetem help blong bisop blong hem, hem i statem rod blong fasin blong sakem sin.
Marie i save se i gat ol samting we bae wanwan long tufala i nidim blong mekem blong faenem hiling blong tufala wanwan mo olsem wan kapol. Marie i askem long David blong go stap long haos blong papa mo mama blong hem smoltaem kasem taem we hem i save stretem ol filing blong hem. Marie i spenem taem long tempol, mo stap askem help long Lod. Hem i gohed blong kasem ol kaonsel long man we i stap givim ol famli kaonsel we oli gat ol problem, blong save stap helpem hem gat ol gudfala skil long saed blong toktok mo stap lanem blong putum ol stret kondisen.
Tugeta, Marie mo David.
-
Ridim ol skripja evri naet.
-
I Prea.
-
Tufala tokbaot ol samting we tufala stap mekem evri dei.
-
Tufala go aot long deit naet wan taem long wan wik.
Tufala nomo haedem eni samting mo tokbaot evri samting. Marie i talem wanem we hem i tingting long hem, mo David i stap lisin. Tufala i stat blong toktok long tufala wanwan semmak bakegen olsem we long fastaem we tufala i jes mared.
Marie i ripotem se i no David nomo we i jenis, be hem tu i bin jenis. Hem i filim moa strong mo save trastem hemwan moa. David i bin kam wan man we i sakem sin mo hem i kambak long hom.
Tufala i putum Lod tu insaed long evri dei laef blong tufala, mo hemia i mekem se tras mo lav blong tufala i kam moa bigwan insaed long rilesensip blong tufala. Tufala tugeta i filim se, tru long ol traehad blong tufala blong winim jalenj ia wetem help blong Lod, i bin givim paoa long tufala.
Ol toktok blong Kraes bae oli lidim yumi
Taem yumi stap toktok raon blong stretem ol hadtaem insaed long ol rilesensip, bae yumi evriwan i tingbaot blong sidaon mo kaonsel wetem Lod. Samtaem bae Hem i talem long yumi wanem blong mekem. Samtaem yumi save jusum. “Hem i no stret blong mi talemaot evri samting blong mekem” (Doktrin mo Ol Kavenan 58:26). Be i gat ol narafala taem we yumi mas tanem yumi fulwan i go long Lod. Sapos yumi gat wan lukluk we i no save finis, ol rij samting blong taem we i no save finis, bae oli blong yumi, “mo evri samting bambae oli wok tugeta blong gud blong [yumi]” (Doktrin mo Ol Kavenan 90:24).